ਪੱਕੀ ਫ਼ਸਲ 'ਤੇ ਪੈ ਰਹੇ ਮੀਂਹ ਨੇ ਕਿਸਾਨ ਕੀਤੇ ਪ੍ਰੇਸ਼ਾਨ
ਅਜੀਤ ਡੈਸਕ
05-04-2026
ਗੁਰਦਾਸਪੁਰ, (ਚੱਕਰਾਜਾ)-ਪਿਛਲੇ ਕਈ ਦਿਨਾਂ ਤੋਂ ਚੱਲ ਰਹੇ ਖ਼ਰਾਬ ਮੌਸਮ ਅਤੇ ਕੁਝ ਦਿਨਾਂ ਦੇ ਵਕਫ਼ੇ 'ਤੇ ਪੈ ਰਹੇ ਮੀਂਹ ਨੇ ਕਿਸਾਨਾਂ ਦੇ ਸਾਹ ਸੂਤੇ ਹੋਏ ਹਨ, ਕਿਉਂਕਿ ਪੱਕਣ ਕਿਨਾਰੇ ਖੜ੍ਹੀ ਕਣਕ ਦੀ ਫ਼ਸਲ 'ਤੇ ਇਸ ਖ਼ਰਾਬ ਮੌਸਮ ਅਤੇ ਮੀਂਹ ਦਾ ਮਾੜਾ ਅਸਰ ਪੈ ਸਕਦਾ ਹੈ | ਬਹੁਤ ਸਾਰੀਆਂ ਨੀਵੀਂਆਂ ਜ਼ਮੀਨਾਂ ਜਿਨ੍ਹਾਂ 'ਚ ਜੇਕਰ ਮੀਂਹ ਦਾ ਪਾਣੀ ਖੜ੍ਹਾ ਹੋ ਜਾਂਦਾ ਹੈ ਤਾਂ ਪਾਣੀ ਦਾ ਨਿਕਾਸ ਨਾ ਹੋਣ ਕਾਰਨ ਫ਼ਸਲ ਦੀ ਕਟਾਈ ਔਖੀ ਹੋ ਸਕਦੀ ਹੈ | ਇਸੇ ਤਰ੍ਹਾਂ ਤੇਲ ਬੀਜ ਫ਼ਸਲ ਸਰ੍ਹੋਂ ਦੀ ਚੱਲ ਰਹੀ ਕਟਾਈ 'ਚ ਵੀ ਖ਼ਰਾਬ ਮੌਸਮ ਅੜਿੱਕਾ ਬਣ ਰਿਹਾ ਹੈ, ਕਿਉਂਕਿ ਸਰੋ੍ਹਾ ਦੀ ਫ਼ਸਲ ਇਕ ਅਜਿਹੀ ਫ਼ਸਲ ਹੈ, ਜਿਸ ਦੀ ਕਟਾਈ ਤੋਂ ਬਾਅਦ ਇਸ ਦੀ ਗਹਾਈ ਲਈ ਇਸ ਨੰੂ ਕਈ ਦਿਨ ਖੇਤ 'ਚ ਹੀ ਸੁਕਾਉਣਾ ਪੈਂਦਾ ਹੈ | ਪਰ ਬਣੀ ਬੱਦਲਵਾਈ ਅਤੇ ਹੋ ਰਹੀ ਕਿਣ-ਮਿਣ ਕਾਰਨ ਕਿਸਾਨਾਂ ਲਈ ਇਸ ਫ਼ਸਲ ਨੰੂ ਵੀ ਸੰਭਾਲਣਾ ਔਖਾ ਹੋਇਆ ਪਿਆ ਹੈ | ਇਸੇ ਤਰ੍ਹਾਂ ਚੱਲ ਰਹੇ ਗੰਨੇ ਦੀ ਬਿਜਾਈ ਦੇ ਸੀਜ਼ਨ ਦੌਰਾਨ ਵੀ ਮੀਂਹ ਪੈਣ ਕਾਰਨ ਗੰਨੇ ਦੀ ਲਵਾਈ ਪ੍ਰਭਾਵਿਤ ਹੋ ਰਹੀ ਹੈ | ਜੇਕਰ ਆਉਂਦੇ ਦਿਨਾਂ 'ਚ ਵੀ ਮੌਸਮ ਇਸੇ ਤਰ੍ਹਾਂ ਰਿਹਾ ਤਾਂ ਕਿਸਾਨਾਂ ਲਈ ਪੱਕੀਆਂ ਫ਼ਸਲਾਂ ਨੰੂ ਸੰਭਾਲਣਾ ਔਖਾ ਹੋ ਸਕਦਾ ਹੈ |
