ਸਾਉਣੀ ਦੀ ਮੁੱਖ ਫ਼ਸਲ ਝੋਨੇ ਦੀ ਲਵਾਈ ਦਾ ਕੰਮ ਜੋਰ-ਸ਼ੋਰ ਨਾਲ ਸ਼ੁਰੂ

ਮੁਕੰਦਪੁਰ, 9 ਜੂਨ (ਅਮਰੀਕ ਸਿੰਘ ਢੀਂਡਸਾ)-ਸੌਣੀ 'ਚ ਝੋਨਾ ਲਗਾਉਣ ਦੀ ਤੀਸਰੇ ਪੜਾ ਲਈ ਨਿਰਧਾਰਤ ਕੀਤੀ ਤਰੀਕ 9 ਜੂਨ ਨੂੰ ਖੇਤੀ ਸੈਕਟਰ ਲਈ ਬਿਜਲੀ ਦੀ ਸਪਲਾਈ ਨਿਰੰਤਰ 8 ਘੰਟੇ ਦੇਣ ਨਾਲ ਇਲਾਕੇ 'ਚ ਝੋਨਾ ਲਗਾਉਣ ਲਈ ਕੱਦੂ ਕਰਨ ਦਾ ਕੰਮ ਜੋਰਾਂ-ਸ਼ੋਰਾਂ ਨਾਲ ਕਿਸਾਨਾਂ ਵਲੋਂ ਆਰੰਭ ਦਿੱਤਾ ਗਿਆ | ਭਾਵੇਂ ਕਿ ਕਿਸਾਨਾਂ ਵਲੋਂ ਕੁੱਝ ਦਿਨ ਪਹਿਲਾਂ ਹੀ ਖੇਤਾਂ ਵਿੱਚ ਪਾਣੀ ਲਗਾਉਣਾ ਸ਼ੁਰੂ ਕਰ ਦਿੱਤਾ ਸੀ, ਪ੍ਰੰਤੂ ਸਰਕਾਰ ਵੱਲੋਂ ਨਿਰਧਾਰਤ 9 ਜੂਨ ਤੋਂ ਅੱਠ ਘੰਟੇ ਨਿਰਵਿਗਨ ਸਪਲਾਈ ਮਿਲਣ ਦੀ ਉਡੀਕ ਖਤਮ ਹੋਣ 'ਤੇ ਕਿਸਾਨਾਂ ਵਲੋਂ ਖੇਤਾਂ ਵਿਚ ਝੋਨਾ ਲਗਾਉਣ ਲਈ ਕੱਦੂ ਕਰਨਾ ਸ਼ੁਰੂ ਕਰ ਦਿੱਤਾ | ਬੇਸ਼ੱਕ ਅਜੇ ਝੋਨਾ ਲਗਾਉਣ ਲਈ ਪ੍ਰਵਾਸੀ ਮਜ਼ਦੂਰਾਂ ਦੀ ਘਾਟ ਰੜਕ ਰਹੀ ਹੈ, ਫਿਰ ਵੀ ਕਿਸਾਨ ਆਪਣੀ ਫਸਲ ਦੀ ਸਮੇਂ ਸਿਰ ਲਵਾਈ ਕਰਵਾਉਣ ਲਈ ਖੇਤਾਂ ਵਿੱਚ ਸਖਤ ਗਰਮੀ ਅਤੇ ਵੱਗਦੀ ਲੂ ਵਿੱਚ ਕੱਦੂ ਬੜੇ ਉਤਸ਼ਾਹ ਨਾਲ ਕਰ ਰਹੇ ਹਨ |