ਚੰਡੀਗੜ੍ਹ / ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ

ਸੁਖਨਾ ਚੋਅ 'ਤੇ ਹਾਈ ਲੈਵਲ ਪੁਲ ਨਾਲ ਬਦਲੇਗੀ ਆਵਾਜਾਈ ਦੀ ਤਸਵੀਰ 16.63 ਕਰੋੜ ਦੀ ਲਾਗਤ ਵਾਲੇ ਪੁਲ ਨਾਲ ਮਨੀਮਾਜਰਾ-ਸੈਕਟਰ 26 ਵਿਚਕਾਰ ਸੰਪਰਕ ਹੋਵੇਗਾ ਮਜ਼ਬੂਤ <br/>

ਚੰਡੀਗੜ੍ਹ ਪ੍ਰਸ਼ਾਸਨ ਵਲੋਂ ਮਨੀਮਾਜਰਾ ਤੇ ਸੈਕਟਰ 26 ਵਿਚਕਾਰ ਸੁਖਨਾ ਚੋਅ 'ਤੇ ਨਵੇਂ ਬਣਾਏ ਜਾਣ ਵਾਲੇ ਹਾਈਲੈਵਲ ਪੁਲ ਦੀ ਪ੍ਰਸਤਾਵਿਤ ਤਸਵੀਰ ਅਤੇ ਮੌਜੂਦਾ ਸਮੇਂ ਦੌਰਾਨ ਬਣੇ ਕਾਜ਼ਵੇਅ ਦੀ ਤਸਵੀਰ | ਤਸਵੀਰਾਂ : ਗੁਰਿੰਦਰ ਸਿੰਘ <br/> 24-04-2026

