ਅੰਮਿ੍ਤਸਰ, 5 ਮਈ (ਸੁਰਿੰਦਰ ਕੋਛੜ)-ਰੋਟਰੀ ਕਲੱਬ ਅੰਮਿ੍ਤਸਰ ਵੈਸਟ ਵਲੋਂ ਦਮਾ ਰੋਗ ਬਾਰੇ ਜਾਗਰੂਕਤਾ ਅਤੇ ਮੁਫ਼ਤ ਜਾਂਚ ਕੈਂਪ ਦਾ ਸਫਲਤਾਪੂਰਵਕ ਆਯੋਜਨ ਕੀਤਾ ਗਿਆ, ਜਿਸ ਦਾ ਉਦੇਸ਼ ਜਨਤਕ ਜਾਗਰੂਕਤਾ ਵਧਾਉਣਾ ਅਤੇ ਬੱਚਿਆਂ 'ਚ ਦਮੇ ਦੀ ਸਮੇਂ ਸਿਰ ਪਛਾਣ ਅਤੇ ਸਹੀ ਪ੍ਰਬੰਧਨ ਨੂੰ ਉਤਸ਼ਾਹਿਤ ਕਰਨਾ ਸੀ | ਇਹ ਕੈਂਪ ਕਾਰਜਕਾਰੀ ਸਕੱਤਰ ਡਾ: ਜਸਪ੍ਰੀਤ ਗਰੋਵਰ, ਕਲੱਬ ਸਕੱਤਰ ਰੋਟੇਰੀਅਨ ਸਾਵਣ ਅਰੋੜਾ ਅਤੇ ਸੀਨੀਅਰ ਮੈਂਬਰ ਰਾਜੇਸ਼ ਗੁਲ੍ਹਾਟੀ ਦੀ ਅਗਵਾਈ ਹੇਠ ਆਯੋਜਿਤ ਕੀਤਾ ਗਿਆ | ਕੈਂਪ ਦੌਰਾਨ ਪ੍ਰਸਿੱਧ ਬਾਲ ਰੋਗ ਅਤੇ ਐਲਰਜੀ ਮਾਹਿਰ ਡਾ: ਨਰੇਸ਼ ਗਰੋਵਰ ਅਤੇ ਡਾ: ਸੰਦੀਪ ਅਗਰਵਾਲ ਦੁਆਰਾ ਲਗਭਗ 55 ਬੱਚਿਆਂ ਦੀ ਜਾਂਚ ਕੀਤੀ ਗਈ | ਇਸ ਮੌਕੇ ਮਾਪਿਆਂ ਨੂੰ ਸੰਬੋਧਨ ਕਰਦੇ ਹੋਏ ਡਾ: ਗਰੋਵਰ ਨੇ ਬੱਚਿਆਂ 'ਚ ਐਲਰਜੀ ਵਾਲੀ ਰਾਈਨਾਈਟਿਸ (ਨੱਕ ਦੀ ਐਲਰਜੀ), ਦਮਾ ਅਤੇ ਹੋਰ ਐਲਰਜੀ ਨਾਲ ਸੰਬੰਧਿਤ ਬਿਮਾਰੀਆਂ ਦੀਆਂ ਵਧਦੀਆਂ ਘਟਨਾਵਾਂ 'ਤੇ ਚਿੰਤਾ ਪ੍ਰਗਟ ਕੀਤੀ | ਉਨ੍ਹਾਂ ਕਿਹਾ ਕਿ 14 ਸਾਲ ਤੋਂ ਘੱਟ ਉਮਰ ਦੇ ਲਗਭਗ 15-25 ਫ਼ੀਸਦੀ ਬੱਚੇ ਨੱਕ ਦੀ ਐਲਰਜੀ ਤੋਂ ਪੀੜਤ ਹਨ, ਜਦੋਂ ਕਿ 5-10 ਫ਼ੀਸਦੀ ਨੂੰ ਦਮਾ ਹੈ | ਉਨ੍ਹਾਂ ਨੇ ਦਮੇ ਦੇ ਇਲਾਜ 'ਚ ਨਿਯਮਤ ਇਨਹੇਲਰ ਦੀ ਵਰਤੋਂ ਦੀ ਮਹੱਤਤਾ ਬਾਰੇ ਵੀ ਜਾਣਕਾਰੀ ਦਿੱਤੀ |
