ਡੇਰਾਬੱਸੀ, 21 ਅਪ੍ਰੈਲ (ਗੁਰਮੀਤ ਸਿੰਘ)-ਡੇਰਾਬੱਸੀ ਵਿਖੇ ਥਾਂ-ਥਾਂ 'ਤੇ ਟੁੱਟੇ ਮੇਨਹੋਲਾਂ ਦੇ ਢੱਕਣ ਘਟੀਆ ਸਮੱਗਰੀ ਵਰਤੇ ਜਾਣ ਵੱਲ ਇਸ਼ਾਰਾ ਕਰ ਰਹੇ ਹਨ, ਪਰ ਇਸ ਦੇ ਬਾਵਜੂਦ ਡੇਰਾਬੱਸੀ ਪ੍ਰਸ਼ਾਸਨ ਇਸ ਪਾਸੇ ਕੋਈ ਧਿਆਨ ਨਹੀਂ ਦੇ ਰਿਹਾ | ਟੁੱਟੇ ਮੇਨਹੋਲ ਰੋਜ਼ਾਨਾ ਹੀ ਹਾਦਸਿਆਂ ਦਾ ਕਾਰਨ ਬਣ ਰਹੇ ਹਨ ਅਤੇ ਲੋਕਾਂ ਦੇ ਮਹਿੰਗੇ ਵਾਹਨ ਨੁਕਸਾਨੇ ਜਾ ਰਹੇ ਹਨ, ਪਰ ਡੇਰਾਬੱਸੀ ਦੇ ਅਧਿਕਾਰੀ ਕੁੰਭਕਰਨੀ ਨੀਂਦ ਸੁੱਤੇ ਪਏ ਹਨ | ਇਨ੍ਹਾਂ ਮੇਨਹੋਲਾਂ ਦੇ ਢੱਕਣਾਂ ਨੂੰ ਬਣਾਉਣ 'ਚ ਵਰਤੀ ਜਾਣ ਵਾਲੀ ਸਮੱਗਰੀ ਦੀ ਕੁਆਲਿਟੀ ਕਿੰਨੀ ਘਟੀਆ ਹੈ, ਇਸ ਦਾ ਸਬੂਤ ਤਹਿਸੀਲ ਸੜਕ 'ਤੇ ਟੁੱਟੇ ਹੋਏ ਮੇਨਹੋਲ ਦੇ ਢੱਕਣ ਨੂੰ ਦੇਖਣ ਤੋਂ ਸਹਿਜੇ ਹੀ ਮਿਲ ਜਾਂਦਾ ਹੈ | ਬੱਸ ਦੇ ਸੜਕ ਤੋਂ ਗੁਜਰਦੇ ਸਾਰ ਹੀ ਮੇਨਹੋਲ ਦਾ ਢੱਕਣ ਟੁੱਟ ਗਿਆ ਅਤੇ ਇਹ ਸਾਰੀ ਘਟਨਾ ਸੀ. ਸੀ. ਟੀ. ਵੀ. ਕੈਮਰੇ 'ਚ ਕੈਦ ਹੋ ਗਈ | ਗ਼ਨੀਮਤ ਰਹੀ ਕਿ ਸਕੂਲ ਬੱਸ ਇਸ ਹਾਦਸੇ ਦਾ ਸ਼ਿਕਾਰ ਨਹੀਂ ਹੋਈ | ਕੈਮਰੇ 'ਚ ਕੈਦ ਘਟਨਾ ਸਵੇਰੇ 7.30 ਵਜੇ ਦੀ ਹੈ, ਜਿਸ 'ਚ ਸਕੂਲ ਬੱਸ ਜਦੋਂ ਮੇਨਹੋਲ ਦੇ ਢੱਕਣ ਦੇ ਉਪਰੋਂ ਗੁਜਰਦੀ ਹੈ ਤਾਂ ਢੱਕਣ ਟੁੱਟ ਕੇ ਮੇਨਹੋਲ ਦੇ ਅੰਦਰ ਹੀ ਡਿੱਗ ਜਾਂਦਾ ਹੈ | ਹਾਲਾਂਕਿ ਬੱਸ ਦਾ ਇੰਨਾ ਜ਼ਿਆਦਾ ਭਾਰ ਵੀ ਨਹੀਂ ਸੀ, ਜਦਕਿ ਇਸ ਸੜਕ ਤੋਂ ਅਕਸਰ ਰੇਤੇ ਤੇ ਬਜਰੀ ਦੇ ਓਵਰਲੋਡ ਟਰੱਕ ਅਤੇ ਟਿੱਪਰ ਗੁਜਰਦੇ ਹਨ | ਲੋਕਾਂ ਦਾ ਕਹਿਣਾ ਹੈ ਕਿ ਸਵੇਰੇ ਟੁੱਟੇ ਮੇਨਹੋਲ ਨੂੰ ਸ਼ਾਮ ਦੇ 7.30 ਵਜੇ ਤੱਕ ਵੀ ਠੀਕ ਨਹੀਂ ਕੀਤਾ ਗਿਆ | ਦਿਨ ਸਮੇਂ ਇਥੇ ਇਕ ਕਾਰ ਵੀ ਫਸ ਗਈ ਸੀ, ਜਿਸ ਨੂੰ ਲੋਕਾਂ ਨੇ ਭਾਰੀ ਮੁਸ਼ੱਕਤ ਨਾਲ ਬਾਹਰ ਕੱਢਿਆ | ਸ਼ਹਿਰ ਵਾਸੀਆਂ ਨੇ ਰੋਸ ਪ੍ਰਗਟ ਕਰਦਿਆਂ ਕਿਹਾ ਕਿ ਨਗਰ ਕੌਂਸਲ ਸਰਕਾਰੀ ਕੰਮਾਂ 'ਤੇ ਕਰੋੜਾਂ ਰੁ. ਖ਼ਰਚ ਕਰ ਰਹੀ ਹੈ, ਲੇਕਿਨ ਕੰਮ ਦੇ ਮਿਆਰ 'ਤੇ ਨਿਗਰਾਨੀ ਕਰਨ 'ਚ ਉਹ ਫੇਲ੍ਹ ਸਾਬਿਤ ਹੋ ਰਹੀ ਹੈ | ਅਕਸਰ ਵਿਕਾਸ ਕਾਰਜਾਂ 'ਚ ਘਟੀਆ ਸਮੱਗਰੀ ਵਰਤੀ ਜਾ ਰਹੀ ਹੈ | ਸ਼ਹਿਰ ਵਾਸੀਆਂ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਡੇਰਾਬੱਸੀ 'ਚ ਹੋ ਰਹੀ ਸਰਕਾਰੀ ਪੈਸੇ ਦੀ ਬਰਬਾਦੀ ਨੂੰ ਰੋਕਣ ਲਈ ਵਿਜੀਲੈਂਸ ਤੋਂ ਜਾਂਚ ਕਰਵਾਈ ਜਾਵੇ |
