ਦੇਸ਼ 'ਚ ਜਲਦ ਦੌੜੇਗੀ ਪਹਿਲੀ 'ਵੰਦੇ ਭਾਰਤ ਸਲੀਪਰ' ਰੇਲਗੱਡੀ

ਪ੍ਰਧਾਨ ਮੰਤਰੀ ਇਸੇ ਮਹੀਨੇ ਦਿਖਾਉਣਗੇ ਹਰੀ ਝੰਡੀ
ਨਵੀਂ ਦਿੱਲੀ, 1 ਜਨਵਰੀ (ਪੀ.ਟੀ.ਆਈ)-ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਐਲਾਨ ਕੀਤਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਸੇ ਮਹੀਨੇ (ਸੰਭਾਵਿਤ 18 ਜਾਂ 19 ਜਨਵਰੀ ਨੂੰ ) ਗੁਹਾਟੀ ਅਤੇ ਕੋਲਕਾਤਾ ਦੇ ਵਿਚਕਾਰ ਦੇਸ਼ ਦੀ ਬਹੁ-ਉਡੀਕੀ ਜਾਣ ਵਾਲੀ ਪਹਿਲੀ 'ਵੰਦੇ ਭਾਰਤ ਸਲੀਪਰ' ਰੇਲਗੱਡੀ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕਰਨਗੇ | ਇਹ ਰੇਲਗੱਡੀ ਅਗਲੇ 15-20 ਦਿਨਾਂ ਵਿਚ ਆਪਣੀ ਸੇਵਾ ਸ਼ੁਰੂ ਕਰ ਦੇਵੇਗੀ | ਰੇਲ ਮੰਤਰੀ ਨੇ ਦੱਸਿਆ ਕਿ ਇਸ ਰੇਲਗੱਡੀ ਦਾ ਕਿਰਾਇਆ ਮੱਧ ਵਰਗ ਨੂੰ ਧਿਆਨ 'ਚ ਰੱਖ ਕੇ ਤੈਅ ਕੀਤਾ ਗਿਆ ਹੈ | ਜਿੱਥੇ ਗੁਹਾਟੀ-ਕੋਲਕਾਤਾ ਦਾ ਹਵਾਈ ਕਿਰਾਇਆ 6,000 ਤੋਂ 8,000 ਰੁਪਏ ਦੇ ਵਿਚਕਾਰ ਹੈ, ਉੱਥੇ ਵੰਦੇ ਭਾਰਤ ਸਲੀਪਰ ਦਾ ਕਿਰਾਇਆ (ਖਾਣੇ ਸਮੇਤ) ਕਾਫ਼ੀ ਘੱਟ ਹੋਵੇਗਾ | ਥਰਡ ਏ.ਸੀ. ਦਾ ਕਿਰਾਇਆ ਲਗਭਗ 2,300 ਰੁਪਏ, ਸੈਕੰਡ ਏ.ਸੀ. ਦਾ ਲਗਭਗ 3,000 ਰੁਪਏ ਅਤੇ ਫ਼ਸਟ ਏ.ਸੀ ਦਾ ਲਗਭਗ 3,600 ਰੁਪਏ ਤੱਕ ਹੋਵੇਗਾ | ਇਸ 16 ਕੋਚਾਂ ਵਾਲੀ ਰੇਲਗੱਡੀ 'ਚ ਕੁੱਲ 823 ਯਾਤਰੀਆਂ ਦੇ ਬੈਠਣ ਦੀ ਸਮਰੱਥਾ ਹੈ, ਜੋ 120-130 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਚੱਲੇਗੀ | ਉਨ੍ਹਾਂ ਦੱਸਿਆ ਕਿ ਅਗਲੇ 6 ਮਹੀਨਿਆਂ ਵਿਚ 8 ਹੋਰ ਅਜਿਹੀਆਂ ਰੇਲਗੱਡੀਆਂ ਤਿਆਰ ਹੋ ਜਾਣਗੀਆਂ ਅਤੇ ਅਗਲੇ ਸਾਲ ਤੱਕ ਇਨ੍ਹਾਂ ਦੀ ਗਿਣਤੀ 'ਚ ਤੇਜ਼ੀ ਨਾਲ ਵਾਧਾ ਹੋਵੇਗਾ |