ਧਿਆਨਪੁਰ, 22 ਅਪ੍ਰੈਲ (ਕੁਲਦੀਪ ਸਿੰਘ ਸੋਨੂੰ)- ਪਿੰਡ ਨੰਗਲ ਵਿਚ ਛੋਟਾ ਹਾਥੀ ਦੀ ਬੈਟਰੀ ਦੇ ਸਰਕਟ ਕਰ ਕੇ ਅਚਾਨਕ ਅੱਗ ਲੱਗਣ ਕਰ ਕੇ ਜਿੱਥੇ ਛੋਟਾ ਹਾਥੀ ਸੜ ਗਿਆ ਉਥੇ ਕਿਸਾਨ ਅਵਤਾਰ ਸਿੰਘ ਨੰਗਲ ਦੀ ਢਾਈ ਕਿੱਲੇ ਦੇ ਕਰੀਬ ਕਣਕ ਵੀ ਸੜ੍ਹ ਕੇ ਸੁਆਹ ਹੋ ਗਈ | ਇਸ ਸੰਬੰਧੀ ਛੋਟੇ ਹਾਥੀ ਨੂੰ ਚਲਾਉਣ ਵਾਲੇ ਡਰਾਇਵਰ ਸੁਰਜੀਤ ਸਿੰਘ ਨੇ ਦੱਸਿਆ ਕਿ ਉਹ ਆਪਣੇ ਭਰਾ ਰਣਜੀਤ ਸਿੰਘ ਦਾ ਛੋਟਾ ਹਾਥੀ ਪੀ.ਬੀ.06-7914 ਲੈ ਕੇ ਪਿੰਡ ਦੇ ਹੀ ਕਿਸਾਨ ਅਵਤਾਰ ਸਿੰਘ ਦੀ ਕਣਕ ਲੱਦ ਕੇ ਮੰਡੀ ਪਹੁੰਚਾਉਣ ਵਾਸਤੇ ਗਿਆ ਸੀ ਕਿ ਅਚਾਨਕ ਬੈਟਰੀ ਸਰਕਟ ਜਾਂ ਹੋਰ ਕਿਸੇ ਕਾਰਨ ਕਰ ਕੇ ਇਕ ਦਮ ਛੋਟੇ ਹਾਥੀ ਨੂੰ ਅੱਗ ਲੱਗ ਗਈ, ਜਿਸ ਕਰ ਕੇ ਛੋਟਾ ਹਾਥੀ ਮੌਕੇ 'ਤੇ ਹੀ ਸਵਾਹ ਹੋ ਗਿਆ ਤੇ ਅਵਤਾਰ ਸਿੰਘ ਦੀ ਲਗਪਗ ਢਾਈ ਕਿੱਲੇ ਕਣਕ ਵੀ ਅੱਗ ਦੀ ਲਪੇਟ ਵਿਚ ਆ ਗਈ | ਉਨ੍ਹਾਂ ਕਿਹਾ ਕਿ ਅੱਗ ਲੱਗਣ ਤੋਂ ਤੁਰੰਤ ਬਾਅਦ ਫਾਇਰ ਬਿ੍ਗੇਡ ਨੂੰ ਫ਼ੋਨ ਕੀਤਾ ਗਿਆ ਜਿਸ ਕਰ ਕੇ ਉਨ੍ਹਾਂ ਦੀ ਗੱਡੀ ਨੇ ਤੁਰੰਤ ਆ ਕੇ ਅੱਗ 'ਤੇ ਕਾਬੂ ਪਾਉਂਦਿਆਂ ਹੋਰ ਨੁਕਸਾਨ ਹੋਣ ਤੋਂ ਬਚਾਇਆ | ਇਸ ਸਮੇਂ ਸੁਰਜੀਤ ਸਿੰਘ ਨੰਗਲ ਨੇ ਦੱਸਿਆ ਕਿ ਛੋਟਾ ਹਾਥੀ ਜੋ ਲੋਨ 'ਤੇ ਲਿਆ ਹੋਇਆ ਸੀ ਅਤੇ ਇਸ ਨੂੰ ਅਚਾਨਕ ਅੱਗ ਲੱਗਣ ਬਾਰੇ ਸੁਣ ਕੇ ਇਸ ਦੇ ਮਾਲਕ ਰਣਜੀਤ ਸਿੰਘ ਦੀ ਅਚਾਨਕ ਸਦਮੇ ਨਾਲ ਮੌਤ ਹੋ ਗਈ | ਡਰਾਇਵਰ ਸੁਰਜੀਤ ਸਿੰਘ ਤੇ ਕਿਸਾਨ ਅਵਤਾਰ ਸਿੰਘ ਨੇ ਦੱਸਿਆ ਕਿ ਲਗਪਗ 4-5 ਲੱਖ ਦੇ ਕਰੀਬ ਨੁਕਸਾਨ ਹੋ ਗਿਆ ਹੈ ਤੇ ਸਦਮੇ ਕਰ ਕੇ ਰਣਜੀਤ ਸਿੰਘ ਦੀ ਮੌਤ ਵੀ ਹੋ ਗਈ ਹੈ | ਉਨ੍ਹਾਂ ਡਿਪਟੀ ਕਮਿਸ਼ਨਰ ਗੁਰਦਾਸਪੁਰ, ਹਲਕਾ ਇੰਚਾਰਜ ਆਪ ਬਲਬੀਰ ਸਿੰਘ ਪੰਨੂੰ ਤੇ ਪ੍ਰਸ਼ਾਸਨ ਕੋਲੋਂ ਮੰਗ ਕੀਤੀ ਹੈ ਕਿ ਉਹ ਕਣਕ ਦੀ ਫ਼ਸਲ ਦਾ ਅਤੇ ਛੋਟੇ ਹਾਥੀ ਦੇ ਮਾਲਕ ਨੂੰ ਮੁਆਵਜ਼ਾ ਦੇ ਕੇ ਰਾਹਤ ਦੇਣ |