ਚੰਡੀਗੜ੍ਹ, 23 ਅਪ੍ਰੈਲ (ਸੰਦੀਪ ਕੁਮਾਰ ਮਾਹਨਾ) ਸ਼ਹਿਰ 'ਚ ਵਧ ਰਹੀ ਆਵਾਜਾਈ ਦੀ ਸਮੱਸਿਆ ਨੂੰ ਦੇਖਦੇ ਹੋਏ ਸੁਖਨਾ ਚੋਅ 'ਤੇ ਹਾਈ ਲੈਵਲ ਪੁਲ ਦੇ ਨਿਰਮਾਣ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ ਹੈ, ਜਿਸ ਨਾਲ ਟ੍ਰੈਫਿਕ ਨੂੰ ਵੱਡੀ ਰਾਹਤ ਮਿਲਣ ਦੀ ਉਮੀਦ ਹੈ | ਇਹ ਫੈਸਲਾ ਯੂ.ਟੀ. ਚੰਡੀਗੜ੍ਹ ਦੇ ਮੁੱਖ ਸਕੱਤਰ ਐੱਚ. ਰਾਜੇਸ਼ ਪ੍ਰਸਾਦ ਦੀ ਅਗਵਾਈ ਹੇਠ ਹੋਈ ਉੱਚ ਪੱਧਰੀ ਮੀਟਿੰਗ 'ਚ ਲਿਆ ਗਿਆ, ਜਿਸ ਦੌਰਾਨ ਇੰਜੀਨੀਅਰਿੰਗ ਵਿਭਾਗ ਵਲੋਂ ਪ੍ਰੋਜੈਕਟ ਸੰਬੰਧੀ ਵਿਸਤਿ੍ਤ ਪੇਸ਼ਕਾਰੀ ਦਿੱਤੀ ਗਈ | ਮੌਜੂਦਾ ਸਮੇਂ 'ਚ ਮਨੀਮਾਜਰਾ ਅਤੇ ਸੈਕਟਰ-26 ਦਰਮਿਆਨ ਆਵਾਜਾਈ ਲਈ ਵਰਤੇ ਜਾਂਦੇ ਵੈਂਟੇਡ ਕਾਜ਼ਵੇਅ 'ਤੇ ਰਾਹਗੀਰਾਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਇਸ ਦੀ ਘੱਟ ਚੌੜਾਈ ਕਾਰਨ ਪੀਕ ਆਵਰ ਦੌਰਾਨ ਲੰਬੇ ਜਾਮ ਲੱਗ ਜਾਂਦੇ ਹਨ | ਇਸ ਤੋਂ ਇਲਾਵਾ ਮੌਨਸੂਨ ਮੌਸਮ ਦੌਰਾਨ ਸੁਖਨਾ ਚੋਅ ਵਿਚ ਪਾਣੀ ਦੇ ਪੱਧਰ ਵਧਣ ਨਾਲ ਇਹ ਮਾਰਗ ਅਕਸਰ ਬੰਦ ਹੋ ਜਾਂਦਾ ਹੈ | ਇਹ ਮਾਰਗ ਸ਼ਹਿਰ ਦੇ ਅਹਿਮ ਥਾਵਾਂ ਜਿਵੇਂ ਸੁਖਨਾ ਝੀਲ, ਸੈਕਟਰ-17, ਪੀ.ਜੀ.ਆਈ., ਪੰਜਾਬ ਯੂਨੀਵਰਸਿਟੀ ਅਤੇ ਹਾਈ ਕੋਰਟ ਤੱਕ ਪਹੁੰਚ ਲਈ ਵੀ ਬਹੁਤ ਅਹਿਮ ਹੈ | ਪ੍ਰਸਤਾਵਿਤ ਹਾਈ ਲੈਵਲ ਪੁਲ ਨਾਲ ਹਰ ਮੌਸਮ ਵਿਚ ਬਿਨਾ ਰੁਕਾਵਟ ਆਵਾਜਾਈ ਯਕੀਨੀ ਬਣੇਗੀ, ਜਿਸ ਨਾਲ ਮੌਜੂਦਾ ਸਮੱਸਿਆਵਾਂ ਦਾ ਹੱਲ ਨਿਕਲੇਗਾ ਅਤੇ ਟ੍ਰੈਫਿਕ ਸੁਚਾਰੂ ਤਰੀਕੇ ਨਾਲ ਚੱਲੇਗਾ | ਲਗਭਗ 16.63 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲੇ ਇਸ ਪੁਲ 'ਚ ਦੋਹਰਾ ਚਾਰ ਲੇਨ ਮਾਰਗ ਹੋਵੇਗਾ, ਜਿਸ 'ਚ ਪੈਦਲ ਰਾਹਗੀਰਾਂ ਲਈ ਫੁੱਟਪਾਥ ਅਤੇ ਸਾਈਕਲ ਟਰੈਕ ਦੀ ਸੁਵਿਧਾ ਵੀ ਸ਼ਾਮਿਲ ਕੀਤੀ ਜਾਵੇਗੀ | ਇਸ ਦੇ ਨਾਲ ਹੀ ਆਧੁਨਿਕ ਆਰ.ਸੀ.ਸੀ. ਅਤੇ ਪ੍ਰੀਕਾਸਟ ਤਕਨਾਲੋਜੀ ਦੀ ਵਰਤੋਂ ਕੀਤੀ ਜਾਵੇਗੀ ਤਾਂ ਜੋ ਪੁਲ ਹਰ ਮੌਸਮ ਵਿਚ ਮਜ਼ਬੂਤ ਅਤੇ ਭਰੋਸੇਯੋਗ ਰਹੇ | ਪਾਣੀ ਦੀ ਨਿਕਾਸੀ ਸੁਚਾਰੂ ਪ੍ਰਣਾਲੀ ਅਤੇ ਹੜ੍ਹ-ਰੋਧਕ ਉਪਾਅ ਵੀ ਇਸ ਡਿਜ਼ਾਈਨ ਦਾ ਹਿੱਸਾ ਹੋਣਗੇ | ਪ੍ਰਸ਼ਾਸਨ ਅਨੁਸਾਰ ਇਸ ਪ੍ਰੋਜੈਕਟ 'ਤੇ ਕੰਮ ਜੁਲਾਈ 2026 ਤੋਂ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ |

ਪਿਛਲੀ ਖ਼ਬਰ ਟਰਾਈਸਿਟੀ 'ਚ 22.66 ਗ੍ਰਾਮ ਹੈਰੋਇਨ ਸਮੇਤ ਨੌਜਵਾਨ ਕਾਬੂ ਅੰਬਾਲਾ ਤੋਂ ਸਸਤੇ ਭਾਅ 'ਤੇ ਨਸ਼ੀਲਾ ਪਦਾਰਥ ਖ਼ਰੀਦਕੇ ਟਰਾਈਸ... ਅਗਲੀ ਖ਼ਬਰ ਚੰਡੀਗੜ੍ਹ 'ਚ ਪਾਣੀ ਦੀ ਕਮੀ ਨੇ ਖੜ੍ਹੇ ਕੀਤੇ ਸਵਾਲ ਸਾਬਕਾ ਸੀਨੀਅਰ ਡਿਪਟੀ ਮੇਅਰ ਤੇ ਮੌਜੂਦਾ ਕੌਂਸਲਰ ਜਸਬੀਰ ਸਿੰਘ ਬੰਟ...

ਸੰਬੰਧਿਤ ਖ਼ਬਰਾਂ