ਅੰਮਿ੍ਤਸਰ, 7 ਮਾਰਚ (ਜਸਵੰਤ ਸਿੰਘ ਜੱਸ)-ਦਲ ਖ਼ਾਲਸਾ ਦੇ ਰਾਜਸੀ ਮਾਮਲਿਆਂ ਦੇ ਸਕੱਤਰ ਜਨਰਲ ਕੰਵਰਪਾਲ ਸਿੰਘ ਨੇ ਅਮਰੀਕਾ, ਇਜ਼ਰਾਈਲ ਈਰਾਨ ਦਰਮਿਆਨ ਚੱਲ ਰਹੀ ਜੰਗ ਬਾਰੇ ਪ੍ਰਤੀਕਰਮ ਪ੍ਰਗਟ ਕਰਦਿਆਂ ਕਿਹਾ ਹੈ ਕਿ ਸੰਯੁਕਤ ਰਾਸ਼ਟਰ ਇਕ ਵਾਰ ਫਿਰ ਵਿਸ਼ਵ-ਵਿਆਪੀ ਸੰਕਟ ਟਾਲਣ ਵਿਚ ਅਸਫਲ ਰਿਹਾ ਹੈ | ਦਲ ਖ਼ਾਲਸਾ ਆਗੂ ਨੇ ਕਿਹਾ ਕਿ ਇਜ਼ਰਾਈਲ ਅਮਰੀਕਾ ਦੇ ਮੋਢੇ ਚੜ੍ਹ ਕੇ ਈਰਾਨ ਵਿਚ ਭਾਰੀ ਤਬਾਹੀ ਮਚਾ ਰਿਹਾ ਹੈ | ਜਾਰੀ ਬਿਆਨ ਵਿਚ ਕੰਵਰਪਾਲ ਸਿੰਘ ਨੇ ਕਿਹਾ ਕਿ ਅਮਰੀਕਾ-ਇਜ਼ਰਾਈਲ ਵਲੋਂ ਮਿਲ ਕੇ ਈਰਾਨ 'ਤੇ ਤਬਾਹਕੁੰਨ ਹਮਲਾ ਅਤੇ ਨਾਗਰਿਕਾਂ ਦੇ ਕਤਲ, ਖਾਸ ਕਰਕੇ ਸਕੂਲੀ ਬੱਚਿਆਂ ਦਾ ਕਤਲੇਆਮ ਅਤੇ ਇਕ ਪ੍ਰਭੂਸੱਤਾ ਸੰਪੰਨ ਦੇਸ਼ ਦੇ ਮੁਖੀ ਆਇਤੁੱਲਾ ਖੁਮੇਨੇਈ ਦਾ ਕਤਲ ਨਿੰਦਣਯੋਗ ਵਰਤਾਰਾ ਹੈ | ਉਨ੍ਹਾਂ ਕਿਹਾ ਕਿ ਇਰਾਨ 'ਤੇ ਜੰਗੀ ਹਮਲੇ ਤੋਂ ਕੁਝ ਪਲ ਪਹਿਲਾਂ ਭਾਰਤ ਦੇ ਪ੍ਰਧਾਨ ਮੰਤਰੀ ਦਾ ਇਜ਼ਰਾਈਲ ਦੌਰਾ ਆਪਣੇ ਆਪ ਵਿਚ ਬੁਝਾਰਤ ਬਣਿਆ ਹੈ | ਉਨ੍ਹਾਂ ਕਿਹਾ ਕਿ ਅਮਰੀਕਾ-ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਛਿੜੀ ਖ਼ੂਨੀ ਅਮਰੀਕਾ ਵਲੋਂ ਜੰਗ ਧੌਂਸ, ਦਾਬੇ, ਹੈਂਕੜ ਅਤੇ ਆਪਣੀ ਚੌਧਰ ਮਨਵਾਉਣ ਦੀ ਦੌੜ 'ਚੋਂ ਨਿਕਲੀ ਹੈ |
