ਹੁਸ਼ਿਆਰਪੁਰ, 5 ਫਰਵਰੀ (ਬਲਜਿੰਦਰਪਾਲ ਸਿੰਘ)-ਵਾਰਡ ਦੇ ਲੋਕਾਂ ਦੀ ਸਹੂਲਤ ਲਈ ਸਰਕਾਰ ਵਲੋਂ ਸ਼ੁਰੂ ਕੀਤੀ ਗਈ ਹੈਲਥ ਇੰਸ਼ੋਰੈਂਸ ਸਕੀਮ ਤਹਿਤ ਕਾਰਡ ਬਣਾਉਣ ਲਈ ਕੌਂਸਲਰ ਪਵਿੱਤਰ ਸਿੰਘ ਲੁਬਾਣਾ ਨੇ ਵਾਰਡ 'ਚ ਇੱਕ ਖਾਸ ਕੈਂਪ ਲਗਾਇਆ ਸੀ ਤਾਂ ਜੋ ਵੱਧ ਤੋਂ ਵੱਧ ਲੋਕਾਂ ਨੂੰ ਇਸ ਯੋਜਨਾ ਦਾ ਲਾਭ ਮਿਲ ਸਕੇ | ਗੱਲਬਾਤ ਕਰਦਿਆ ਕੌਂਸਲਰ ਲੁਬਾਣਾ ਨੇ ਦੱਸਿਆ ਕਿ ਕੈਂਪ ਦੌਰਾਨ ਕੁਝ ਸ਼ਰਾਰਤੀ ਅਨਸਰਾਂ ਅਤੇ ਉਨ੍ਹਾਂ ਦੇ ਸਾਥੀਆਂ ਵਲੋਂ ਕੈਂਪ 'ਚ ਆਈ ਟੀਮ ਦੇ ਪੋਰਟਲ ਬੰਦ ਕਰਵਾ ਦਿੱਤੇ ਗਏ, ਜਿਸ ਕਾਰਨ ਵਾਰਡ ਦੇ ਲੋਕਾਂ ਦੇ ਕਾਰਡ ਬਣਨ 'ਚ ਵੱਡੀ ਰੁਕਾਵਟ ਪੈਦਾ ਹੋਈ | ਇਸ ਤੋਂ ਵੀ ਵੱਧ ਦੁਖਦਾਈ ਗੱਲ ਇਹ ਹੈ ਕਿ ਉੱਥੇ ਮੌਜੂਦ ਲੋਕਾਂ ਨੂੰ ਇਹ ਕਿਹਾ ਗਿਆ ਕਿ ਕਾਰਡ ਸਿਰਫ ਪਾਰਟੀ ਦੇ ਬੰਦਿਆਂ ਕੋਲੋਂ ਹੀ ਬਣਵਾਏ ਜਾਣ, ਜੋ ਕਿ ਸਰਕਾਰ ਦੀ ਲੋਕ-ਹਿਤੈਸ਼ੀ ਸਕੀਮ ਦਾ ਸਿਆਸੀਕਰਨ ਕਰਨ ਦੇ ਬਰਾਬਰ ਹੈ |