ਅੰਮਿ੍ਤਸਰ, 7 ਮਾਰਚ (ਜਸਵੰਤ ਸਿੰਘ ਜੱਸ)-ਅਮਨਦੀਪ ਹਸਪਤਾਲ ਸਮੂਹ ਵਲੋਂ ਉਜਾਲਾ ਸਿਗਨਸ ਨਾਲ ਸਾਂਝੇਦਾਰੀ ਕਰਦਿਆਂ ਕੌਮਾਂਤਰੀ ਮਹਿਲਾ ਦਿਵਸ ਨੂੰ ਸਮਰਪਿਤ ਔਰਤਾਂ ਦੇ ਜੋੜਾਂ, ਖਾਸਕਰ ਗਠੀਆ ਰੋਗ ਦੀ ਦੇਖਭਾਲ ਲਈ 8 ਤੋਂ 14 ਮਾਰਚ ਤੱਕ ਮੁਫ਼ਤ ਆਰਥੋਪੀਡਿਕ ਓਪੀਡੀ ਸੇਵਾਵਾਂ ਪ੍ਰਦਾਨ ਕਰਨ ਦਾ ਐਲਾਣ ਕੀਤਾ ਹੈ | ਅੱਜ ਇੱਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਹਸਪਤਾਲ ਸਮੂਹ ਦੇ ਆਰਥੋਪੈਡਿਕਸ ਵਿਭਾਗ ਦੇ ਚੇਅਰਮੈਨ ਦੇਸ਼ ਦੇ ਹੱਡੀਆਂ ਤੇ ਜੋੜ੍ਹਾਂ ਦੇ ਮਾਹਿਰ ਡਾਕਟਰ ਅਵਤਾਰ ਸਿੰਘ ਨੇ ਕਿਹਾ ਕਿ ਕੌਮਾਂਤਰੀ ਮਹਿਲਾ ਦਿਵਸ ਦੇ ਮੌਕੇ ਅਮਨਦੀਪ ਹਸਪਤਾਲ ਵਲੋਂ ਆਰੰਭ ਕੀਤੀ 'ਚਲਤੀ ਰਹੇ ਵੋ' ਸਿਰਲੇਖ ਹੇਠ ਤਹਿਤ ਔਰਤਾਂ ਦੇ ਜੋੜਾਂ ਦੀ ਦੇਖਭਾਲ ਹਫ਼ਤਾ ਮਨਾਇਆ ਜਾ ਰਿਹਾ ਹੈ | ਉਨ੍ਹਾਂ ਦੱਸਿਆ ਕਿ 8 ਮਾਰਚ ਤੋਂ 14 ਮਾਰਚ ਤੱਕ ਚੱਲਣ ਵਾਲੇ ਇਸ ਹਫ਼ਤੇ ਦੌਰਾਨ ਗੋਡਿਆਂ ਦੇ ਦਰਦ, ਪਿੱਠ ਦਰਦ, ਕਮਰ ਦੀ ਬੇਅਰਾਮੀ, ਗਠੀਏ ਦੇ ਲੱਛਣ, ਰੀੜ੍ਹ ਦੀ ਹੱਡੀ ਨਾਲ ਸੰਬੰਧਤ ਮੁੱਦਿਆਂ ਅਤੇ ਹੱਡੀਆਂ ਦੀ ਸਿਹਤ ਅਤੇ ਓਸਟੀਓਪੋਰੋਸਿਸ ਨਾਲ ਸੰਬੰਧਤ ਰੋਗਾਂ ਅਤੇ ਚਿੰਤਾਵਾਂ ਦਾ ਸਾਹਮਣਾ ਕਰ ਰਹੀਆਂ ਔਰਤਾਂ ਨੂੰ ਮੁਫ਼ਤ ਆਰਥੋਪੀਡਿਕ ਸਲਾਹ-ਮਸ਼ਵਰਾ ਪ੍ਰਦਾਨ ਕੀਤਾ ਜਾਵੇਗਾ | ਡਾ: ਅਵਤਾਰ ਸਿੰਘ ਤੇ ਹਸਪਤਾਲ ਦੇ ਗਠੀਆ ਰੋਗ ਦੇ ਡੀ.ਐੱਮ. ਡਾ: ਅਕਾਂਨਸ਼ਾ ਨੇ ਕਿਹਾ ਕਿ ਹਸਪਤਾਲ ਸਮੂਹ ਵਲੋਂ ਇਹ ਮਹਿਲਾ ਦਿਵਸ ਮੌਕੇ ਇਹ ਮੁਫ਼ਤ ਸਿਹਤ ਜਾਂਚ ਹਫਤੇ ਦੀ ਮੁਹਿੰਮ ਸ਼ੁਰੂ ਕੀਤੀ ਗਈ ਹੈ ਤਾਂ ਕਿ ਕਿਸੇ ਸੰਭਾਵੀ ਰੋਗ ਦੀ ਸਮੇਂ ਸਿਰ ਪਛਾਣ ਕਰਕੇ ਉਸ ਤੋਂ ਨਿਜ਼ਾਤ ਦਿਵਾਈ ਜਾ ਸਕੇ |
