ਜਗਰਾਉਂ, 24 ਫਰਵਰੀ (ਸ਼ਮਸ਼ੇਰ ਸਿੰਘ ਗਾਲਿਬ)-ਜਗਰਾਉਂ ਦਾ ਪ੍ਰਸਿੱਧ ਰੋਸ਼ਨੀ ਮੇਲਾ ਅੱਜ ਸ਼ੁਰੂ ਹੋ ਗਿਆ | ਪਹਿਲੇ ਦਿਨ ਪੀਰ ਬਾਬਾ ਮੋਹਕਮਦੀਨ ਦੀ ਦਰਗਾਹ 'ਤੇ ਹਜ਼ਾਰਾਂ ਗਿਣਤੀ 'ਚ ਸੰਗਤਾਂ ਨੇ ਨਤਮਸਤਕ ਹੋਣ ਲਈ ਲਾਈਨਾਂ ਲੱਗੀਆਂ ਹੋਈਆਂ ਸਨ | ਇਸ ਮੌਕੇ ਪੀਰ ਦੀ ਦਰਗਾਹ 'ਤੇ ਸੰਗਤਾਂ ਨੇ ਚਾਦਰ ਚੜ੍ਹਾ ਕੇ ਸਿਜਦਾ ਕੀਤਾ | ਇਸ ਮੌਕੇ ਦਰਗਾਹ ਦੇ ਮੁੱਖ ਸੇਵਾਦਾਰ ਬਾਬਾ ਨੂਰਦੀਨ ਨੇ ਕਿਹਾ ਕਿ ਅੱਜ ਉੱਤਰੀ ਭਾਰਤ ਦੇ ਵੱਖ-ਵੱਖ ਰਾਜਾਂ ਤੋਂ ਵੱਡੀ ਗਿਣਤੀ 'ਚ ਸੰਗਤਾਂ ਪੁੱਜੀਆਂ | ਉਨ੍ਹਾਂ ਕਿਹਾ ਕਿ ਤਿੰਨ ਦਿਨ ਲੋਕ ਦਰਗਾਹ 'ਤੇ ਚੌਂਕੀ ਭਰਦੇ ਹਨ ਅਤੇ ਅੱਜ ਪਹਿਲੇ ਦਿਨ ਲੋਕਾਂ ਨੇ ਚੌਂਕੀਆਂ ਭਰੀਆਂ | ਮੇਲੇ ਨੂੰ ਮੁੱਖ ਰੱਖਦਿਆਂ ਬਜ਼ਾਰਾਂ 'ਚ ਰੌਣਕਾਂ ਰਹੀਆਂ ਅਤੇ ਵੱਖ-ਵੱਖ ਦੁਕਾਨਾਂ 'ਤੇ ਲੋਕ ਖ਼ਰੀਦੋ-ਫਰੋਖ਼ਤ ਕਰਦੇ ਦਿਖੇ | ਹਰ ਵਰਗ ਦੇ ਲੋਕ ਸਜ-ਧਜ ਦੇ ਬਜ਼ਾਰਾਂ 'ਚ ਦਿਸ ਰਹੇ ਹਨ | ਮੇਲੇ ਦੌਰਾਨ ਲੱਗੇ ਝੂਲਿਆਂ, ਚੰਡੋਲਾਂ, ਸਰਕਸਾਂ ਆਦਿ ਦਾ ਲੋਕਾਂ ਨੇ ਅਨੰਦ ਮਾਣ ਰਹੇ ਸਨ | ਮੇਲੇ ਦੇ ਮੱਦੇਨਜ਼ਰ ਲੁਧਿਆਣਾ ਦਿਹਾਤੀ ਪੁਲਿਸ ਵਲੋਂ ਪੁਖਤਾ ਪ੍ਰਬੰਧ ਕੀਤੇ ਹੋਏ ਹਨ ਅਤੇ ਬਜ਼ਾਰਾਂ 'ਚ ਗੱਡੀਆਂ ਜਾਣ ਦੀ ਰੋਕ ਲਗਾਈ ਹੋਈ ਹੈ ਤਾਂ ਜੋ ਟ੍ਰੈਫ਼ਿਕ ਜਾਮ ਦੀ ਸਮੱਸਿਆ ਨਾ ਆਵੇ |
