ਸੰਘੋਲ, 2 ਮਈ (ਪਰਮਵੀਰ ਸਿੰਘ ਧਨੋਆ)-ਖੇਤਰ ਦੀਆਂ ਦਾਣਾ ਮੰਡੀਆਂ 'ਚੋਂ ਕਣਕ ਦੀ ਬੋਰੀਆਂ ਚੋਰੀ ਹੋਣ ਦਾ ਮਾਮਲਾ ਚਰਚਾ ਵਿਚ ਆਇਆ ਹੋਇਆ ਹੈ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਮਾਮਲੇ 'ਚ ਸਰਗਰਮ ਚੋਰ ਗਿਰੋਹ ਦੋ ਪਹੀਆ ਜਾਂ ਹੋਰਨਾਂ ਵਾਹਨਾਂ 'ਤੇ ਕਣਕ ਦੇ ਭਰੇ ਬੋਰੇ ਲੱਦ ਕੇ ਸਕਿੰਟਾਂ 'ਚ ਫ਼ਰਾਰ ਹੋ ਜਾਂਦੇ ਹਨ | ਦੱਸਿਆ ਜਾਂਦਾ ਹੈ ਕਿ ਮੋਟਰਸਾਈਕਲ ਸਵਾਰ ਮੂੰਹ ਬੰਨ੍ਹ ਕੇ ਮੰਡੀ ਵਿਚ ਘੁੰਮਦੇ ਰਹਿੰਦੇ ਹਨ ਅਤੇ ਮੌਕਾ ਵੇਖ ਦਾਅ ਲਗਾ ਕਣਕ ਦੇ ਗੱਟੇ ਚੁੱਕ ਫ਼ਰਾਰ ਹੋ ਜਾਂਦੇ ਹਨ | ਮਾਮਲੇ ਬਾਰੇ ਸੰਪਰਕ ਕਰਨ 'ਤੇ ਆੜ੍ਹਤੀਆਂ ਨੇ ਚੋਰੀ ਦੀਆਂ ਘਟਨਾਵਾਂ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਉਨ੍ਹਾਂ ਲਈ ਹਾਲਾਤ ਪ੍ਰੇਸ਼ਾਨੀ ਵਾਲੇ ਬਣ ਗਏ ਹਨ | ਕਣਕ ਦੀਆਂ ਬੋਰੀਆਂ ਦੀ ਹਰ ਵੇਲੇ ਰਾਖੀ ਕਰਨਾ ਔਖਾ ਕੰਮ ਹੈ | ਜੇਕਰ ਕਿਸੇ ਨੂੰ ਫੜ੍ਹਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ ਤਾਂ ਚੋਰਾਂ ਦੇ ਹਥਿਆਰ ਬੰਦ ਹੋਣ ਦੇ ਅੰਦੇਸ਼ੇ ਕਾਰਨ ਖ਼ਤਰਾ ਬਣਿਆ ਰਹਿੰਦਾ ਹੈ | ਮਸਲੇ ਸਬੰਧੀ ਥਾਣਾ ਮੁਖੀ ਖਮਾਣੋਂ ਸੁਰੇਸ਼ ਕੁਮਾਰ ਨੇ ਸੰਪਰਕ ਕਰਨ 'ਤੇ ਕਿਹਾ ਕਿ ਉਨ੍ਹਾਂ ਕੋਲ ਦਾਣਾ ਮੰਡੀਆਂ 'ਚੋਂ ਕਣਕ ਚੋਰੀ ਹੋਣ ਬਾਰੇ ਕਿਸੇ ਕਿਸਮ ਦੀ ਕੋਈ ਜਾਣਕਾਰੀ ਨਹੀਂ ਪਹੁੰਚੀ ਹੈ | ਉਨ੍ਹਾਂ ਕਿਹਾ ਕਿ ਦਾਣਾ ਮੰਡੀਆਂ 'ਚ ਪੁਲਿਸ ਪੈਟਰੋਲਿੰਗ ਟੀਮਾਂ ਨੂੰ ਮਾੜੇ ਅਨਸਰਾਂ ਦੀ ਨਿਗਰਾਨੀ ਕਰਨ ਲਈ ਲੱਗਾ ਦਿੱਤਾ ਜਾਵੇਗਾ |
