ਮਹਿਲਾ ਦੀਆਂ ਗੱਲਾਂ 'ਚ ਆਇਆ ਸੀਨੀਅਰ ਸਿਟੀਜ਼ਨ, 5 ਸਾਲਾਂ 'ਚ 60 ਲੱਖ ਰੁਪਏ ਦੀ ਸਾਈਬਰ ਠੱਗੀ <br/>

ਅ

ਅਜੀਤ ਡੈਸਕ 04-02-2026

ਚੰਡੀਗੜ੍ਹ, 3 ਫਰਵਰੀ (ਕਪਿਲ ਵਧਵਾ)-ਸਾਈਬਰ ਠਗਾਂ ਵਲੋਂ ਬੀਮਾ ਪਾਲਿਸੀ ਦੇ ਨਾਮ 'ਤੇ ਚੰਡੀਗੜ੍ਹ ਦੇ ਇਕ 66 ਸਾਲਾ ਸੀਨੀਅਰ ਸਿਟੀਜਨ ਨੂੰ ਪੰਜ ਸਾਲਾਂ ਤੱਕ ਆਪਣੇ ਜਾਲ 'ਚ ਫਸਾ ਕੇ ਕਰੀਬ 60 ਲੱਖ ਰੁਪਏ ਦੀ ਠੱਗੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਪੀੜਤ ਬਜ਼ੁਰਗ ਨੇ ਇਸ ਸਬੰਧੀ ਸੈਕਟਰ-17 ਸਥਿਤ ਸਾਈਬਰ ਕ੍ਰਾਈਮ ਥਾਣੇ 'ਚ ਸ਼ਿਕਾਇਤ ਦਰਜ ਕਰਵਾਈ ਹੈ | ਜਾਣਕਾਰੀ ਅਨੁਸਾਰ ਪੀੜਤ ਸੈਕਟਰ-40 ਦਾ ਰਹਿਣ ਵਾਲਾ ਹੈ | ਪੀੜਤ ਨੇ ਦੱਸਿਆ ਕਿ ਸਤੰਬਰ 2020 ਵਿਚ ਉਸਨੂੰ ਇਕ ਮਹਿਲਾ ਦਾ ਫੋਨ ਆਇਆ, ਜਿਸਨੇ ਆਪਣੇ ਆਪ ਨੂੰ ਇਕ ਬੀਮਾ ਕੰਪਨੀ ਨਾਲ ਜੁੜਿਆ ਹੋਇਆ ਦੱਸਦਿਆਂ ਉਸ ਤੋਂ ਪਤਾ, ਜਨਮ ਤਾਰੀਖ, ਆਧਾਰ ਨੰਬਰ, ਪੈਨ ਨੰਬਰ ਅਤੇ ਪਾਲਿਸੀ ਨੰਬਰ ਵਰਗੀ ਨਿੱਜੀ ਜਾਣਕਾਰੀ ਹਾਸਲ ਕਰ ਲਈ |
ਇਸ ਤੋਂ ਬਾਅਦ ਵੱਖ-ਵੱਖ ਮੋਬਾਈਲ ਨੰਬਰਾਂ ਤੋਂ ਉਸਨੂੰ ਲਗਾਤਾਰ ਕਾਲਾਂ ਆਉਣ ਲੱਗ ਪਈਆਂ | ਕਾਲ ਕਰਨ ਵਾਲੇ ਆਪਣੇ ਆਪ ਨੂੰ ਬੀਮਾ ਕੰਪਨੀ ਦਾ ਰਿਲੇਸ਼ਨਸ਼ਿਪ ਮੈਨੇਜਰ ਦੱਸਦੇ ਰਹੇ ਅਤੇ ਪਾਲਿਸੀ ਦੀ ਪੈਂਡਿੰਗ ਰਕਮ ਜਮ੍ਹਾਂ ਕਰਵਾਉਣ ਦੇ ਬਹਾਨੇ ਨਾਲ ਪੀੜਤ ਤੋਂ ਵੱਖ-ਵੱਖ ਬੈਂਕ ਖਾਤਿਆਂ 'ਚ ਪੈਸੇ ਟਰਾਂਸਫ਼ਰ ਕਰਵਾਉਂਦੇ ਰਹੇ | ਪੀੜਤ ਅਨੁਸਾਰ 28 ਸਤੰਬਰ 2024 ਨੂੰ ਵੀ ਉਸ ਤੋਂ 15,624 ਰੁਪਏ ਜਮ੍ਹਾਂ ਕਰਵਾਏ ਗਏ | ਇਸ ਤਰ੍ਹਾਂ ਸਤੰਬਰ 2020 ਤੋਂ 2025 ਤੱਕ ਪੀੜਤ ਨੇ ਆਰ.ਟੀ.ਜੀ.ਐੱਸ. ਰਾਹੀਂ ਕਰੀਬ 60 ਲੱਖ ਰੁਪਏ ਵੱਖ-ਵੱਖ ਖਾਤਿਆਂ 'ਚ ਭੇਜ ਦਿੱਤੇ | ਬਾਅਦ 'ਚ ਉਸਨੂੰ ਆਪਣੇ ਨਾਲ ਹੋਈ ਠੱਗੀ ਦਾ ਅਹਿਸਾਸ ਹੋਇਆ | ਪੀੜਤ ਨੇ ਪੁਲਿਸ ਨੂੰ ਠੱਗਾਂ ਦੇ ਮੋਬਾਈਲ ਨੰਬਰ ਵੀ ਸੌਂਪੇ ਹਨ | ਸਾਈਬਰ ਕ੍ਰਾਈਮ ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ |