ਗੁਰਦਾਸਪੁਰ / ਬਟਾਲਾ / ਪਠਾਨਕੋਟ

ਨਗਰ ਨਿਗਮ ਦੀ ਹਦੂਦ 'ਚ ਨਾਜਾਇਜ਼ ਉਸਾਰੀਆਂ ਦੀ ਭਰਮਾਰ

ਮਾਮੂਨ ਵਿਖੇ ਆਰਮੀ ਦੇ ਪਾਬੰਦੀਸ਼ੁਦਾ ਇਲਾਕੇ 'ਚ ਬਿਨ੍ਹਾਂ ਨਕਸ਼ਾ ਤੇ ਬਿਨਾਂ ਐਨ.ਓ.ਸੀ. ਤਿਆਰ 3 ਮੰਜ਼ਿਲਾਂ ਇਮਾਰਤ | ਤਸਵੀਰਾਂ: ਆਸ਼ੀਸ਼ ਸ਼ਰਮਾ ਬਿਲਡਿੰਗ ਬਰਾਂਚ ਦਾ ਨੋਟਿਸ ਪਾੜ ਕੇ ਰਾਤੋ-ਰਾਤ ਪਾਇਆ ਦੁਕਾਨਦਾਰ ਲੈਂਟਰ | ਬਿਲਡਿੰਗ ਬਰਾਂਚ ਵਲੋਂ ਨਾਜਾਇਜ਼ ਉਸਾਰੀ ਜਾ ਰਹੀ ਦੁਕਾਨ 'ਤੇ ਲਗਾਇਆ ਗਿਆ ਨੋਟਿਸ | 25-02-2026

