ਪ੍ਰੀਤੀ ਦੇ ਸ਼ਹਿਰ ਰੋਹਤਕ ’ਚ ਜਸ਼ਨਾਂ ਦਾ ਮਾਹੌਲ

ਹਰਿਆਣਾ ਦੇ ਰੋਹਤਕ ’ਚ ਪ੍ਰੀਤੀ ਦੇ ਸੋਨ ਤਗਮਾ ਜਿੱਤਣ ’ਤੇ ਜਸ਼ਨ ਦਾ ਮਾਹੌਲ ਹੈ। ਉਸਦੀ ਮਾਂ ਤੇ ਭੈਣ ਉਸਦੀ ਇਤਿਹਾਸਕ ਸਫਲਤਾ ’ਤੇ ਮਠਿਆਈਆਂ ਵੰਡ ਕੇ ਜਸ਼ਨ ਮਨਾਇਆ। ਪਰਿਵਾਰ ਨੇ ਪ੍ਰੀਤੀ ਦੀ ਪ੍ਰਾਪਤੀ ਨੂੰ ਸਾਲਾਂ ਦੀ ਸਖ਼ਤ ਮਿਹਨਤ ਤੇ ਸੰਘਰਸ਼ ਦਾ ਸਿੱਟਾ ਦੱਸਿਆ, ਇਸਨੂੰ ਪੂਰੇ ਦੇਸ਼ ਲਈ ਮਾਣ ਵਾਲਾ ਪਲ ਦੱਸਿਆ। ਪ੍ਰੀਤੀ ਪਵਾਰ ਦੀ ਮਾਂ ਨੇ ਦੱਸਿਆ ਕਿ ਸ਼ੁਰੂ ’ਚ ਪ੍ਰੀਤੀ ਨੂੰ ਮੁੱਕੇਬਾਜ਼ੀ ਵਿਚ ਖਾਸ ਦਿਲਚਸਪੀ ਨਹੀਂ ਸੀ, ਪਰ ਉਸਦੇ ਚਾਚਾ, ਜੋ ਕਿ ਇੱਕ ਮੁੱਕੇਬਾਜ਼ੀ ਕੋਚ ਸਨ, ਨੇ ਉਸਨੂੰ ਇਸ ਖੇਡ ਨੂੰ ਅਪਣਾਉਣ ਲਈ ਉਤਸ਼ਾਹਿਤ ਕੀਤਾ। ਉਸਦੀ ਮਾਂ ਨੇ ਕਿਹਾ ਕਿ ਇਕ ਪਰਿਵਾਰਕ ਮੈਂਬਰ ਨੂੰ ਉਸਦੇ ਕੋਚ ਵਜੋਂ ਰੱਖਣ ਨਾਲ ਆਤਮਵਿਸ਼ਵਾਸ ਪੈਦਾ ਹੋਇਆ ਤੇ ਪ੍ਰੀਤੀ ਨੇ ਸਖ਼ਤ ਮਿਹਨਤ ਜਾਰੀ ਰੱਖੀ। ਜਿੱਤਾਂ ਅਤੇ ਹਾਰਾਂ ਦੋਵਾਂ ਤੋਂ ਸਿੱਖਦੇ ਹੋਏ, ਉਸਦਾ ਆਤਮਵਿਸ਼ਵਾਸ ਵਧਿਆ, ਜਿਸਦੇ ਨਤੀਜੇ ਵਜੋਂ ਅੱਜ ਸੋਨ ਤਗਮਾ ਮਿਲਿਆ। ਉਸਨੇ ਉਮੀਦ ਪ੍ਰਗਟ ਕੀਤੀ ਕਿ ਪ੍ਰੀਤੀ ਸਖ਼ਤ ਮਿਹਨਤ ਕਰਦੀ ਰਹੇਗੀ ਤੇ ਦੇਸ਼ ਲਈ ਹੋਰ ਤਗਮੇ ਜਿੱਤੇਗੀ।
ਮੁੱਕੇਬਾਜ਼ੀ ਜੈਸਮੀਨ ਦੇ ਖੂਨ ’ਚ
ਜੈਸਮੀਨ ਲੰਬੋਰੀਆ ਦਾ ਜਨਮ ਹਰਿਆਣਾ ਦੇ ਭਿਵਾਨੀ ਜ਼ਿਲ੍ਹੇ ’ਚ ਹੋਇਆ ਸੀ, ਜਿਸਨੂੰ ‘ਭਾਰਤ ਦੀ ਮੁੱਕੇਬਾਜ਼ੀ ਨਰਸਰੀ’ ਵਜੋਂ ਜਾਣਿਆ ਜਾਂਦਾ ਹੈ। ਮੁੱਕੇਬਾਜ਼ੀ ਜੈਸਮੀਨ ਦੇ ਖੂਨ ’ਚ ਹੈ। ਉਹ ਪ੍ਰਸਿੱਧ ਏਸ਼ੀਆਈ ਖੇਡਾਂ ਦੇ ਸੋਨ ਤਗਮਾ ਜੇਤੂ ਹਵਾ ਸਿੰਘ ਦੀ ਪੜਪੋਤੀ ਹੈ। ਇਸ ਤੋਂ ਇਲਾਵਾ, ਉਸਦੇ ਚਾਚੇ, ਸੰਦੀਪ ਸਿੰਘ ਅਤੇ ਪਰਵਿੰਦਰ ਸਿੰਘ, ਵੀ ਸਫਲ ਮੁੱਕੇਬਾਜ਼ ਸਨ। ਬਚਪਨ ਤੋਂ ਹੀ ਆਪਣੇ ਘਰ ’ਚ ਤਗਮਿਆਂ ਅਤੇ ਮੁੱਕੇਬਾਜ਼ੀ ਦੀਆਂ ਚਰਚਾਵਾਂ ’ਚ ਘਿਰਿਆ ਹੋਇਆ, ਰਿੰਗ ਵਿਚ ਦਾਖਲ ਹੋਣਾ ਜੈਸਮੀਨ ਲਈ ਇਕ ਕੁਦਰਤੀ ਫੈਸਲਾ ਸੀ। ਆਪਣੇ ਚਾਚਿਆਂ ਦੀ ਦੇਖ-ਰੇਖ ਹੇਠ, ਉਸਨੇ ਰਿੰਗ ਦੀਆਂ ਪੇਚੀਦਗੀਆਂ ਸਿੱਖੀਆਂ ਤੇ ਜਲਦੀ ਹੀ ਰਾਸ਼ਟਰੀ ਪੱਧਰ ’ਤੇ ਆਪਣੇ ਆਪ ਨੂੰ ਸਥਾਪਿਤ ਕਰ ਲਿਆ।