ਖੇਮਕਰਨ, 21 ਮਈ (ਰਾਕੇਸ਼ ਬਿੱਲਾ)-ਪਾਵਰਕਾਮ ਦੇ ਪਿੰਡ ਭੂਰਾ ਕਰੀਮਪੁਰਾ 'ਚ ਡਿਊਟੀ 'ਤੇ ਤਾਇਨਾਤ ਮੁਲਾਜ਼ਮ 'ਤੇ ਜਾਨਲੇਵਾ ਹਮਲਾ ਕਰਨ ਵਾਲੇ ਵਿਅਕਤੀਆਂ ਵਿਰੁੱਧ ਪੁਲਿਸ ਦੀ ਢਿੱਲੀ ਕਾਰਵਾਈ ਨੂੰ ਲੈ ਕੇ ਬਿਜਲੀ ਮੁਲਾਜ਼ਮਾਂ 'ਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ | ਬਿਜਲੀ ਮੁਲਾਜ਼ਮਾਂ ਨੇ ਸੰਬੰਧਿਤ ਥਾਣਾ ਖੇਮਕਰਨ ਦੇ ਇੰਚਾਰਜ ਨੂੰ ਚਿਤਾਵਨੀ ਵੀ ਦਿੱਤੀ ਕਿ ਨਾਮਜ਼ਦ ਮੁਲਾਜ਼ਮਾਂ ਵਿਰੁੱਧ ਜੇਕਰ ਤੁਰੰਤ ਕੋਈ ਕਾਰਵਾਈ ਨਾ ਕੀਤੀ ਤਾਂ ਸੂਬਾ ਪੱਧਰ 'ਤੇ ਬਿਜਲੀ ਮੁਲਾਜ਼ਮ ਸੰਘਰਸ਼ ਕਰਨ ਲਈ ਮਜ਼ਬੂਰ ਹੋ ਜਾਣਗੇ | ਇਸ ਸੰਬੰਧੀ ਸਬ ਡਵੀਜ਼ਨ ਖੇਮਕਰਨ ਦੇ ਪ੍ਰਧਾਨ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਬਿਜਲੀ ਘਰ ਪਿੰਡ ਭੂਰਾ ਕਰੀਮਪੁਰਾ 'ਚ ਤਾਇਨਾਤ ਇਕੱਲੇ ਏ.ਐਲ.ਐਮ. ਗੁਰਸੇਵਕ ਸਿੰਘ ਨੂੰ ਰਾਤ ਸਮੇਂ ਪਾਵਰ ਸਟੇਸ਼ਨਾਂ ਵਿਚ ਦਾਖ਼ਲ ਹੋ ਕੇ ਤਿੰਨ ਵਿਅਕਤੀਆਂ ਮੱਲਕ ਸਿੰਘ, ਸ਼ੱਬਾ ਸਿੰਘ ਤੇ ਮਲਕੀਤ ਸਿੰਘ ਵਾਸੀ ਪਿੰਡ ਭੂਰਾ ਕਰੀਮਪੁਰਾ ਨੇ ਬਹੁਤ ਕੁੱਟਮਾਰ ਕੀਤੀ ਹੈ | ਡਿਊਟੀ ਮੁਲਾਜ਼ਮ ਨਾਲ ਬੈਠੇ ਇਕ ਪ੍ਰਾਈਵੇਟ ਵਿਅਕਤੀ ਭੋਲਾ ਸਿੰਘ ਨੂੰ ਵੀ ਕੁੱਟਿਆ | ਮੁਲਾਜ਼ਮਾਂ ਵਲੋਂ ਹਮਲਾਵਰਾ ਵਿਰੁੱਧ ਬਣਦੀ ਕਨੂੰਨੀ ਕਾਰਵਾਈ ਨੂੰ ਲੈ ਕੇ ਪਾਵਰਕਾਮ ਦੇ ਅਧਿਕਾਰੀਆਂ ਵਲੋਂ ਲਿਖਤੀ ਸ਼ਿਕਾਇਤ ਸੰਬੰਧਿਤ ਥਾਣਾ ਖੇਮਕਰਨ ਦਿੱਤੀ ਹੋਈ ਹੈ, ਪਰ ਅਫਸੋਸ ਪੁਲਿਸ ਹਮਲਾਵਰਾਂ ਵਿਰੁੱਧ ਕੋਈ ਕਾਰਵਾਈ ਨਹੀਂ ਕਰ ਰਹੀ | ਬਿਜਲੀ ਘਰ ਖੇਮਕਰਨ ਦੇ ਸਮੂਹ ਮੁਲਾਜ਼ਮਾਂ ਨੇ ਮੰਗ ਕੀਤੀ ਕਿ ਹਮਲਾਵਰਾਂ ਵਿਰੁੱਧ ਕਾਰਵਾਈ ਕੀਤੀ ਜਾਵੇ | ਇਸ ਸੰਬੰਧੀ ਥਾਣਾ ਖੇਮਕਰਨ ਦੇ ਅਧਿਕਾਰੀ ਨੇ ਦੱਸਿਆ ਕਿ ਛੇਤੀ ਹਮਲਾਵਰ ਕਾਬੂ ਕਰ ਲਏ ਜਾਣਗੇ |
