ਝਬਾਲ, 9 ਮਈ (ਸੁਖਦੇਵ ਸਿੰਘ)-ਝਬਾਲ ਤੇ ਇਸ ਦੇ ਨਾਲ ਲਗਦੇ ਪੇਂਡੂ ਖੇਤਰਾਂ 'ਚ ਸਮੇਂ ਦੀਆਂ ਸਰਕਾਰਾਂ ਵਲੋਂ ਲੱਖਾਂ ਰੁਪਏ ਖਰਚ ਕਰਕੇ ਬਣਾਈਆਂ ਗਈਆਂ ਸਰਕਾਰੀ ਇਮਾਰਤਾਂ ਸਰਕਾਰ ਤੇ ਸੰਬੰਧਿਤ ਮਹਿਕਮਿਆਂ ਦੀ ਬੇਤਰਤੀਬੀ ਨੀਤੀ ਦੀ ਗਵਾਹੀ ਭਰਦਿਆਂ ਵੱਸਣ ਤੋਂ ਪਹਿਲਾਂ ਹੀ ਉਜੜ ਗਈਆ ਹਨ | ਇਸ ਵੇਲੇ ਖ਼ਸਤਾ ਹਾਲਤ 'ਚ ਪੁੱਜੀਆਂ ਇਹ ਇਮਾਰਤਾਂ ਪਸ਼ੂ, ਪੰਛੀਆਂ ਦਾ ਰੈਣ ਬਸੇਰਾ ਤੇ ਨਸ਼ੇੜੀਆਂ ਦਾ ਅੱਡਾ ਬਣੀਆਂ ਹੋਈਆਂ ਹਨ | 1995 ਵਿਚ ਮਰਹੂਮ ਮੁੱਖ ਮੰਤਰੀ ਬੇਅੰਤ ਸਿੰਘ ਦੀ ਸਰਕਾਰ ਵੇਲੇ ਗੱਗੋਬੂਹਾ ਕਾਨੂੰਗੋਈ ਲਈ 30ਪਿੰਡਾਂ ਦੇ ਲੋਕਾਂ ਦੀ ਸਹੂਲਤ ਲਈ ਪਿੰਡ ਪੰਜਵੜ੍ਹ ਵਿਖੇ ਸਾਢੇ ਅੱਠ ਲੱਖ ਰੁਪਏ ਦੀ ਲਾਗਤ ਨਾਲ ਸੈਂਟਰਲ ਪਟਵਾਰਖਾਨਾ ਬਣਾਇਆ ਗਿਆ ਸੀ, ਜਿਸ 'ਚ 10 ਪਟਵਾਰੀ ਤੇ ਇਕ ਕਾਨੂੰਗੋ ਦੇ ਬੈਠਣ ਲਈ ਕਮਰੇ ਬਣਾਏ ਗਏ ਸਨ ਪਰ ਇਥੇ ਪਟਵਾਰੀਆ ਦੇ ਨਾ ਬੈਠਣ ਕਾਰਨ ਲੋਕ ਇਸ ਦੇ ਬੂਹੇ ਬਾਰੀਆਂ ਉਖੇੜ ਕੇ ਘਰਾਂ ਨੂੰ ਲੈ ਗਏ ਹਨ | ਖੰਡਰ ਬਣੀ ਹੋਈ ਇਮਾਰਤ ਪਸ਼ੂ-ਪੰਛੀਆਂ ਦਾ ਰੈਣ ਬਸੇਰਾ ਤੇ ਨਸ਼ੇੜੀਆਂ ਦਾ ਅੱਡਾ ਬਣੀ ਹੋਈ ਹੈ | ਇਸੇ ਤਰ੍ਹਾਂ ਹੀ ਪੰਜਾਬ ਰਾਜ ਦੇ ਦਿਹਾਤੀ ਖੇਤਰਾਂ 'ਚ ਬਣੇ ਮਾਰਕਫੈੱਡ ਕੋਆਪਰੇਟਿਵ ਸੁਸਾਇਟੀ ਦੇ ਫੋਕਲ ਪੁਆਇੰਟ ਸੰਬੰਧਿਤ ਮਹਿਕਮਿਆਂ ਦੀ ਬੇਤਰਤੀਬੀ ਨੀਤੀ ਦੀ ਗਵਾਹੀ ਭਰਦਿਆਂ ਖੰਡਰ ਬਣ ਗਏ ਹਨ | ਲਗਪਗ 45 ਕੁ ਸਾਲ ਪਹਿਲਾਂ ਪਿੰਡ ਢੰਡ ਵਿਖੇ 6 ਏਕੜ ਜ਼ਮੀਨ 'ਚ ਫੋਕਲ ਪੁਆਇੰਟ ਜਿਸ 'ਚ ਇਕ ਮਾਰਕਫੈੱਡ ਤੇ ਇਕ ਕੋਆਪਰੇਟਿਵ ਸੁਸਾਇਟੀ ਦਾ ਗੁਦਾਮ ਬਣਾਇਆ ਗਿਆ ਸੀ, ਪਰ ਸੰਬੰਧਿਤ ਮਹਿਕਮਿਆਂ ਵਲੋਂ ਇਨਾਂ ਦੀ ਵਰਤੋਂ ਨਾ ਕਰਨ ਕਰਕੇ ਇਹ ਇਮਾਰਤਾਂ ਢਹਿ ਢੇਰੀ ਹੋ ਗਈਆ ਹਨ | ਇਨਾਂ ਇਮਾਰਤਾਂ ਤੇ ਇਸ ਵੇਲੇ ਪ੍ਰਵਾਸੀ ਮਜ਼ਦੂਰਾਂ ਦਾ ਕਬਜ਼ਾ ਹੈ | ਲੋਕਾਂ ਦਾ ਕਹਿਣਾ ਹੈ ਕਿ ਲੱਖਾਂ ਰੁਪਏ ਖਰਚ ਕਰਕੇ ਬਣਾਈਆਂ ਗਈਆਂ ਸਰਕਾਰੀ ਇਮਾਰਤਾਂ ਨੂੰ ਜੇਕਰ ਵਰਤੋਂ ਵਿਚ ਨਹੀਂ ਸੀ ਲਿਆਉਣਾ ਤਾਂ ਫਿਰ ਸੂਬੇ ਦਾ ਸ਼ਰਮਾਇਆ ਕਿਉਂ ਬਰਬਾਦ ਕੀਤਾ ਗਿਆ ਹੈ |
