ਰਾਏਕੋਟ, 5 ਜਨਵਰੀ (ਬਲਵਿੰਦਰ ਸਿੰਘ ਲਿੱਤਰ)-ਟਰੱਕ ਡਰਾਈਵਰ ਧੋਖੇ ਨਾਲ ਸਰੀਏ ਨਾਲ ਲੋਡ ਟਰੱਕ ਨੂੰ ਭਜਾਉਣ ਵਿਚ ਕਾਮਯਾਬ ਹੋਇਆ ਸੀ, ਜਿਸਨੂੰ ਪੁਲਿਸ ਪ੍ਰਸ਼ਾਸਨ ਨੇ 5 ਮਹੀਨਿਆਂ ਦੀ ਭਾਰੀ ਜੱਦੋ-ਜਹਿਦ ਦੇ ਬਾਅਦ ਯੂ.ਪੀ. ਤੋਂ ਉਕਤ ਟਰੱਕ ਨੂੰ ਸਰੀਏ ਸਮੇਤ ਭਜਾਉਣ ਵਾਲੇ ਡਰਾਈਵਰ ਨੂੰ ਕਾਬੂ ਕੀਤਾ | ਇਸ ਮਾਮਲੇ ਬਾਰੇ ਜਾਣਕਾਰੀ ਦਿੰਦਿਆਂ ਪੁਲਿਸ ਥਾਣਾ ਸਿਟੀ ਰਾਏਕੋਟ ਦੇ ਐੱਸ.ਐੱਚ.ਓ ਗੁਰਸੇਵਕ ਸਿੰਘ ਨੇ ਦੱਸਿਆ ਕਿ ਟਰੱਕ ਮਾਲਕ ਬਲਜੀਤ ਸਿੰਘ ਵਾਸੀ ਤਾਜਪੁਰ ਨੇ ਪੁਲਿਸ ਕੋਲ ਰਿਪੋਰਟ ਦਰਜ਼ ਕਰਵਾਈ ਸੀ ਕਿ ਉਸਦਾ ਟਰੱਕ ਪੀ.ਬੀ. 10 ਐੱਚ.ਯੂ. 9791, ਜਿਸ ਵਿਚ ਸਰੀਆ ਲੋਡ ਸੀ, ਉਕਤ ਟਰੱਕ 14 ਅਗਸਤ 2025 ਨੂੰ ਝੱਜ ਮੋਟਰਜ਼ ਗੋਂਦਵਾਲ ਵਿਖੇ ਪਾਰਕ ਕੀਤਾ ਗਿਆ ਸੀ | ਜਿਸ ਟਰੱਕ ਨੂੰ ਉਸ ਦਾ ਡਰਾਈਵਰ ਪੁਸ਼ਪਿੰਦਰ ਕੁਮਾਰ ਪੁੱਤਰ ਸ਼ਿਆਮ ਪਾਲ ਵਾਸੀ-ਨਗਲਾ ਬੈਂਸ, ਜ਼ਿਲ੍ਹਾ ਅਟਵਾ (ਯੂਪੀ) ਸਰੀਏ ਸਮੇਤ ਲੈ ਕੇ ਫ਼ਰਾਰ ਹੋ ਗਿਆ ਹੈ | ਜਿਸ 'ਤੇ ਪੁਲਿਸ ਵਲੋਂ 16 ਅਕਤੂਬਰ 2025 ਨੂੰ ਅਪਰਾਧ ਦੀ ਧਾਰਾ 316 (2) ਤਹਿਤ ਮੁਕੱਦਮਾ ਦਰਜ ਕੀਤਾ ਗਿਆ ਸੀ | ਐੱਸ.ਐੱਚ.ਓ. ਗੁਰਸੇਵਕ ਸਿੰਘ ਨੇ ਦੱਸਿਆ ਕਿ ਪੁਲਿਸ ਜ਼ਿਲ੍ਹਾ ਲੁਧਿਆਣਾ (ਦਿਹਾਤੀ) ਦੇ ਐੱਸ.