ਫ਼ਤਹਿਗੜ੍ਹ ਸਾਹਿਬ, 20 ਫਰਵਰੀ (ਮਨਪ੍ਰੀਤ ਸਿੰਘ)-ਰਿਮਟ ਯੂਨੀਵਰਸਿਟੀ ਦੇ ਇਲੈਕਟ੍ਰੀਕਲ ਇਲੈਕਟ੍ਰਾਨਿਕਸ ਅਤੇ ਸੰਚਾਰ ਇੰਜੀਨੀਅਰਿੰਗ ਵਿਭਾਗ ਨੇ ਵੰਡਰ ਸਿਸਟਮਜ਼ ਇੰਡੀਆ ਪ੍ਰਾਈਵੇਟ ਲਿਮਟਿਡ ਮੋਹਾਲੀ ਦੇ ਸਹਿਯੋਗ ਨਾਲ ਫ਼ੈਕਟਰੀ ਆਈਓ ਦੀ ਵਰਤੋਂ ਕਰਦੇ ਹੋਏ ਉਦਯੋਗਿਕ ਆਟੋਮੇਸ਼ਨ 'ਤੇ ਇਕ ਰੋਜ਼ਾ ਵਰਕਸ਼ਾਪ ਕਰਵਾਈ | ਜਿਸ ਦਾ ਉਦੇਸ਼ ਵਿਦਿਆਰਥੀਆਂ ਦੀ ਉਦਯੋਗਿਕ ਆਟੋਮੇਸ਼ਨ ਅਤੇ ਸਮਾਰਟ ਨਿਰਮਾਣ ਤਕਨਾਲੋਜੀਆਂ ਵਿਚ ਵਿਹਾਰਕ ਯੋਗਤਾਵਾਂ ਨੂੰ ਵਧਾਉਣਾ ਸੀ | ਇਸ ਮੌਕੇ ਅੱਜ ਦੇ ਗਤੀਸ਼ੀਲ ਉਦਯੋਗਿਕ ਵਾਤਾਵਰਨ ਪ੍ਰਣਾਲੀ ਵਿਚ ਆਟੋਮੇਸ਼ਨ ਅਤੇ ਡਿਜੀਟਲ ਨਿਰਮਾਣ ਦੀ ਵੱਧਦੀ ਮਹੱਤਤਾ ਬਾਰੇ ਚਰਚਾ ਕਰਦਿਆਂ ਉਨ੍ਹਾਂ ਨੇ ਹੁਨਰ-ਮੁਖੀ ਅਤੇ ਅਨੁਭਵੀ ਪਹਿਲਕਦਮੀਆਂ ਰਾਹੀਂ ਅਕਾਦਮਿਕ ਸਿੱਖਿਆ ਤੇ ਉਦਯੋਗ ਦੀਆਂ ਉਮੀਦਾਂ ਵਿਚਕਾਰ ਪਾੜੇ ਨੂੰ ਪੂਰਾ ਕਰਨ ਲਈ ਯੂਨੀਵਰਸਿਟੀ ਦੀ ਵਚਨਬੱਧਤਾ ਨੂੰ ਦੁਹਰਾਇਆ | ਪ੍ਰੋ-ਚਾਂਸਲਰ (ਅਕਾਦਮਿਕ) ਡਾ. ਬੀ.ਐਸ. ਭਾਟੀਆ, ਪ੍ਰੋ.ਵਾਈਸ ਚਾਂਸਲਰ ਡਾ. ਐਸ.ਸੀ. ਸ਼ਰਮਾ, ਉਪ ਕੁਲਪਤੀ ਡਾ. ਭੁਪਿੰਦਰ ਸਿੰਘ ਬਰਾੜ ਅਤੇ ਰਜਿਸਟਰਾਰ ਰਾਕੇਸ਼ ਮੋਹਨ ਦਾ ਇਸ ਮੌਕੇ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ | ਡੀਨ ਅਕਾਦਮਿਕ ਡਾ. ਕਾਰਤਿਕ ਕੇ. ਗੁਪਤਾ ਨੇ ਅਨੁਭਵੀ ਸਿਖਲਾਈ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ | ਉਨ੍ਹਾਂ ਕਿਹਾ ਕਿ ਤਕਨੀਕੀ ਯੋਗਤਾਵਾਂ ਨੂੰ ਨਿਰੰਤਰ ਪੇਸ਼ੇਵਾਰ ਵਿਕਾਸ ਨੂੰ ਯਕੀਨੀ ਬਣਾਉਣ ਲਈ ਹੱਥੀਂ ਮੁਹਾਰਤ ਨਾਲ ਪੂਰਕ ਕੀਤਾ ਜਾਣਾ ਚਾਹੀਦਾ ਹੈ | ਵੈਂਡਰ ਸਿਸਟਮਜ਼ ਇੰਡੀਆ ਪ੍ਰਾਈਵੇਟ ਲਿਮਟਿਡ ਦੇ ਉਦਯੋਗ ਮਾਹਿਰਾਂ ਵਲੋਂ ਤਕਨੀਕੀ ਸੈਸ਼ਨ ਕਰਵਾਏ ਗਏ | ਮੁੱਖ ਬੁਲਾਰੇ ਰਾਜਿੰਦਰ ਕੌਰ ਨੇ ਗਲੋਬਲ ਨਿਰਮਾਣ ਵਿਚ ਉੱਭਰ ਰਹੇ ਆਟੋਮੇਸ਼ਨ ਰੁਝਾਨਾਂ 'ਤੇ ਚਰਚਾ ਕੀਤੀ | ਬਾਅਦ ਵਿਚ ਰਵੀ ਦੀ ਅਗਵਾਈ ਵਿਚ ਇਕ ਤੀਬਰ ਹੱਥੀਂ ਸਿਖਲਾਈ ਸੈਸ਼ਨ ਹੋਇਆ, ਜਿੱਥੇ ਵਿਦਿਆਰਥੀਆਂ ਨੇ ਵਰਚੂਅਲ ਉਦਯੋਗਿਕ ਵਾਤਾਵਰਨਾਂ ਨੂੰ ਡਿਜ਼ਾਈਨ ਅਤੇ ਨਿਯੰਤਰਨ ਕਰਨ ਲਈ ਫ਼ੈਕਟਰੀ ਆਈਓ ਸਿਮੂਲੇਸ਼ਨ ਪਲੇਟਫ਼ਾਰਮ ਦੀ ਵਰਤੋਂ ਕੀਤੀ, ਪੀ.ਐਲ.ਸੀ., ਐਚ.ਐਮ.ਆਈ. ਅਤੇ ਐਸ.ਸੀ.ਏ.ਡੀ.ਏ. ਆਧਾਰਿਤ ਆਟੋਮੇਸ਼ਨ ਪ੍ਰਣਾਲੀਆਂ ਦਾ ਵਿਹਾਰਕ ਸੰਪਰਕ ਪ੍ਰਾਪਤ ਕੀਤਾ |
