ਢਾਕਾ, 25 ਜਨਵਰੀ (ਏਜੰਸੀ)-ਬੰਗਲਾਦੇਸ਼ ਦੇ ਨਰਸਿੰਗਦੀ ਜ਼ਿਲ੍ਹੇ ਵਿਚ ਇਕ ਹਿੰਦੂ ਨੌਜਵਾਨ ਨੂੰ ਜ਼ਿੰਦਾ ਸਾੜਨ ਦਾ ਇਕ ਹੋਰ ਮਾਮਲਾ ਸਾਹਮਣੇ ਆਇਆ ਹੈ | 23 ਸਾਲਾ ਚੰਚਲ ਚੰਦਰ ਭੌਮਿਕ ਦੀ ਸੜੀ ਹੋਈ ਲਾਸ਼ ਸ਼ੁੱਕਰਵਾਰ ਰਾਤ ਨੂੰ ਇੱਕ ਗੈਰਾਜ ਦੇ ਅੰਦਰੋਂ ਮਿਲੀ | ਪਰਿਵਾਰ ਨੇ ਇਸ ਨੂੰ ਇੱਕ ਯੋਜਨਾਬੱਧ ਕਤਲ ਦੱਸਿਆ ਹੈ | ਇਹ ਘਟਨਾ ਨਰਸਿੰਗਦੀ ਸ਼ਹਿਰ ਵਿਚ ਪੁਲਿਸ ਲਾਈਨਾਂ ਦੇ ਨਾਲ ਲੱਗਦੇ ਮਸਜਿਦ ਮਾਰਕੀਟ ਖੇਤਰ ਵਿਚ ਵਾਪਰੀ | ਚੰਚਲ ਦੀ ਲਾਸ਼ ਉਸ ਗੈਰਾਜ ਦੇ ਅੰਦਰ ਮਿਲੀ ਜਿੱਥੇ ਉਹ ਕੰਮ ਕਰਦਾ ਸੀ | ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਸੀ.ਸੀ.ਟੀ.ਵੀ. ਫੁਟੇਜ ਦੀ ਜਾਂਚ ਕਰ ਰਹੀ ਹੈ | ਸਥਾਨਕ ਲੋਕਾਂ ਅਨੁਸਾਰ ਘਟਨਾ ਸਮੇਂ ਚੰਚਲ ਗੈਰਾਜ ਦੇ ਅੰਦਰ ਸੌਂ ਰਿਹਾ ਸੀ | ਰਾਤ ਦੇ ਸਮੇਂ ਕਿਸੇ ਨੇ ਬਾਹਰੋਂ ਸ਼ਟਰ 'ਤੇ ਪੈਟਰੋਲ ਪਾ ਕੇ ਅੱਗ ਲਗਾ ਦਿੱਤੀ | ਅੱਗ ਤੇਜ਼ੀ ਨਾਲ ਅੰਦਰ ਫੈਲ ਗਈ | ਇਸ ਤੋਂ ਪਹਿਲਾਂ 18 ਦਸੰਬਰ, 2025 ਨੂੰ ਮੈਮਨਸਿੰਘ ਜ਼ਿਲ੍ਹੇ ਵਿਚ ਇੱਕ ਹਿੰਦੂ ਨੌਜਵਾਨ ਦੀਪੂ ਚੰਦਰ ਦਾਸ ਨੂੰ ਭੀੜ ਨੇ ਕੁੱਟ-ਕੁੱਟ ਕੇ ਮਾਰ ਦਿੱਤਾ ਸੀ | ਉਸ ਦੀ ਲਾਸ਼ ਨੂੰ ਦਰੱਖਤ ਨਾਲ ਲਟਕਾਇਆ ਗਿਆ ਸੀ ਅਤੇ ਅੱਗ ਲਗਾ ਦਿੱਤੀ ਗਈ ਸੀ | ਪਿਛਲੇ 40 ਦਿਨਾਂ ਵਿਚ ਦਸ ਹਿੰਦੂਆਂ ਦਾ ਕਤਲ ਕੀਤਾ ਗਿਆ ਹੈ |
