ਕੰਵਰਹਿੰਮਤ ਗੁਰਾਇਆ ਨੇ ਜ਼ਿਲ੍ਹਾ ਪੱਧਰੀ ਸ਼ੂਟਿੰਗ ਚੈਂਪੀਅਨਸ਼ਿਪ ’ਚ ਪਹਿਲਾ ਸਥਾਨ ਕੀਤਾ ਹਾਸਿਲ

ਬਟਾਲਾ, 30 ਜੂਨ (ਸਤਿੰਦਰ ਸਿੰਘ)-ਡ੍ਰਿਸਟ੍ਰਿਕ ਰਾਈਫਲ ਐਸ਼ੋਸੀਏਸ਼ਨ ਗੁਰਦਾਸਪੁਰ ਵਲੋਂ ਗੁਰਦਾਸਪੁਰ ਤੇ ਅੰਮ੍ਰਿਤਸਰ ਦੀ ਸਾਲਾਨਾ ਜ਼ਿਲ੍ਹਾ ਪੱਧਰੀ ਸ਼ੂਟਿੰਗ ਚੈਂਪੀਅਨਸ਼ਿਪ ਬਾਬਾ ਆਇਆ ਸਿੰਘ ਰਿਆੜਕੀ ਸਕੂਲ ਤੁਗਲਵਾਲ ਦੀ ਸ਼ੂਟਿੰਗ ਰੇਂਜ ਵਿਖੇ ਗੁਰਦਾਸਪੁਰ ਦੇ ਸਰਪ੍ਰਸਤ ਡਾ. ਬਲਜੀਤ ਸਿੰਘ ਸੇਖੋਂ ਦੀ ਅਗਵਾਈ ’ਚ ਕਰਵਾਈ ਗਈ। ਚੈਂਪੀਅਨਸ਼ਿਪ ’ਚ 167 ਤੋਂ ਵਧੇਰੇ ਗਿਣਤੀ ’ਚ ਲੜਕੇ-ਲੜਕੀਆਂ ਸ਼ੂਟਰਾਂ ਨੇ ਹਿੱਸਾ ਲਿਆ। ਚੈਂਪੀਅਨਸ਼ਿਪ ਦੇ ਰਾਇਫਲ 10 ਮੀਟਰ ਆਈ.ਐਸ.ਐਸ.ਐਫ. ਜੂਨੀਅਰ ਪੁਰਸ਼ ਵਰਗ ਤੇ 10 ਮੀਟਰ ਆਈ.ਐਸ.ਐਸ.ਐਫ. ਸੀਨੀਅਰ ਪੁਰਸ਼ ਵਰਗ ’ਚ ਮੈਂਬਰ ਸੂਬਾ ਸਲਾਹਕਾਰ ਬੋਰਡ ਪੰਜਾਬ ਹਰਮਨਜੀਤ ਸਿੰਘ ਗੁਰਾਇਆ ਦੇ ਬੇਟੇ ਕੰਵਰਹਿੰਮਤ ਗੁਰਾਇਆ ਨੇ ਵਧੀਆ ਪ੍ਰਦਰਸ਼ਨ ਕਰਦਿਆਂ ਪਹਿਲਾ ਸਥਾਨ ਪ੍ਰਾਪਤ ਕਰਕੇ 2 ਸੋਨ ਤਮਗੇ ਜਿੱਤੇ। ਕੰਵਰਹਿੰਮਤ ਗੁਰਾਇਆ ਨੂੰ ਐਸ਼ੋਸੀਏਸਨ ਅੰਮ੍ਰਿਤਸਰ ਦੇ ਸਰਪ੍ਰਸਤ ਭੁਪਿੰਦਰ ਸਿੰਘ ਸੇਖੋਂ, ਪ੍ਰਿੰਸੀਪਲ ਸਵਰਨ ਸਿੰਘ ਵਿਰਕ, ਗਗਨਦੀਪ ਸਿੰਘ ਵਿਰਕ ਜ਼ਿਲ੍ਹਾ ਪ੍ਰਧਾਨ, ਅੰਮ੍ਰਿਤਪਾਲ ਸਿੰਘ, ਮੈਂਬਰ ਸਤਿੰਦਰਪਾਲ ਸਿੰਘ, ਕੋਚ ਮਨਦੀਪ ਸਿੰਘ ਵਲੋਂ ਤਗਮਾ, ਟਰਾਫੀ, ਬੈਸਟ ਸ਼ੂਟਰ ਦਾ (ਸਰਟੀਫਿਕੇਟ) ਦਾ ਐਵਾਰਡ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾ ਵੀ ਕੰਵਰ ਹਿੰਮਤ ਗੁਰਾਇਆ ਨੇ ਜ਼ਿਲ੍ਹਾ ਪੱਧਰੀ, ਖੇਡਾ ਵਤਨ ਪੰਜਾਬ ਦੀਆਂ ਤੇ ਸਕੂਲੀ ਖੇਡਾਂ, ਰਾਜ ਪੱਧਰ ਦੀਆਂ ਖੇਡਾਂ ਤੋਂ ਇਲਾਵਾ ਰਾਸ਼ਟਰ ਪੱਧਰ ਵਿਚ ਸੋਨੇ, ਚਾਂਦੀ ਤੇ ਕਾਂਸੇ ਦੇ ਤਗਮੇ ਜਿੱਤ ਕੇ ਆਪਣੇ ਸੂਬੇ ਪੰਜਾਬ, ਮਾਪਿਆਂ ਤੇ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮ੍ਰਿਤਸਰ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਕੰਵਰਹਿੰਮਤ ਦੀ ਇਸ ਕਾਮਯਾਬੀ ’ਤੇ ਉਸ ਦੇ ਪਿਤਾ ਹਰਮਨਜੀਤ ਸਿੰਘ ਗੁਰਾਇਆ ਨੇ ਖੁਸ਼ੀ ਦਾ ਪ੍ਰਗਟਾਵਾ ਕਰਦਿਆਂ ਆਪਣੇ ਬੇਟੇ ਦੀ ਅਹਿਮ ਪ੍ਰਾਪਤੀ ’ਤੇ ਮਾਣ ਮਹਿਸੂਸ ਕੀਤਾ ਹੈ।