ਐਮਾਂ ਮਾਂਗਟ, 5 ਫਰਵਰੀ (ਗੁਰਾਇਆ)- ਏ.ਟੀ.ਐਮ. 'ਚੋਂ ਪੈਸੇ ਕਢਵਾਉਣ ਗਏ ਇਕ ਬਜ਼ੁਰਗ ਦਾ ਦੋ ਨੌਜਵਾਨਾਂ ਨੇ ਏ.ਟੀ.ਐਮ. ਕਾਰਡ ਬਦਲ ਕੇ ਉਸ ਦੇ ਖਾਤੇ 'ਚੋਂ 60 ਹਜ਼ਾਰ ਦੇ ਕਰੀਬ ਪੈਸੇ ਕਢਵਾ ਲਏ, ਜਿਸ ਦਾ ਪਤਾ ਲਗਣ 'ਤੇ ਬਜ਼ੁਰਗ ਵਿਅਕਤੀ ਨੇ ਬੈਂਕ ਵਿਚ ਜਾ ਕੇ ਆਪਣੇ ਖਾਤੇ ਨੂੰ ਬੰਦ ਕਰਵਾਇਆ ਅਤੇ ਪੁਲਿਸ ਸਟੇਸ਼ਨ ਵਿਚ ਸ਼ਿਕਾਇਤ ਦਰਜ ਕਰਵਾਈ | ਪੀੜਤ ਜਗਦੀਸ਼ ਸਿੰਘ ਪੁੱਤਰ ਬਲਵੀਰ ਸਿੰਘ ਪਿੰਡ ਭੱਟੀਆਂ ਜੱਟਾਂ ਨੇ ਦੱਸਿਆ ਕਿ ਮੈਂ ਬੀਤੇ ਦਿਨੀਂ ਬੱਸ ਸਟੈਂਡ ਮੁਕੇਰੀਆਂ ਨਜ਼ਦੀਕ ਇਕ ਏ.ਟੀ.ਐਮ. ਵਿਚੋਂ ਪੈਸੇ ਕਢਵਾਉਣ ਲੱਗਾ ਤਾਂ ਪੈਸੇ ਏ.ਟੀ.ਐਮ. ਵਿਚੋਂ ਨਹੀਂ ਨਿਕਲੇ | ਏਨੇ ਚਿਰ ਨੂੰ ਉੱਥੋਂ ਦੋ ਨੌਜਵਾਨ ਆਏ ਜਿਨ੍ਹਾਂ ਨੇ ਮੈਨੂੰ ਉਲਝਣ ਵਿਚ ਪਾ ਦਿੱਤਾ ਅਤੇ ਮੇਰਾ ਉਨ੍ਹਾਂ ਨੇ ਭੁਲੇਖੇ ਦੇ ਨਾਲ ਮੇਰਾ ਏ.ਟੀ.ਐਮ. ਬਦਲ ਦਿੱਤਾ ਗਿਆ | ਥੋੜ੍ਹੀ ਦੇਰ ਬਾਅਦ ਉਸ ਖਾਤੇ ਵਿਚੋਂ ਪੈਸੇ ਨਿਕਲਣੇ ਸ਼ੁਰੂ ਹੋ ਗਏ ਅਤੇ ਜਿਸ ਦੀ ਡਿਟੇਲਜ਼ ਮੇਰੇ ਮੋਬਾਈਲ 'ਤੇ ਆਉਣੀ ਸ਼ੁਰੂ ਹੋ ਗਈ | ਇਸ ਤੋਂ ਬਾਅਦ ਬਜ਼ੁਰਗ ਬੈਂਕ ਵਿਚ ਗਿਆ ਤਾਂ ਦੇਖਿਆ ਕਰੀਬ 60 ਹਜ਼ਾਰ ਰੁਪਏ ਉਨ੍ਹਾਂ ਨੇ ਕਢਵਾ ਲਏ ਸਨ ਜਿਸ ਤੋਂ ਬਾਅਦ ਖਾਤੇ ਤੁਰੰਤ ਬੰਦ ਕਰਵ ਦਿੱਤਾ | ਬਜ਼ੁਰਗ ਜਗਦੀਸ਼ ਸਿੰਘ ਨੇ ਜ਼ਿਲ੍ਹਾ ਪੁਲਿਸ ਮੁਖੀ ਹੁਸ਼ਿਆਰਪੁਰ ਪਾਸੋਂ ਮੰਗ ਕੀਤੀ ਕਿ ਠੱਗੀ ਮਾਰਨ ਵਾਲੇ ਨੌਜਵਾਨਾਂ ਨੂੰ ਕਾਬੂ ਕਰਕੇ ਮੇਰੇ ਪੈਸੇ ਵਾਪਸ ਕਰਵਾਏ ਜਾਣ |