ਗੁਰੂਗ੍ਰਾਮ, 2 ਜਨਵਰੀ (ਏਜੰਸੀ)-ਹਰਿਆਣਾ ਪੁਲਿਸ ਦੀ ਵਿਸ਼ੇਸ਼ ਜਾਂਚ ਟੀਮ ਨੇ ਮੇਵਾਤ ਇਲਾਕੇ 'ਚ ਪਾਕਿਸਤਾਨ ਲਈ ਜਾਸੂਸੀ ਕਰਨ ਅਤੇ ਅੱਤਵਾਦ ਫੰਡਿੰਗ ਦੇ ਮਾਮਲੇ 'ਚ ਪੰਜਾਬ ਦੇ ਸੰਗਰੂਰ ਤੋਂ ਇਕ ਵਿਅਕਤੀ ਨੂੰ ਗਿ੍ਫ਼ਤਾਰ ਕੀਤਾ | ਪੁਲਿਸ ਨੇ ਕਿਹਾ ਕਿ ਪੁੱਛਗਿਛ ਦੌਰਾਨ ਮੁਲਜ਼ਮ ਸੰਦੀਪ ਉਰਫ਼ ਸੰਨੀ (22) ਨੇ ਖੁਲਾਸਾ ਕੀਤਾ ਕਿ ਉਸ ਨੇ ਅੱਤਵਾਦ ਫੰਡਿੰਗ ਨੈੱਟਵਰਕ ਸਰਗਨੇ ਰਿਜ਼ਵਾਨ ਨਾਲ 50 ਹਜ਼ਾਰ ਦਾ ਲੈਣ-ਦੇਣ ਕੀਤਾ ਸੀ, ਜੋ ਇਕ ਵਿਦੇਸ਼ੀ ਡਰੱਗ ਨੈੱਟਵਰਕ ਨਾਲ ਜੁੜਿਆ ਹੈ | ਪੁਲਿਸ ਨੇ ਕਿਹਾ ਕਿ ਸੋਮਵਾਰ ਨੂੰ ਸੰਦੀਪ ਦੀ ਗਿ੍ਫ਼ਤਾਰੀ ਨਾਲ ਇਸ ਮਾਮਲੇ 'ਚ ਕੁੱਲ ਅੱਠ ਲੋਕਾਂ ਨੂੰ ਗਿ੍ਫ਼ਤਾਰ ਕੀਤਾ ਗਿਆ ਹੈ | ਸਿਟ ਮੁਖੀ, ਡੀ. ਐਸ. ਪੀ. ਅਭਿਮੰਨਿਊ ਲੋਹਾਨ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਸੰਨੀ ਵਿਦੇਸ਼ੀ ਡਰੱਗ ਡੀਲਰਾਂ ਦੇ ਸਿੱਧੇ ਸੰਪਰਕ 'ਚ ਸੀ ਅਤੇ ਮੁੱਖ ਦੋਸ਼ੀ ਰਿਜ਼ਵਾਨ ਦੇ ਨਾਲ ਉਸ ਦੇ ਨੇੜਲੇ ਸੰਬੰਧ ਸਨ, ਜਿਸ ਨੂੰ ਪਿਛਲੇ ਸਾਲ ਨਵੰਬਰ 'ਚ ਗਿ੍ਫ਼ਤਾਰ ਕੀਤਾ ਗਿਆ ਸੀ | ਉਨ੍ਹਾਂ ਕਿਹਾ ਕਿ ਪੁਲਿਸ ਨੂੰ ਰਿਜ਼ਵਾਨ ਦੇ ਬੈਂਕ ਖਾਤੇ ਤੋਂ ਸੰਨੀ ਨੂੰ 50 ਹਜ਼ਾਰ ਰੁਪਏ ਟਰਾਂਸਫਰ ਹੋਣ ਦਾ ਪਤਾ ਲੱਗਾ ਹੈ | ਪੁਲਿਸ ਅਨੁਸਾਰ ਸੰਨੀ ਦਾ ਪੂਰਾ ਪਰਿਵਾਰ ਡਰੱਗ ਦੇ ਧੰਦੇ 'ਚ ਸ਼ਾਮਿਲ ਹੈ | ਉਸ ਦੇ ਭਰਾ 'ਤੇ ਪੰਜਾਬ 'ਚ ਦੋ ਮਾਮਲੇ ਜਦ ਕਿ ਸੰਨੀ ਦੇ ਖਿਲਾਫ਼ 3 ਐਨ. ਡੀ. ਪੀ. ਐਸ. ਐਕਸ ਦੇ ਮਾਮਲੇ ਤੇ ਉਸ ਦੀ ਮਾਂ ਖ਼ਿਲਾਫ਼ 6 ਐਨ. ਡੀ. ਪੀ. ਐਸ. ਐਕਟ ਦੇ ਮਾਮਲੇ ਦਰਜ ਹਨ |
