ਨੈਣੇਕੋਟ ਕਤਲ ਮਾਮਲੇ 'ਚ 4 ਨਾਮਜ਼ਦ <br/>

ਅ

ਅਜੀਤ ਡੈਸਕ 14-05-2026

ਕਾਹਨੂੰਵਾਨ, 13 ਮਈ (ਨਿਸ਼ਾਨ ਸਿੰਘ ਚਾਹਲ)-ਮੰਗਲਵਾਰ ਦੀ ਦੇਰ ਸ਼ਾਮ ਨੂੰ ਥਾਣਾ ਕਾਹਨੂੰਵਾਨ ਦੇ ਪਿੰਡ ਨੈਣੇਕੋਟ ਵਿਚ ਛੋਟੇ ਭਰਾ ਦੇ ਹਿੱਸੇ ਆਉਂਦੀ ਜ਼ਮੀਨ ਉੱਪਰ ਕਬਜ਼ਾ ਕਰਨ ਨੀਅਤ ਨੂੰ ਲੈ ਕੇ ਵੱਡੇ ਭਰਾ ਵਲੋਂ ਆਪਣੇ ਸਕੇ ਛੋਟੇ ਭਰਾ ਅਤੇ ਉਸ ਦੀ ਪਤਨੀ ਦਾ ਕਤਲ ਕਰਨ ਦੇ ਮਾਮਲੇ ਵਿਚ ਥਾਣਾ ਕਾਹਨੂੰਵਾਨ ਦੀ ਪੁਲਿਸ ਵਲੋਂ ਚਾਰ ਜਣਿਆਂ ਨੂੰ ਨਾਮਜ਼ਦ ਕੀਤਾ ਹੈ | ਮਿ੍ਤਕ ਅਜੈਬ ਸਿੰਘ ਦੀ ਭੈਣ ਗੁਰਬਿੰਦਰ ਕੌਰ ਪਤਨੀ ਲੇਟ ਗੁਰਨਾਮ ਸਿੰਘ ਵਾਸੀ ਰਜਾਦਾ ਰੋਡ ਧਰਮਪੁਰਾ ਮਹੱਲਾ ਕਾਦੀਆਂ ਵਲੋਂ ਕਾਹਨੂੰਵਾਨ ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਦੱਸਿਆ ਕਿ ਉਸ ਦੇ ਤਿੰਨੇ ਭਰਾ ਅਜੈਬ ਸਿੰਘ, ਅਮਰਜੀਤ ਸਿੰਘ ਅਤੇ ਤਰਸੇਮ ਸਿੰਘ ਜਮਸ਼ੇਦਪੁਰ (ਝਾਰਖੰਡ) ਵਿਚ ਬਣੇ ਤਿੰਨ ਮੰਜ਼ਿਲਾ ਮਕਾਨ ਵਿਚ ਰਹਿੰਦੇ ਸਨ | ਕਰੀਬ ਇਕ ਸਾਲ ਪਹਿਲਾਂ ਅਮਰਜੀਤ ਸਿੰਘ ਅਤੇ ਅਜੈਬ ਸਿੰਘ ਆਪਣੇ ਜੱਦੀ ਪਿੰਡ ਨੈਣੇਕੋਟ ਵਿਚ ਆ ਗਏ ਤੇ ਆਪਣੇ ਹਿੱਸੇ ਆਉਂਦੀ ਜ਼ਮੀਨ ਉੱਪਰ ਵਾਹੀ ਕਰਨ ਲੱਗ ਪਏ | ਗੁਰਬਿੰਦਰ ਕੌਰ ਨੇ ਅੱਗੇ ਦੱਸਿਆ ਕਿ ਤਰਸੇਮ ਸਿੰਘ, ਅਮਰਜੀਤ ਸਿੰਘ, ਅਮਰਜੀਤ ਸਿੰਘ ਦੀ ਪਤਨੀ ਮਨਪ੍ਰੀਤ ਕੌਰ, ਲੜਕਾ ਹਰਜੋਤ ਸਿੰਘ ਨੈਣੇਕੋਟ ਵਿਚ ਅਜੈਬ ਸਿੰਘ ਦੇ ਹਿੱਸੇ ਆਉਂਦੀ ਜ਼ਮੀਨ 'ਤੇ ਵੀ ਕਬਜ਼ਾ ਕਰਨਾ ਚਾਹੁੰਦੇ ਸਨ | ਇਸ ਦੇ ਨਾਲ ਹੀ ਅਜੈਬ ਸਿੰਘ ਦੇ ਨਾਂਅ ਜਮਸ਼ੇਦਪੁਰ ਵਿਚ ਸਥਿਤ 3 ਮੰਜ਼ਿਲ੍ਹਾ ਘਰ ਨੂੰ ਛੱਡਣ ਲਈ ਅਜਾਇਬ ਸਿੰਘ ਨੂੰ ਅਕਸਰ ਹੀ ਧਮਕੀਆਂ ਦਿੰਦੇ ਰਹਿੰਦੇ ਸਨ | ਗੁਰਬਿੰਦਰ ਕੌਰ ਨੇ ਦੱਸਿਆ ਕਿ ਬੀਤੇ ਕਰੀਬ ਇਕ ਹਫਤੇ ਤੋਂ ਉਸ ਦਾ ਭਰਾ ਤਰਸੇਮ ਸਿੰਘ ਵੀ ਜਮਸ਼ੇਦਪੁਰ ਤੋਂ ਆਪਣੇ ਪਿੰਡ ਨੈਣੇਕੋਟ ਵਿਚ ਆਇਆ ਹੋਇਆ ਸੀ | ਉਸ ਨੇ ਪਿੰਡ ਦੇ ਮੁਹਤਬਰ ਵਿਅਕਤੀਆਂ ਦੇ ਕੋਲ ਉਨ੍ਹਾਂ ਦੀ ਜ਼ਮੀਨ-ਜਾਇਦਾਦ ਦੇ ਨਿਪਟਾਰੇ ਲਈ ਕਿਹਾ ਸੀ, ਪਰ ਇਸ ਦਾ ਕੋਈ ਹੱਲ ਨਹੀਂ ਹੋ ਸਕਿਆ | ਮੰਗਲਵਾਰ ਦੀ ਸ਼ਾਮ ਨੂੰ ਅਜਾਇਬ ਸਿੰਘ ਪਿੰਡ ਵਿਚ ਸੈਰ ਕਰ ਰਿਹਾ ਸੀ ਕਿ ਅਮਰਜੀਤ ਸਿੰਘ, ਉਸ ਦੀ ਪਤਨੀ ਮਨਪ੍ਰੀਤ ਕੌਰ, ਬੇਟਾ ਹਰਜੋਤ ਸਿੰਘ ਤੇ ਤਰਸੇਮ ਸਿੰਘ ਨੇ ਇਕ ਸਲਾਹ ਹੋ ਕੇ ਅਜਾਇਬ ਸਿੰਘ ਤੇ ਉਸ ਦੀ ਪਤਨੀ ਕਮਲ ਕੌਰ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ | ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਗੁਰਬਿੰਦਰ ਕੌਰ ਨੇ ਇਹ ਵੀ ਦੱਸਿਆ ਕਿ ਉਸ ਦੇ ਭਰਾ ਅਮਰਜੀਤ ਸਿੰਘ ਉੱਪਰ ਜਮਸ਼ੇਦਪੁਰ ਵਿਚ ਕਈ ਅਪਰਾਧਿਕ ਮਾਮਲੇ ਦਰਜ ਹਨ | ਉਧਰ ਗੁਰਬਿੰਦਰ ਕੌਰ ਦੇ ਬਿਆਨਾਂ ਦੇ ਆਧਾਰ 'ਤੇ ਕਾਹਨੂੰਵਾਨ ਥਾਣੇ ਅੰਦਰ ਵੱਖ-ਵੱਖ ਧਰਾਵਾਂ ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ | ਅਮਰਜੀਤ ਸਿੰਘ ਪੁਲਿਸ ਦੀ ਗਿ੍ਫ਼ਤ ਵਿਚ ਹੈ, ਜਦਕਿ ਬਾਕੀ ਦੋਸ਼ੀਆਂ ਦੀ ਪੁਲਿਸ ਵਲੋਂ ਭਾਲ ਕੀਤੀ ਜਾ ਰਹੀ ਹੈ |
ਭਰਾ ਤੇ ਭਾਬੀ ਦਾ ਕਤਲ ਕਰਨ ਵਾਲੇ ਅਮਰਜੀਤ ਸਿੰਘ ਦਾ ਰਿਹਾ ਹੈ ਅਪਰਾਧਿਕ ਪਿਛੋਕੜ
ਪਿੰਡ ਨੈਣੇਕੋਟ ਵਿਚ ਛੋਟੇ ਭਰਾ ਦੇ ਹਿੱਸੇ ਆਉਂਦੀ ਜ਼ਮੀਨ ਨੂੰ ਹੜੱਪਣ ਦੀ ਨੀਅਤ ਨਾਲ ਆਪਣੇ ਭਰਾ ਤੇ ਭਾਬੀ ਦਾ ਕਤਲ ਕਰਨ ਵਾਲੇ ਅਮਰਜੀਤ ਦਾ ਪਿਛੋਕੜ ਅਪਰਾਧਿਕ ਰਿਹਾ ਹੈ | ਜਮਸ਼ੇਦਪੁਰ ਦੇ ਸਿਦਗੌੜਾ ਤੇ ਹਾਲ ਵਾਸੀ ਨੈਣੇਕੋਟ ਵਾਸੀ ਅਮਰਜੀਤ ਸਿੰਘ ਉਰਫ ਅੰਬਾ ਦਾ ਜਮਸ਼ੇਦਪੁਰ ਵਿਚ ਰਹਿੰਦਿਆਂ ਸਭ ਤੋਂ ਪਹਿਲਾਂ ਅਪਰਾਧਿਕ ਗਤੀਵਿਧੀਆਂ ਵਿਚ ਨਾਂਅ ਸਾਲ 2019 ਵਿਚ ਉਸ ਵੇਲੇ ਆਇਆ ਸੀ, ਜਦੋਂ ਝਾਰਖੰਡ ਸਿੱਖ ਪ੍ਰਤੀਨਿਧੀ ਬੋਰਡ ਦੇ ਪ੍ਰਧਾਨ ਗੁਰਬਚਨ ਸਿੰਘ ਬਿੱਲਾ ਅਤੇ ਉਸ ਦੀ ਪਤਨੀ ਉੱਤੇ ਹੋਏ ਜਾਨਲੇਵਾ ਹਮਲਾ ਹੋਇਆ ਸੀ | ਇਸ ਹਮਲੇ 'ਚ ਅੰਬੇ ਦਾ ਨਾਂਅ ਮੁੱਖ ਸਾਜਿਸ਼ਕਰਤਾ ਦੇ ਤੌਰ 'ਤੇ ਆਇਆ ਸੀ | ਗੁਰਦੁਆਰਾ ਸਾਹਿਬ ਦੇ ਪ੍ਰਧਾਨ ਗੁਰਬਚਨ ਸਿੰਘ ਬਿੱਲਾ ਤੇ ਉਨ੍ਹਾਂ ਦੀ ਪਤਨੀ 9 ਨਵੰਬਰ 2019 ਨੂੰ ਸਵੇਰੇ ਤੜਕਸਾਰ ਗੁਰਦੁਆਰਾ ਸਾਹਿਬ ਵਿਖੇ ਮੱਥਾ ਟੇਕਣ ਜਾ ਰਹੇ ਸਨ ਤਾਂ ਉਸ ਵੇਲੇ ਉਨ੍ਹਾਂ ਉੱਪਰ ਤਾਬੜਤੋੜ ਹਮਲਾ ਹੋਇਆ ਸੀ | ਪੁਲਿਸ ਜਾਂਚ ਵਿਚ ਇਹ ਆਇਆ ਸੀ ਕਿ ਅਮਰਜੀਤ ਉਰਫ਼ ਅੰਬੇ ਅਤੇ ਕੇਂਦਰੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਤਤਕਲੀਨ ਪ੍ਰਧਾਨ ਗੁਰਮੁੱਖ ਸਿੰਘ ਨੇ ਗੁਰਦੁਆਰਾ ਸਾਹਿਬ ਦੇ ਮੌਜੂਦਾ ਪ੍ਰਧਾਨ ਗੁਰਬਚਨ ਸਿੰਘ ਨੂੰ ਮਾਰਨ ਦੀ ਸਾਜਿਸ਼ ਰਚੀ ਸੀ | ਉਸ ਜਾਂਚ ਵਿਚ ਇਹ ਵੀ ਆਇਆ ਕਿ ਉਸ ਵੇਲੇ ਹਮਲਾਵਰਾਂ ਨੂੰ ਅਮਰਜੀਤ ਸਿੰਘ ਅੰਬੇ ਵਲੋਂ ਹਥਿਆਰ ਉਪਲੱਬਧ ਕਰਵਾਏ ਸਨ | ਇਸ ਮਾਮਲੇ 'ਚ ਉਸ ਨੂੰ ਲੰਬੇ ਸਮੇਂ ਲਈ ਜੇਲ੍ਹ ਵੀ ਹੋਈ | ਝਾਰਖੰਡ ਹਾਈਕੋਰਟ ਨੇ ਇਸ ਮਾਮਲੇ ਵਿਚ ਕੁਝ ਸਾਲ ਪਹਿਲਾਂ ਹੀ ਉਸ ਨੂੰ ਜ਼ਮਾਨਤ 'ਤੇ ਰਿਹਾਅ ਕੀਤਾ ਸੀ | ਅਮਰਜੀਤ ਸਿੰਘ ਅੰਬੇ ਦਾ ਜਮਸ਼ੇਦਪੁਰ ਵਿਚ ਟਰੱਕਾਂ ਤੇ ਹੋਰ ਹੈਵੀ ਵਾਹਨਾਂ ਲਈ ਫਾਈਨੈਂਸ ਦਾ ਵੱਡਾ ਕਾਰੋਬਾਰ ਹੈ | ਜਮਸ਼ੇਦਪੁਰ ਦੇ ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਅਮਰਜੀਤ ਸਿੰਘ ਅੰਬੇ ਵਲੋਂ ਜਮਸ਼ੇਦਪੁਰ ਦੇ ਇਕ ਬਾਜ਼ਾਰ ਵਿਚ ਇਕ ਨੌਜਵਾਨ ਲੜਕੀ ਨੂੰ ਮਾਰਨ ਦੇ ਦੋਸ਼ ਵੀ ਲੱਗੇ ਸਨ | ਇਹ ਮਾਮਲਾ ਵੀ ਅਦਾਲਤ ਵਿਚ ਵਿਚਾਰ ਅਧੀਨ ਹੈ | ਪੁਲਿਸ ਅਧਿਕਾਰੀ ਨੇ ਇਹ ਵੀ ਦੱਸਿਆ ਕਿ ਅਮਰਜੀਤ ਸਿੰਘ ਅੰਬੇ ਦੇ ਖ਼ਿਲਾਫ਼ ਜਮਸ਼ੇਦਪੁਰ ਵਿਚ ਕਈ ਤਰ੍ਹਾਂ ਦੇ ਹੋਰ ਵੀ ਅਪਰਾਧਿਕ ਮਾਮਲੇ ਦਰਜ ਹਨ |

ਨੈਣੇਕੋਟ ਕਤਲ ਮਾਮਲੇ 'ਚ 4 ਨਾਮਜ਼ਦ <br/>

ਸੰਬੰਧਿਤ ਖ਼ਬਰਾਂ