ਪਰਮਵੀਰ ਚੱਕਰ ਵਿਜੇਤਾ ਸ਼ਹੀਦ ਅਬਦੁੱਲ ਹਮੀਦ ਤੇ ਸਾਥੀਆਂ ਦੀ ਯਾਦ ’ਚ ਬਣਨ ਵਾਲਾ ਸੀ-ਪਾਈਟ ਸਿਖਲਾਈ ਕੇਂਦਰ ਕਦੋਂ ਬਣੇਗਾ
ਅਜੀਤ ਡੈਸਕ
29-07-2026
ਸਾਬਕਾ ਕਾਂਗਰਸੀ ਵਿਧਾਇਕ ਸੁਖਪਾਲ ਸਿੰਘ ਭੁੱਲਰ ਦਾ ਪ੍ਰਤੀਕਰਮ
ਇਸ ਯਾਦਗਾਰ ਸੰਬੰਧੀ ਜਦ ਹਲਕੇ ਦੇ ਸਾਬਕਾ ਵਿਧਾਇਕ ਸੁਖਪਾਲ ਸਿੰਘ ਭੁੱਲਰ ਦੇ ਧਿਆਨ ’ਚ ਲਿਆਂਦਾ ਤਾਂ ਉਨ੍ਹਾਂ ਦੱਸਿਆ ਕਿ ਪੰਜਾਬ ਦੇ ਉਸ ਸਮੇਂ ਦੇ ਮੁੱਖ ਮੰਤਰੀ ਕੈਂਪ ਅਮਰਿੰਦਰ ਸਿੰਘ ਜਿਹੜੇ ਖੁਦ ਕਈ ਵਾਰ ਪਿੰਡ ਆਸਲ ਉਤਾੜ ਜੰਗੀ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਦੇਣ ਲਈ ਆਉਂਦੇ ਸਨ, ਉਨ੍ਹਾਂ ਦੇ ਯਤਨਾਂ ਸਦਕਾ ਇਹ ਸੀ-ਪਾਈਟ ਸਿਖਲਾਈ ਕੇਦਰ ਦਾ ਨੀਂਹ ਪੱਥਰ ਰੱਖਿਆ ਗਿਆ ਸੀ। ਉਨ੍ਹਾਂ ਦੀ ਦਿਲੀ ਇੱਛਾ ਸੀ ਕਿ ਇਸ ਸ਼ਹੀਦਾਂ ਦੀ ਧਰਤੀ ’ਤੇ ਸਾਡੇ ਨੌਜਵਾਨਾਂ ਨੂੰ ਫ਼ੌਜ ’ਚ ਭਰਤੀ ਕਰਨ ਲਈ ਸਿਖਲਾਈ ਕੈਂਪ ਬਣੇ। ਇਸ ਕਰਕੇ ਕਾਂਗਰਸ ਸਰਕਾਰ ਨੇ ਇਹ ਪ੍ਰਾਜੈਕਟ ਮਨਜ਼ੂਰ ਕੀਤਾ ਸੀ ਤੇ ਉਸ ਸਮੇਂ ਤੁਰੰਤ ਨਿਰਮਾਣ ਵੀ ਚੱਲ ਪਿਆ ਸੀ, ਪਰ ਦੁੱਖ ਹੈ ਕਿ ਜਿਹੜੀ ਪਾਰਟੀ ਸ਼ਹੀਦਾਂ ਦੇ ਨਾਂਅ ’ਤੇ ਵੋਟਾਂ ਲੈ ਕੇ ਸੱਤਾ ’ਚ ਆਈ। ਇਸ ਸਰਕਾਰ ਦੇ ਰਾਜ ’ਚ ਇਕ ਇੱਟ ਨਹੀਂ ਲੱਗੀ, ਸਾਰਾ ਕੰਮ ਠੱਪ ਕਰ ਦਿੱਤਾ ਹੈ। ਸਾਬਕਾ ਵਿਧਾਇਕ ਭੁੱਲਰ ਨੇ ਦਾਅਵਾ ਕੀਤਾ ਕਿ ਪੰਜਾਬ ’ਚ ਅਗਲੀ ਸਰਕਾਰ ਕਾਂਗਰਸ ਪਾਰਟੀ ਦੀ ਯਕੀਨੀ ਹੈ। ਫਿਰ ਕਾਂਗਰਸ ਸਰਕਾਰ ਛੇਤੀ ਤੋਂ ਛੇਤੀ ਇਹ ਕੇਦਰ ਬਣਾਏਗੀ।
ਹਲਕਾ ਵਿਧਾਇਕ ਸਰਵਨ ਸਿੰਘ ਧੁੰਨ ਨੇ ਇਸ ਸੰਬੰਧੀ ਗੱਲ ਕਰਦਿਆਂ ਦੱਸਿਆ ਕਿ ਪਿਛਲੀ ਕਾਂਗਰਸ ਸਰਕਾਰ ਨੇ ਉਸ ਸਮੇ ਇਸ ਸਿਖਲਾਈ ਕੇਂਦਰ ਦਾ ਕੰਮ ਵਾਹ-ਵਾਹ ਖੱਟਣ ਲਈ ਬਹੁਤ ਕਾਹਲੀ ’ਚ ਕੀਤਾ, ਪਰ ਉਸਾਰੀ ਲਈ ਚਾਹੀਦੇ ਕਰੋੜਾਂ ਦੇ ਫੰਡਾਂ ਦਾ ਕੋਈ ਪ੍ਰਬੰਧ ਨਹੀਂ ਕੀਤਾ ਸੀ। ਸਿਰਫ ਸਰਕਾਰ ਨੇ ਆਪਣੇ ਅਖੀਰਲੇ ਸਮੇਂ ਪਿੰਡ ਦੀ ਪੰਚਾਇਤੀ ਜ਼ਮੀਨ ਨੂੰ ਕਵਰ ਕਰਨ ਦਾ ਹੀ ਕੰਮ ਕੀਤਾ ਸੀ। ਹੁਣ ਤੱਕ ਜਿਹੜਾ ਵੀ ਕੰਮ ਹੋਇਆ ਹੈ, ਉਹ ‘ਆਪ’ ਸਰਕਾਰ ਦੇ ਰਾਜ ਦੌਰਾਨ ਹੀ ਹੋਇਆ ਹੈ। ਸੀ-ਪਾਈਟ ਦੇ ਨਿਰਮਾਣ ਦਾ ਕੰਮ ਬੰਦ ਨਹੀਂ ਹੈ। ਉਹ ਛੇਤੀ ਸਰਕਾਰ ਦੇ ਧਿਆਨ ’ਚ ਲਿਆ ਕੇ ਆ ਰਹੇ ਸ਼ਹੀਦੀ ਸਮਾਗਮ ਤੱਕ ਇਸ ਪ੍ਰਾਜੈਕਟ ਦੇ ਕੰਮ ਨੂੰ ਮੁੜ ਤੇਜ਼ੀ ਨਾਲ ਚਾਲੂ ਕਰਵਾਉਣਗੇ।