ਐੱਸ.ਪੀ. ਡਾ.ਅੰਕੁਰ ਗੁਪਤਾ ਦੇ ਦਿਸ਼ਾ-ਨਿਰਦੇਸ਼ਾਂ ਹੇਠ ਸਬ-ਡਵੀਜ਼ਨ ਰਾਏਕੋਟ ਦੇ ਡੀ.ਐੱਸ.ਪੀ ਹਰਜਿੰਦਰ ਸਿੰਘ ਵਲੋਂ ਟੀਮ ਨਿਯੁਕਤ ਕਰਕੇ ਉਕਤ ਟਰੱਕ ਦੀ ਭਾਲ ਲਈ ਜਾਂਚ ਪੜਤਾਲ ਸ਼ੁਰੂ ਕੀਤੀ ਗਈ ਸੀ | ਜਿਸ ਤਹਿਤ ਪੁਲਿਸ ਨੂੰ ਖ਼ਾਸ ਮੁਖਬਰ ਨੇ ਇਤਲਾਹ ਦਿੱਤੀ ਕਿ ਚੋਰੀ ਹੋਇਆ ਟਰੱਕ ਸਮੇਤ ਸਰੀਆ ਯੂਪੀ ਦੇ ਜ਼ਿਲ੍ਹਾ ਹਾਥਰਸ ਵਿਖੇ ਕਿਸੇ ਸਥਾਨ 'ਤੇ ਖੜ੍ਹਾ ਹੈ | ਜੇਕਰ ਇਸ ਸਥਾਨ 'ਤੇ ਪੁਲਿਸ ਰੇਡ ਕਰਦੀ ਹੈ ਤਾਂ ਉਕਤ ਟਰੱਕ ਨੂੰ ਲੋਡ ਸਰੀਏ ਸਮੇਤ ਬਰਾਮਦ ਕੀਤਾ ਜਾ ਸਕਦਾ ਹੈ | ਜਿਸ 'ਤੇ ਕਰਵਾਈ ਕਰਦਿਆਂ ਏ.ਐੱਸ.ਆਈ ਗੁਰਪ੍ਰੀਤ ਸਿੰਘ ਤੇ ਹੈੱਡ ਕਾਂਸਟੇਬਲ ਗੁਰਮੀਤ ਸਿੰਘ ਤੇ ਸਿਪਾਹੀ ਵਰਿੰਦਰਪਾਲ ਸਿੰਘ ਵਲੋਂ ਯੂਪੀ ਵਿਖੇ ਉਕਤ ਸਥਾਨ 'ਤੇ ਜਾ ਕਰਕੇ ਟਰੱਕ ਨੂੰ ਬਰਾਮਦ ਕੀਤਾ ਗਿਆ | ਜਿਸ ਦੇ ਬਾਅਦ ਪੁਲਿਸ ਥਾਣਾ ਸਦਰ ਰਾਏਕੋਟ ਵਿਖੇ ਧਾਰਾ 317 (2) ਬੀ.ਐੱਨ.ਐਸ ਤਹਿਤ ਜ਼ੁਰਮ ਵਿਚ ਵਾਧਾ ਕੀਤਾ ਗਿਆ ਹੈ | ਉਕਤ ਕਾਬੂ ਕੀਤੇ ਡਰਾਈਵਰ ਨੂੰ ਮਾਣਯੋਗ ਅਦਾਲਤ ਵਿਚ ਪੇਸ਼ ਕਰਕੇ ਉਸਦਾ 2 ਦਿਨਾਂ ਰਿਮਾਂਡ ਹਾਸਲ ਕੀਤਾ ਗਿਆ ਹੈ ਤਾਂ ਜੋ ਚੋਰੀ ਦੇ ਮਾਮਲੇ ਸੰਬੰਧੀ ਹੋਰ ਪੁੱਛਗਿੱਛ ਕੀਤੀ ਜਾ ਸਕੇ |