ਮੋਦੀ ਤੇ ਨਿਤਿਨ ਨਬੀਨ ਵਲੋਂ ਬਾਂਕੀਪੁਰ ਹਾਰ ਬਾਰੇ ਚਰਚਾ ਸੰਬੰਧੀ ਅਟਕਲਾਂ

ਨਵੀਂ ਦਿੱਲੀ, 4 ਅਗਸਤ (ਇੰਟ:)-ਚੱਲ ਰਹੇ ਸੰਸਦ ਇਜਲਾਸ ਦੌਰਾਨ ਰਾਸ਼ਟਰੀ ਲੋਕਤੰਤਰੀ ਗੱਠਜੋੜ (ਐਨ.ਡੀ.ਏ.) ਦੇ ‘ਮੰਗਲ ਮਿਲਾਨ’ ਇਕੱਠ ਤੋਂ ਇਕ ਦਿਲਚਸਪ ਤਸਵੀਰ ਸਾਹਮਣੇ ਆਈ ਹੈ। ਪ੍ਰਧਾਨ ਮੰਤਰੀ ਮੋਦੀ ਨੂੰ ਭਾਜਪਾ ਨੇਤਾ ਨਿਤਿਨ ਨਬੀਨ ਨਾਲ ਗੱਲਬਾਤ ਕਰਦੇ ਦੇਖਿਆ ਗਿਆ। ਹਾਲਾਂਕਿ ਅਜਿਹੀਆਂ ਗੱਲਬਾਤਾਂ ਨੂੰ ਆਮ ਤੌਰ ’ਤੇ ਰੁਟੀਨ ਮੰਨਿਆ ਜਾਂਦਾ ਹੈ ਪਰ ਬਾਂਕੀਪੁਰ ਵਿਧਾਨ ਸਭਾ ਉਪ-ਚੋਣ ਦੇ ਨਤੀਜਿਆਂ ਤੋਂ ਬਾਅਦ ਸਾਹਮਣੇ ਆਈ ਇਸ ਖਾਸ ਤਸਵੀਰ ਨੇ ਇਸ ਬਾਰੇ ਕਿਆਸ ਅਰਾਈਆਂ ਲਗਾਈਆਂ ਹਨ ਕਿ ਕੀ ਦੋਵਾਂ ਨੇਤਾਵਾਂ ਨੇ ਚੋਣ ਨਤੀਜਿਆਂ ’ਤੇ ਚਰਚਾ ਕੀਤੀ। ਭਾਜਪਾ ਨੂੰ ਬਾਂਕੀਪੁਰ ਵਿਚ ਵੱਡੀ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਦੋਂਕਿ ਪ੍ਰਸ਼ਾਂਤ ਕਿਸ਼ੋਰ ਦੀ ਪਾਰਟੀ, ਜਨ ਸੂਰਜ ਨੇ ਬਿਹਾਰ ਵਿਚ ਆਪਣੀ ਪਹਿਲੀ ਜਿੱਤ ਪ੍ਰਾਪਤ ਕੀਤੀ। ਪ੍ਰਧਾਨ ਮੰਤਰੀ ਮੋਦੀ ਅਤੇ ਨਿਤਿਨ ਨਬੀਨ ਤੋਂ ਇਲਾਵਾ, ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਸਮੇਤ ਹੋਰ ਸੀਨੀਅਰ ਨੇਤਾ ‘ਮੰਗਲ ਮਿਲਾਨ’ ਮੀਟਿੰਗ ਵਿਚ ਮੌਜੂਦ ਸਨ।