ਖੰਨਾ, 25 ਮਈ (ਹਰਜਿੰਦਰ ਸਿੰਘ ਲਾਲ)- ਖੰਨਾ ਵਿੱਚ ਫ਼ਿਲਮੀ ਅੰਦਾਜ਼ ਵਿੱਚ ਲੁੱਟ-ਖੋਹ ਦੀ ਵਾਰਦਾਤ ਸਾਹਮਣੇ ਆਈ ਹੈ | ਮਹਿਲਾ ਵਕੀਲ ਦੇ ਭਰਾ ਨੂੰ ਇੰਸ਼ੋਰੈਂਸ ਕਰਵਾਉਣ ਦੇ ਬਹਾਨੇ ਬੁਲਾ ਕੇ ਬਦਮਾਸ਼ਾਂ ਨੇ ਕਾਰ 'ਚ ਬਿਠਾਇਆ ਅਤੇ ਉਸ ਉੱਪਰ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕੀਤਾ | ਨੌਜਵਾਨ ਨੇ ਆਪਣੀ ਜਾਨ ਬਚਾਉਣ ਲਈ ਚੱਲਦੀ ਕਾਰ ਵਿਚੋਂ ਛਾਲ ਮਾਰ ਕੇ ਜਾਨ ਬਚਾਈ | ਬੀਤੇ ਦਿਨ ਖੰਨਾ ਵਿੱਚ ਇੱਕ ਬੀਮਾ ਏਜੰਟ ਨੂੰ ਜ਼ਬਰਦਸਤੀ ਕਾਰ 'ਚ ਬਿਠਾ ਕੇ ਲੁੱਟ ਲਿਆ ਗਿਆ | ਹਮਲਾਵਰਾਂ ਨੇ ਉਸ ਨੰੂ ਜ਼ਬਰਦਸਤੀ ਕਾਰ 'ਚ ਬਿਠਾਇਆ ਅਤੇ ਉਸ ਦੀ ਚੇਨ ਖੋਹ ਲਈ | ਪੀੜਤ ਨੂੰ ਆਪਣੀ ਜਾਨ ਬਚਾਉਣ ਲਈ ਚਲਦੀ ਕਾਰ ਤੋਂ ਛਾਲ ਮਾਰਨੀ ਪਈ | ਇਹ ਸਾਰੀ ਘਟਨਾ ਸੀ. ਸੀ. ਟੀ. ਵੀ ਵਿੱਚ ਕੈਦ ਹੋ ਗਈ | ਜ਼ਖਮੀ ਵਿਅਕਤੀ ਨੂੰ ਸਿਵਲ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ | ਪੀੜਤ ਨਿਤੀਸ਼ ਗੋਇਲ ਨੇ ਦੱਸਿਆ ਕਿ ਉਹ ਇੱਕ ਬੀਮਾ ਕੰਪਨੀ ਵਿੱਚ ਏਜੰਟ ਵਜੋਂ ਕੰਮ ਕਰਦਾ ਹੈ | ਕਿਸੇ ਨੇ ਉਸ ਨੰੂ ਆਪਣੀ ਗੱਡੀ ਦਾ ਬੀਮਾ ਕਰਵਾਉਣ ਦੇ ਬਹਾਨੇ ਸਮਰਾਲਾ ਰੋਡ 'ਤੇ ਖਾਟੂ ਧਾਮ ਨੇੜੇ ਬੁਲਾਇਆ | ਨਿਤੀਸ਼ ਆਪਣੀ ਬਾਈਕ 'ਤੇ ਪਹੁੰਚਿਆ, ਜਿੱਥੇ ਇੱਕ ਕਾਰ ਵਿੱਚ ਸਵਾਰ 2 ਨੌਜਵਾਨ ਆਏ ਅਤੇ ਗੱਲਾਂ ਕਰਨ ਦੇ ਬਹਾਨੇ ਉਸ ਨੰੂ ਅਗਲੀ ਸੀਟ 'ਤੇ ਜ਼ਬਰਦਸਤੀ ਬਿਠਾ ਦਿੱਤਾ | ਨਿਤੀਸ਼ ਦੇ ਅਨੁਸਾਰ, ਥੋੜ੍ਹੀ ਦੂਰੀ 'ਤੇ ਗੱਡੀ ਚਲਾਉਣ ਤੋਂ ਬਾਅਦ, ਮੁਲਜ਼ਮਾਂ ਨੇ ਅਚਾਨਕ ਉਸ 'ਤੇ ਹਮਲਾ ਕਰ ਦਿੱਤਾ | ਉਨ੍ਹਾਂ ਨੇ ਉਸ ਦੇ ਗਲੇ 'ਚੋਂ ਚੇਨ ਖੋਹ ਲਈ ਅਤੇ ਉਸ ਨੰੂ ਕੁੱਟਣਾ ਸ਼ੁਰੂ ਕਰ ਦਿੱਤਾ | ਝੜਪ ਦੌਰਾਨ, ਉਸ ਦੀ ਲੱਤ ਕਾਰ ਦੇ ਸਟੀਅਰਿੰਗ ਵੀਲ੍ਹ ਨਾਲ ਟਕਰਾ ਗਈ, ਜਿਸ ਕਾਰਨ ਕਾਰ ਸੰਤੁਲਨ ਗੁਆ ਬੈਠੀ ਅਤੇ ਖਿੜਕੀ ਖੁੱਲ੍ਹ ਗਈ | ਇਸ ਮੌਕੇ ਦਾ ਫ਼ਾਇਦਾ ਉਠਾ ਕੇ ਨਿਤੀਸ਼ ਨੇ ਚੱਲਦੀ ਕਾਰ ਤੋਂ ਛਾਲ ਮਾਰ ਦਿੱਤੀ ਅਤੇ ਆਪਣੀ ਜਾਨ ਬਚਾਈ | ਘਟਨਾ ਤੋਂ ਬਾਅਦ, ਰਾਹਗੀਰਾਂ ਦੀ ਮਦਦ ਨਾਲ, ਜ਼ਖਮੀ ਨਿਤੀਸ਼ ਨੂੰ ਸਿਵਲ ਹਸਪਤਾਲ ਲਿਜਾਇਆ ਗਿਆ | ਨਿਤੀਸ਼ ਦੀ ਭੈਣ, ਰਿਤਿਕਾ ਗੋਇਲ, ਜੋ ਕਿ ਇੱਕ ਮਹਿਲਾ ਵਕੀਲ ਹੈ, ਨੇ ਪੁਲਿਸ ਤੋਂ ਮੰਗ ਕੀਤੀ ਹੈ ਕਿ ਦੋਸ਼ੀ ਨੂੰ ਜਲਦੀ ਤੋਂ ਜਲਦੀ ਗਿ੍ਫ਼ਤਾਰ ਕੀਤਾ ਜਾਵੇ | ਸਦਰ ਪੁਲਿਸ ਸਟੇਸ਼ਨ ਦੇ ਐਸ. ਐਚ. ਓ ਸੰਦੀਪ ਕੁਮਾਰ ਨੇ ਕਿਹਾ ਕਿ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ | ਪੁਲਿਸ ਨੇ ਨੇੜਲੇ ਸੀ. ਸੀ. ਟੀ. ਵੀ ਕੈਮਰਿਆਂ ਦੀ ਫੁਟੇਜ ਜ਼ਬਤ ਕਰ ਲਈ ਹੈ | ਫੁਟੇਜ ਵਿੱਚ ਕਾਰ ਦਿਖਾਈ ਦੇ ਰਹੀ ਹੈ, ਪਰ ਇਸਦਾ ਨੰਬਰ ਸਪਸ਼ਟ ਨਹੀਂ ਹੈ | ਪੁਲਿਸ ਦੋਸ਼ੀਆਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਨੂੰ ਗਿ੍ਫ਼ਤਾਰ ਕਰਨ ਲਈ ਲਗਾਤਾਰ ਕੰਮ ਕਰ ਰਹੀ ਹੈ ਅਤੇ ਉਨ੍ਹਾਂ ਨੂੰ ਜਲਦੀ ਹੀ ਗਿ੍ਫ਼ਤਾਰ ਕਰ ਲਿਆ ਜਾਵੇਗਾ |
