ਮੁਰਲੀ ਸ੍ਰੀਸ਼ੰਕਰ ਨੇ ਦੂਸਰੀ ਵਾਰ ਰਾਸ਼ਟਰਮੰਡਲ ਖੇਡਾਂ ’ਚ ਜਿੱਤਿਆ ਚਾਂਦੀ ਦਾ ਤਗਮਾ

ਗਲਾਸਗੋ, 29 ਜੁਲਾਈ (ਏਜੰਸੀ)-ਭਾਰਤੀ ਅਥਲੈਟਿਕਸ ਦੇ ਇਤਿਹਾਸ ਵਿਚ ਇਕ ਨਵਾਂ ਅਧਿਆਇ ਜੋਡ਼ਦੇ ਹੋਏ ਮੁਰਲੀ ਸ੍ਰੀਸ਼ੰਕਰ ਨੇ ਬੁੱਧਵਾਰ ਨੂੰ ਲੰਬੀ ਛਾਲ ਵਿਚ ਚਾਂਦੀ ਦਾ ਤਗਮਾ ਜਿੱਤ ਕੇ ਰਾਸ਼ਟਰਮੰਡਲ ਖੇਡਾਂ ਵਿਚ ਦੇਸ਼ ਦੇ ਪਹਿਲੇ ਦੋਹਰੇ ਤਗਮਾ ਜੇਤੂ ਬਣਨ ਦਾ ਮਾਣ ਹਾਸਿਲ ਕੀਤਾ ਹੈ। ਸਾਲ 2022 ਵਿਚ ਬਰਮਿੰਘਮ ਵਿਖੇ ਚਾਂਦੀ ਦਾ ਤਗਮਾ ਜਿੱਤਣ ਤੋਂ ਬਾਅਦ 27 ਸਾਲਾ ਮੁਰਲੀ ਨੇ 8.09 ਮੀਟਰ ਦੀ ਆਪਣੀ ਸਰਵੋਤਮ ਛਾਲ ਨਾਲ ਆਪਣੇ ਸੰਗ੍ਰਹਿ ਵਿਚ ਇਕ ਹੋਰ ਤਗਮਾ ਸ਼ਾਮਿਲ ਕੀਤਾ। ਇਹ ਪ੍ਰਾਪਤੀ ਉਸ ਦੀ ਗੋਡੇ ਦੀ ਸੱਟ ਤੋਂ ਬਾਅਦ ਇਕ ਭਾਵੁਕ ਵਾਪਸੀ ਨੂੰ ਦਰਸਾਉਂਦੀ ਹੈ, ਜਿਸ ਨੇ ਲਗਭਗ ਉਸ ਦੇ ਕਰੀਅਰ ਨੂੰ ਖਤਮ ਹੀ ਕਰ ਦਿੱਤਾ ਸੀ। ਗਲਾਸਗੋ ਵਿਚ ਚੱਲ ਰਹੀਆਂ 2026 ਰਾਸ਼ਟਰਮੰਡਲ ਖੇਡਾਂ ਵਿਚ ਲੰਬੀ ਛਾਲ ਮਾਰਨ ਵਾਲੇ ਮੁਰਲੀ ਸ਼੍ਰੀਸ਼ੰਕਰ ਨੇ ਭਾਰਤ ਨੂੰ 13ਵਾਂ ਤਗਮਾ ਦਿਵਾਇਆ ਹੈ। ਇਸ ਤਰ੍ਹਾਂ ਸੋਨ ਤਗਮਾ ਜਮੈਕਾ ਦੇ ਤਜੈ ਗੇਲ (8.15 ਮੀਟਰ) ਨੂੰ ਮਿਲਿਆ। ਇਸੇ ਹੀ ਮੁਕਾਬਲੇ ਵਿਚ ਇਕ ਹੋਰ ਭਾਰਤੀ ਲੋਕੇਸ਼ ਸੱਤਿਆਨਾਥਨ (7.97 ਮੀਟਰ) ਛਾਲ ਮਾਰ ਕੇ ਪੰਜਵੇਂ ਸਥਾਨ ’ਤੇ ਰਿਹਾ। ਮੁਰਲੀ ਵਲੋਂ ਚਾਂਦੀ ਦਾ ਤਗਮਾ ਜਿੱਤਣ ਤੋਂ ਬਾਅਦ ਭਾਰਤ 2 ਸੋਨ, 8 ਚਾਂਦੀ ਅਤੇ 3 ਕਾਂਸੀ ਦੇ ਤਗਮੇ ਜਿੱਤ ਕੇ ਤਗਮਾ ਸੂਚੀ ’ਚ ਨੌਵੇਂ ਸਥਾਨ ’ਤੇ ਹੈ।