ਮਾਨਸਾ, 25 ਸਤੰਬਰ (ਬਲਵਿੰਦਰ ਸਿੰਘ ਧਾਲੀਵਾਲ)- ਨੰਬਰਦਾਰਾਂ ਨੇ ਪੰਜਾਬ ਸਰਕਾਰ 'ਤੇ ਦੋਸ਼ ਲਗਾਇਆ ਹੈ ਕਿ ਉਨ੍ਹਾਂ ਦੀਆਂ ਮੰਨੀਆਂ ਹੋਈਆਂ ਮੰਗਾਂ ਲਾਗੂ ਨਹੀਂ ਕੀਤੀਆਂ ਜਾ ਰਹੀਆਂ | ਇੱਥੇ ਪੰਜਾਬ ਨੰਬਰਦਾਰ ਯੂਨੀਅਨ ਦੀ ਇਕੱਤਰਤਾ ਨੂੰ ਸੰਬੋਧਨ ਕਰਦਿਆਂ ਜ਼ਿਲ੍ਹਾ ਪ੍ਰਧਾਨ ਅੰਮਿ੍ਤਪਾਲ ਸਿੰਘ ਗੁਰਨੇ ਕਲਾਂ ਕਿਹਾ ਕਿ ਵਿਧਾਨ ਸਭਾ ਚੋਣਾਂ ਮੌਕੇ ਆਮ ਆਦਮੀ ਪਾਰਟੀ ਵਲੋਂ ਵਾਅਦਾ ਕੀਤਾ ਗਿਆ ਸੀ ਕਿ ਯੂਨੀਅਨ ਦੀਆਂ ਭਖਦੀਆਂ ਮੰਗਾਂ ਤੁਰੰਤ ਲਾਗੂ ਕਰ ਦਿੱਤੀਆਂ ਜਾਣਗੀਆਂ ਪਰ ਸਾਢੇ 3 ਸਾਲ ਬੀਤ ਜਾਣ 'ਤੇ ਮਾਨ ਸਰਕਾਰ ਵਾਅਦਾ ਨਿਭਾਅ ਨਹੀਂ ਰਹੀ | ਉਨ੍ਹਾਂ ਮੰਗ ਕੀਤੀ ਕਿ ਨੰਬਰਦਾਰੀ ਜੱਦੀ ਪੁਸ਼ਤੀ ਕੀਤੀ ਜਾਵੇ, ਮਾਣ ਭੱਤੇ 'ਚ ਵਾਧਾ ਕਰਨ ਦੇ ਨਾਲ ਹੀ ਬੱਸ ਕਿਰਾਇਆ ਮੁਆਫ਼ ਕੀਤਾ ਜਾਵੇ ਅਤੇ ਸਿਹਤ ਬੀਮੇ ਦੀ ਸਹੂਲਤ ਦਿੱਤੀ ਜਾਵੇ | ਉਨ੍ਹਾਂ ਕਿਹਾ ਕਿ ਤਹਿਸੀਲ 'ਚ ਮਾਲ ਵਿਭਾਗ ਦੇ ਕੰਮਾਂ ਤੋਂ ਇਲਾਵਾ ਰਜਿਸਟਰੀ 'ਤੇ ਵੀ ਹੋਰ ਵਿਅਕਤੀਆਂ ਦੀ ਤਸਦੀਕ ਮੰਨੀ ਜਾਂਦੀ ਹੈ, ਨੂੰ ਬੰਦ ਕਰਕੇ ਨੰਬਰਦਾਰ ਦੀ ਤਸਦੀਕ ਮੰਨੀ ਜਾਵੇ | ਇਸ ਮੌਕੇ ਗੁਰਬਰਨ ਸਿੰਘ ਕੁਲਾਣਾ, ਮਲਕੀਤ ਸਿੰਘ ਫਫੜੇ, ਜਗਤਾਰ ਸਿੰਘ ਭਾਦੜਾ, ਗੁਰਮੀਤ ਸਿੰਘ ਹੀਰੋਂ, ਮਤਵਾਲ ਸਿੰਘ ਹੀਰੋਂ, ਸੁਖਪਾਲ ਸਿੰਘ ਖੀਵਾ, ਅਮਨਦੀਪ ਸਿੰਘ ਦਲੇਲਵਾਲਾ, ਹਰਵਿੰਦਰ ਸਿੰਘ ਫਫੜੇ, ਜਗਰੂਪ ਸਿੰਘ ਸੱਦਾ ਸਿੰਘ ਵਾਲਾ, ਬੂਟਾ ਸਿੰਘ ਖੋਖਰ, ਰਾਜਾ ਸਿੰਘ ਬੱਲੂਆਣਾ, ਨਛੱਤਰ ਸਿੰਘ ਨੰਗਲ, ਅਵਤਾਰ ਸਿੰਘ ਮੰਢਾਲੀ ਆਦਿ ਹਾਜ਼ਰ ਸਨ |