ਪਠਾਨਕੋਟ, 24 ਫਰਵਰੀ (ਆਸ਼ੀਸ਼ ਸ਼ਰਮਾ)-ਸਥਾਨਕ ਨਗਰ ਨਿਗਮ ਦੀ ਹਦੂਦ ਅੰਦਰ ਪਿਛਲੇ ਕੁਝ ਸਮੇਂ ਤੋਂ ਨਾਜਾਇਜ਼ ਉਸਾਰੀਆਂ ਦਾ ਸਿਲਸਿਲਾ ਬੇਰੋਕ ਜਾਰੀ ਹੈ | ਸ਼ਹਿਰ ਦੇ ਵੱਖ-ਵੱਖ ਵਾਰਡਾਂ ਤੇ ਵਪਾਰਕ ਖੇਤਰਾਂ 'ਚ ਬਿਨ੍ਹਾਂ ਨਕਸ਼ਾ ਪਾਸ ਕਰਵਾਏ ਕਈ ਇਮਾਰਤਾਂ ਉਸਾਰੀਆਂ ਜਾ ਰਹੀਆਂ ਹਨ | ਜਿਸ ਕਾਰਨ ਨਗਰ ਨਿਗਮ ਦੇ ਖ਼ਜ਼ਾਨੇ ਨੂੰ ਲੱਖਾਂ ਦਾ ਚੂਨਾ ਲੱਗ ਰਿਹਾ ਹੈ | ਸੂਤਰਾਂ ਅਨੁਸਾਰ ਸ਼ਹਿਰ ਦੇ ਭੀੜ-ਭੜੱਕੇ ਵਾਲੇ ਇਲਾਕਿਆਂ 'ਚ ਰਿਹਾਇਸ਼ੀ ਨਕਸ਼ੇ ਪਾਸ ਕਰਵਾ ਕੇ ਵੱਡੀਆਂ ਵਪਾਰਕ ਦੁਕਾਨਾਂ ਤੇ ਗੁਦਾਮ ਬਣਾਏ ਜਾ ਰਹੇ ਹਨ | ਇਨ੍ਹਾਂ ਉਸਾਰੀਆਂ ਦੌਰਾਨ ਨਾ ਤਾਂ ਪਾਰਕਿੰਗ ਲਈ ਥਾਂ ਛੱਡੀ ਜਾ ਰਹੀ ਹੈ ਅਤੇ ਨਾ ਬਿਲਡਿੰਗ ਬਾਈ-ਲਾਅ ਦੀ ਪਾਲਨਾ ਕੀਤੀ ਜਾ ਰਹੀ ਹੈ | ਸ਼ਹਿਰ ਅੰਦਰ ਬਿਨ੍ਹਾਂ ਮਨਜ਼ੂਰੀ ਕਈ ਥਾਵਾਂ 'ਤੇ ਰਾਤੋ-ਰਾਤ ਲੈਂਟਰ ਪਾ ਕੇ ਨਾਜਾਇਜ਼ ਦੁਕਾਨਾਂ ਖੜੀਆਂ ਕੀਤੀਆਂ ਜਾ ਰਹੀਆਂ ਹਨ | ਵਿਭਾਗ ਵਲੋਂ ਨਾਜਾਇਜ਼ ਉਸਾਰੀਆਂ 'ਤੇ ਪਹਿਲਾਂ ਨੋਟਿਸ ਲਗਾਏ ਜਾਂਦੇ ਹਨ | ਪਰ ਨਾਜਾਇਜ਼ ਉਸਾਰੀਆਂ ਕਰਨ ਵਾਲੇ ਉਨ੍ਹਾਂ ਨੋਟਿਸਾਂ ਨੂੰ ਫਾੜ ਕੇ ਰਾਤੋਂ ਰਾਤ ਲੈਂਟਰ ਪਾ ਲੈਂਦੇ ਹਨ | ਨਾਜਾਇਜ਼ ਵਪਾਰਕ ਉਸਾਰੀਆਂ ਕਾਰਨ ਸੜਕਾਂ 'ਤੇ ਪਾਰਕਿੰਗ ਦੀ ਸਮੱਸਿਆ ਵਧ ਰਹੀ ਹੈ, ਜਿਸ ਨਾਲ ਆਮ ਜਨਤਾ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਨਕਸ਼ਾ ਫ਼ੀਸ ਤੇ ਹੋਰ ਟੈਕਸ ਨਾ ਭਰੇ ਜਾਣ ਕਾਰਨ ਸਰਕਾਰੀ ਖ਼ਜ਼ਾਨੇ ਦਾ ਨੁਕਸਾਨ ਹੋ ਰਿਹਾ ਹੈ | ਸਥਾਨਕ ਨਿਵਾਸੀਆਂ ਦਾ ਦੋਸ਼ ਹੈ ਕਿ ਕਈ ਵਾਰ ਸ਼ਿਕਾਇਤ ਕਰਨ ਦੇ ਬਾਵਜੂਦ ਨਗਰ ਨਿਗਮ ਦੇ ਬਿਲਡਿੰਗ ਬਰਾਂਚ ਦੇ ਅਧਿਕਾਰੀ ਕੋਈ ਠੋਸ ਕਾਰਵਾਈ ਨਹੀਂ ਕਰ ਰਹੇ | ਲੋਕਾਂ ਨੇ ਦੋਸ਼ ਲਗਾਇਆ ਕਿ ਅਧਿਕਾਰੀਆਂ ਦੀ ਕਥਿਤ ਮਿਲੀਭੁਗਤ ਕਾਰਨ ਹੀ ਇਹ ਨਾਜਾਇਜ਼ ਕੰਮ ਚੱਲ ਰਿਹਾ ਹੈ | ਬੀਤੇ ਦਿਨੀਂ ਨਗਰ ਨਿਗਮ ਦੀ ਬਿਲਡਿੰਗ ਬਰਾਂਚ ਵਲੋਂ ਕਈ ਦੁਕਾਨਾਂ ਨੂੰ ਸੀਲ ਵੀ ਕੀਤਾ ਗਿਆ, ਜਿਨ੍ਹਾਂ ਦੇ ਕਾਗ਼ਜ਼ ਪੂਰੇ ਨਹੀਂ ਸਨ | ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਸ਼ਹਿਰ ਅੰਦਰ ਕਈ ਇਮਾਰਤਾਂ, ਜਿਨ੍ਹਾਂ ਦੀ ਨਕਸ਼ੇ ਤੇ ਨਾ ਹੀ ਆਰਮੀ ਦੀ ਐਨ.ਓ.ਸੀ ਪਾਸ ਹੈ, ਫਿਰ ਬਿਲਡਿੰਗ ਬਰਾਂਚ ਵਲੋਂ ਇਨ੍ਹਾਂ ਇਮਾਰਤਾਂ 'ਤੇ ਕਾਰਵਾਈ ਕਿਉਂ ਨਹੀਂ ਕੀਤੀ ਜਾਂਦੀ | ਇਹ ਵੀ ਬਿਲਡਿੰਗ ਬਰਾਂਚ ਦੇ ਅਧਿਕਾਰੀਆਂ ਦੀ ਕਾਰਵਾਈ 'ਤੇ ਵੱਡਾ ਸਵਾਲ ਹੈ | ਸ਼ਹਿਰ ਅੰਦਰ ਕੁਝ ਇਲਾਕੇ ਅਜਿਹੇ ਹਨ ਜਿੱਥੇ ਆਰਮੀ ਵਲੋਂ ਉਸਾਰੀਆਂ 'ਤੇ ਬਿਲਕੁਲ ਪਾਬੰਦੀ ਲਗਾਈ ਗਈ ਹੈ | ਪਰ ਨਗਰ ਨਿਗਮ ਦੀ ਬਿਲਡਿੰਗ ਬਰਾਂਚ ਦੀ ਰਹਿਨੁਮਾਈ ਹੇਠ ਇਹ ਇਮਾਰਤਾਂ ਦਾ ਕੰਮ ਜ਼ੋਰਾਂ ਨਾਲ ਚੱਲ ਰਿਹਾ ਹੈ | ਆਰਮੀ ਵਲੋਂ ਵੀ ਇਸ ਕੰਮ ਨੂੰ ਆ ਕੇ ਦੋ ਵਾਰ ਬੰਦ ਕਰਵਾਇਆ ਗਿਆ | ਪਰ ਅੱਜ ਵੀ ਉਹ ਕੰਮ ਪੂਰੇ ਜ਼ੋਰਾਂ ਸ਼ੋਰਾਂ ਨਾਲ ਚੱਲ ਰਿਹਾ ਹੈ | ਇਸ ਤੋਂ ਇਹ ਸਾਫ਼ ਸਾਬਤ ਹੁੰਦਾ ਹੈ ਕਿ ਇਸ ਨਾਜਾਇਜ਼ ਉਸਾਰੀ ਵਿਚ ਵੀ ਨਗਰ ਨਿਗਮ ਦੇ ਬਿਲਡਿੰਗ ਬਰਾਂਚ ਦੇ ਅਧਿਕਾਰੀਆਂ ਦੀ ਕਥਿਤ ਮਿਲੀ ਭੁਗਤ ਹੈ |

ਪਿਛਲੀ ਖ਼ਬਰ ਸੰਤਾਂ ਦਾ ਸੰਗ ਕਰਨ ਨਾਲ ਜੀਵਨ 'ਚ ਬਦਲਾਅ ਸੰਭਵ ਹੈ-ਸਾਧਵੀ ਰਾਧਿਕਾ ਭਾਰਤੀ ਅਗਲੀ ਖ਼ਬਰ ਪਠਾਨਕੋਟ-ਜੋਗਿੰਦਰ ਨਗਰ ਨੈਰੋਗੇਜ ਰੇਲ ਗੱਡੀ ਦੀ ਹੋਈ ਮੁੜ ਵਾਪਸੀ

ਨਗਰ ਨਿਗਮ ਦੀ ਹਦੂਦ 'ਚ ਨਾਜਾਇਜ਼ ਉਸਾਰੀਆਂ ਦੀ ਭਰਮਾਰ <br/>

ਸੰਬੰਧਿਤ ਖ਼ਬਰਾਂ