ਝਬਾਲ, 28 ਜਨਵਰੀ (ਸੁਖਦੇਵ ਸਿੰਘ)-ਸੜਕਾਂ ਦੇ ਫੁੱਟਪਾਥਾਂ 'ਤੇ ਦੁਕਾਨਦਾਰਾਂ, ਰੇਹੜੀ, ਰੇਹੜਿਆਂ ਤੇ ਫ਼ੜੀਆਂ ਵਾਲਿਆਂ ਵਲੋਂ ਕੀਤੇ ਗਏ ਨਾਜਾਇਜ਼ ਕਬਜਿਆਂ ਅਤੇ ਸੜਕਾਂ ਦੇ ਫੁੱਟਪਾਥਾਂ 'ਤੇ ਖੜਦੀਆਂ ਬੱਸਾਂ ਕਾਰਨ ਝਬਾਲ ਦੀ ਟ੍ਰੈਫਿਕ ਸਮੱਸਿਆ ਦਿਨੋਂ ਦਿਨ ਗੰਭੀਰ ਬਣਦੀ ਜਾ ਰਹੀ ਹੈ | ਨਾਜਾਇਜ਼ ਕਬਜ਼ਿਆਂ ਕਾਰਨ ਸੁੰਗੜੀਆਂ ਸੜਕਾਂ 'ਤੇ ਸਕੂਲੀ ਵੈਨਾਂ, ਐਂਬੂਲੈਂਸਾਂ ਸਮੇਤ ਵਾਹਨਾਂ ਨੂੰ ਕਈ-ਕਈ ਘੰਟੇ ਜਾਮ ਵਿਚ ਖੜਨਾ ਪੈਂਦਾ ਹੈ | ਇਥੋਂ ਤੱਕ ਕਿ ਆਵਾਜਾਈ ਤੋਂ ਰਾਹਗੀਰਾਂ ਨੂੰ ਨਿਜਾਤ ਦਿਵਾਉਣ ਵਾਲੇ ਪੁਲਿਸ ਪ੍ਰਸ਼ਾਸਨ ਦੇ ਵਾਹਨ ਵੀ ਅਵਾਜਾਈ ਦੀ ਸਮੱਸਿਆ ਨਾਲ ਜੂਝ ਰਹੇ ਹਨ | ਦੁਕਾਨਦਾਰਾਂ ਵਲੋਂ ਆਪੋ ਆਪਣੀਆਂ ਦੁਕਾਨਾਂ ਦੇ ਬਾਹਰ ਕਿਰਾਏ 'ਤੇ ਲਗਵਾਈਆਂ ਗਈਆਂ ਰੇੜੀਆਂ, ਫੜੀਆਂ ਅਵਾਜਾਈ ਵਿਚ ਭਾਰੀ ਵਿਘਣ ਪਾ ਰਹੀਆਂ ਹਨ | ਬੱਸ ਅਪਰੇਟਰਾਂ ਵਲੋਂ ਬੱਸਾਂ ਬੱਸ ਅੱਡੇ ਵਿਚ ਖੜੀਆਂ ਕਰ ਦੀ ਬਜਾਏ ਸੜਕ ਦੇ ਫੁੱਟਪਾਥਾਂ ਤੇ ਝਬਾਲ ਚੌਂਕ ਵਿਚ ਖੜੀਆਂ ਕਰਨ ਨਾਲ ਲੰਮੇ ਜਾਮ ਲੱਗ ਰਹੇ ਹਨ | ਇੱਥੇ ਕਰੋੜਾਂ ਰੁਪਏ ਦੀ ਲਾਗਤ ਨਾਲ ਬਣਾਏ ਗਏ ਬੱਸ ਅੱਡੇ ਵਿਚ ਬੱਸਾਂ ਦਾ ਦਾਖਲਾ ਲਾਜ਼ਮੀ ਬਣਾਉਣ ਲਈ ਸਿਵਲ ਤੇ ਪੁਲੀਸ ਪ੍ਰਸ਼ਾਸਨ ਵਲੋਂ ਸਖ਼ਤ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਸਨ, ਪਰ ਇਨਾਂ ਹਦਾਇਤਾਂ ਦੇ ਬਾਵਜੂਦ ਵੀ ਕੋਈ ਬੱਸ ਅੱਡੇ ਵਿਚ ਦਾਖਲ ਨਹੀਂ ਹੋਈ | ਵੱਖ-ਵੱਖ ਪਾਰਟੀਆਂ ਦੇ ਆਗੂਆਂ ਨੇ ਸੜਕਾਂ ਦੁਆਲੇ ਕੀਤੇ ਗਏ ਨਾਜਾਇਜ਼ ਕਬਜ਼ਿਆਂ ਨੂੰ ਹਟਾਉਣ ਅਤੇ ਬੱਸਾਂ ਨੂੰ ਬੱਸ ਅੱਡੇ ਵਿਚ ਖੜੀਆਂ ਕਰਵਾਉਣ ਦੀ ਸਿਵਲ ਤੇ ਪੁਲਿਸ ਪ੍ਰਸ਼ਾਸਨ ਦੇ ਉੱਚ ਅਧਿਕਾਰੀਆਂ ਕੋਲੋਂ ਮੰਗ ਕੀਤੀ ਹੈ, ਤਾਂ ਜੋ ਨਾਜਾਇਜ਼ ਕਬਜ਼ਿਆਂ ਕਾਰਨ ਵਾਪਰ ਰਹੇ ਹਦਾਸਿਆਂ ਨੂੰ ਰੋਕਿਆ ਜਾ ਸਕੇ |
