ਮੁਕੰਦਪੁਰ, 1 ਮਈ (ਅਮਰੀਕ ਸਿੰਘ ਢੀਂਡਸਾ) - ਸਰਕਾਰੀ ਫਰਮਾਨਾ ਅਨੁਸਾਰ ਪਹਿਲੀ ਅਪ੍ਰੈਲ ਤੋਂ ਕਣਕ ਦੀ ਖਰੀਦ ਸ਼ੁਰੂ ਨਾ ਹੋਣ ਕਰਕੇ ਬਹੁਤ ਸਾਰੀਆਂ ਮੰਡੀਆਂ ਵਿੱਚ 14 ਅਪ੍ਰੈਲ ਤੋਂ ਬਾਅਦ ਖਰੀਦ ਹੋਣੀ ਸ਼ੁਰੂ ਹੋਈ ਅਤੇ ਸਰਕਾਰ ਵੱਲੋਂ 24 ਘੰਟਿਆਂ 'ਚ ਅਦਾਇਗੀ ਦੇ ਦਮਗਜ਼ੇ ਵੀ ਹਵਾ ਵਿੱਚ ਹੀ ਰਹਿ ਗਏ ਜਦ ਕਿ ਬਹੁਤ ਸਾਰੇ ਕਿਸਾਨ 15 ਦਿਨ ਤੋਂ ਪਰਚੇਜ ਹੋਈ ਹੋਣ ਦੇ ਬਾਵਜੂਦ ਵੀ ਆੜਤੀਆਂ ਕੋਲ ਪੈਸਿਆਂ ਲਈ ਪੁੱਛ ਪੜਤਾਲ ਕਰ ਰਹੇ ਹਨ ਕਿ ਸਾਡੇ ਖਾਤਿਆਂ ਵਿੱਚ ਅਜੇ ਪੈਸੇ ਕਿਉਂ ਨਹੀਂ ਆਏ | ਦੂਸਰੇ ਪਾਸੇ ਕਣਕ ਦਾ ਸੀਜਨ ਸਮਾਪਤ ਹੋ ਚੁੱਕਾ, ਕਮਾਦ ਦੇ ਮੋਢਿਆਂ ਨੂੰ ਕੱਟ ਕੇ ਬੀਜੇ ਖੇਤ ਅਜੇ ਇੱਕ ਦੋ ਦਿਨਾਂ 'ਚ ਵੱਢ ਹੋਣ ਦਾ ਇੰਤਜ਼ਾਰ ਕਰ ਰਹੇ ਹਨ ਲੇਕਿਨ ਮੁਕੰਦਪੁਰ ਮੰਡੀ ਵਿਖੇ ਪਨਗਰੇਨ ਵੱਲੋਂ ਖਰੀਦੀ 97738 ਬੋਰਿਆਂ ਵਿੱਚੋਂ ਸਿਰਫ 22738 ਅਤੇ ਐਫ.ਸੀ.ਆਈ ਦੁਆਰਾ ਖਰੀਦੀ 72723 ਚੋਂ ਸਿਰਫ 16000 ਕੱਟਾ ਹੀ ਚੁੱਕਿਆ ਜਾ ਸਕਿਆ ਜਦ ਕਿ 1 ਲੱਖ 31 ਹਜ਼ਾਰ ਕੱਟਾ ਮੰਡੀ ਵਿੱਚ ਖੁੱਲੇ ਅਸਮਾਨ ਹੇਠ ਪਿਆ | ਜਿਸ ਨਾਲ ਆੜਤੀਆਂ ਦੀਆਂ ਚਿੰਤਾਵਾਂ ਵਧੀਆ ਹੋਈਆਂ ਹਨ, ਉਹਨਾਂ ਦਾ ਕਹਿਣਾ ਹੈ ਕਿ ਮਜ਼ਦੂਰ ਕੰਮ ਨਿਬੇੜ ਕੇ ਵਾਪਸ ਆਪਣੇ ਰਾਜਾਂ ਨੂੰ ਜਾਣ ਲਈ ਉਤਾਵਲੇ ਹਨ ਜਦਕਿ ਸਰਕਾਰ ਵੱਲੋਂ ਖਰੀਦੀ ਹੋਈ ਕਣਕ ਚੁੱਕਣ ਲਈ ਕੋਈ ਯਤਨ ਨਹੀਂ ਕੀਤੇ ਜਾ ਰਹੇ ਖੁੱਲ੍ਹੇ ਅਸਮਾਨ ਹੇਠ ਪਈ ਕਣਕ ਦੀਆਂ ਬੋਰੀਆਂ ਖਰਾਬ ਮੌਸਮ ਹੋਣ 'ਤੇ ਨੁਕਸਾਨੀਆਂ ਵੀ ਜਾ ਸਕਦੀਆਂ ਹਨ ਜਿਸ ਦਾ ਖਮਿਆਜਾ ਤੇ ਹਰਜਾਨਾ ਆੜਤੀਆਂ ਨੂੰ ਭੁਗਤਣਾ ਪਵੇਗਾ ਤੇ ਨਾਲ ਹੀ ਮਜ਼ਦੂਰਾਂ ਵੱਲੋਂ ਇਹ ਦੁਹਾਈ ਪਾਈ ਜਾ ਰਹੀ ਹੈ ਕਿ ਸਾਡੇ ਕੋਲ ਕੰਮ ਨਹੀਂ ਸਰਕਾਰ ਖਰੀਦਿਆ ਹੋਇਆ ਅਨਾਜ ਜਲਦੀ ਚੁਕਾਵੇ ਤੇ ਸਾਡਾ ਹਿਸਾਬ ਹੋਵੇ ਫਿਰ ਅਸੀਂ ਆਪਣੇ ਪਰਿਵਾਰਾਂ ਵਿੱਚ ਜਾ ਸਕੀਏ | ਪਨਗਰੇਨ ਦੇ ਇੰਸਪੈਕਟਰ ਦੌਲਤ ਭਾਟੀਆ ਵਲੋਂ ਪੁੱਛਣ 'ਤੇ ਦੱਸਿਆ ਕਿ ਇਸ ਵਾਰ ਖਰੀਦੀ ਹੋਈ ਕਣਕ ਪੰਜਾਬ ਦੇ ਗੁਦਾਮਾਂ ਵਿੱਚ ਰੱਖਣ ਦੀ ਬਜਾਏ ਮਾਲ ਗੱਡੀਆਂ ਰਾਹੀਂ ਸਿੱਧੀ ਸੈਂਟਰ ਪੂਲ ਵਿੱਚ ਜਾ ਰਹੀ ਹੈ ਜਿਸ ਕਰਕੇ ਥੋੜੀ ਦਿਕੱਤ ਆਉਂਦੀ ਹੈ ਉਹਨਾਂ ਮੰਨਿਆ ਕਿ ਲਿਫਟਿੰਗ ਦੀ ਰਫਤਾਰ ਥੋੜੀ ਮੱਧਮ ਜਰੂਰ ਹੈ ਪ੍ਰੰਤੂ ਆਉਣ ਵਾਲੇ ਦਿਨਾਂ ਵਿੱਚ ਜ਼ਿਆਦਾ ਗੱਡੀਆਂ ਕਣਕ ਚੁਕਾਈ ਲਈ ਆ ਰਹੀਆਂ ਹਨ ਜਿਸ ਨਾਲ ਅਗਲੇ ਹਫਤੇ ਮੰਡੀਆਂ ਵਿੱਚੋਂ ਕਣਕ ਦੀ ਚੁਕਾਈ ਦਾ ਕੰਮ ਬਿਲਕੁਲ ਮੁਕੰਮਲ ਕਰ ਲਿਆ ਜਾਵੇਗਾ |
