ਚੰਡੀਗੜ੍ਹ, 13 ਮਈ (ਮਾਰਕੰਡਾ)- ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਨੇ ਮਈ 2026 ਦੇ ਸੈਸ਼ਨ ਲਈ ਵਾਤਾਵਰਨ, ਸੜਕ ਸੁਰੱਖਿਆ ਸਿੱਖਿਆ, ਔਰਤਾਂ/ਬੱਚਿਆਂ ਵਿਰੁੱਧ ਹਿੰਸਾ ਤੇ ਨਸ਼ੀਲੇ ਪਦਾਰਥਾਂ ਦੀ ਵਰਤੋਂ ਦੀ ਆਨਲਾਈਨ ਪ੍ਰੀਖਿਆ 10 ਜੂਨ ਦਿਨ ਬੁੱਧਵਾਰ ਨੂੰ ਆਨਲਾਈਨ ਮੋਡ ਵਿਚ ਕਰਵਾਈ ਜਾਵੇਗੀ | ਇਹ ਪ੍ਰੀਖਿਆ ਸਿਰਫ਼ ਗੈਰ ਐਨ.ਈ.ਪੀ. ਕੋਰਸਾਂ ਦੇ ਵਿਦਿਆਰਥੀਆਂ ਲਈ ਹੈ | ਪੀ.ਯੂ. ਪ੍ਰੀਖਿਆ ਕੰਟਰੋਲਰ ਪ੍ਰੋ. ਜਗਤ ਭੂਸ਼ਣ ਨੇ ਦੱਸਿਆ ਕਿ ਪ੍ਰਸ਼ਨ ਪੱਤਰ ਪ੍ਰੀਖਿਆ ਵਾਲੇ ਦਿਨ ਪੀ.ਯੂ. ਪ੍ਰੀਖਿਆ ਪੋਰਟਲ 'ਤੇ ਉਪਲਬਧ ਕਰਵਾਈ ਜਾਵੇਗੀ | ਵਿਦਿਆਰਥੀਆਂ ਨੂੰ ਆਪਣੇ ਪ੍ਰੀਖਿਆ ਪ੍ਰਮਾਣ ਪੱਤਰਾਂ ਦੀ ਵਰਤੋਂ ਕਰਕੇ ਲੌਗਇਨ ਕਰਨ ਤੇ ਯੂਨੀਵਰਸਿਟੀ ਦੁਆਰਾ ਸੂਚਿਤ ਸ਼ਡਿਊਲ ਅਨੁਸਾਰ ਪੇਪਰ ਦੇਣ ਦੀ ਕੋਸ਼ਿਸ਼ ਕਰਨ ਦੀ ਲੋੜ ਹੋਵੇਗੀ | ਯੂਨੀਵਰਸਿਟੀ ਨੇ ਆਪਣੀ ਅਧਿਕਾਰਤ ਵੈੱਬਸਾਈਟ 'ਤੇ ਵਿਸਤਿ੍ਤ ਡੇਟਸ਼ੀਟ ਤੇ ਪ੍ਰੀਖਿਆ ਨਿਰਦੇਸ਼ ਅਪਲੋਡ ਕੀਤੇ ਹਨ | ਵਿਦਿਆਰਥੀਆਂ ਨੂੰ ਪ੍ਰੀਖਿਆ ਵਿਚ ਸ਼ਾਮਲ ਹੋਣ ਤੋਂ ਪਹਿਲਾਂ ਸਾਰੀਆਂ ਹਦਾਇਤਾਂ ਨੂੰ ਧਿਆਨ ਨਾਲ ਪੜ੍ਹਨ ਦੀ ਸਲਾਹ ਦਿੱਤੀ ਗਈ ਹੈ | ਉਨ੍ਹਾਂ ਨੂੰ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਪ੍ਰੀਖਿਆ ਸ਼ੁਰੂ ਹੋਣ ਤੋਂ ਪਹਿਲਾਂ ਉਨ੍ਹਾਂ ਕੋਲ ਆਪਣਾ ਰੋਲ ਨੰਬਰ, ਲੌਗਇਨ ਪ੍ਰਮਾਣ ਪੱਤਰ ਤੇ ਇਕ ਸਥਿਰ ਇੰਟਰਨੈਟ ਕਨੈਕਸ਼ਨ ਹੋਵੇ | ਨਿਯਮਿਤ ਵਿਦਿਆਰਥੀਆਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਰੋਲ ਨੰਬਰਾਂ ਜਾਂ ਪ੍ਰੀਖਿਆ-ਸਬੰਧਤ ਵੇਰਵਿਆਂ 'ਚ ਕਿਸੇ ਵੀ ਤਰ੍ਹਾਂ ਦੀ ਅੰਤਰ ਦੀ ਸੂਰਤ 'ਚ ਆਪਣੇ ਸਬੰਧਤ ਕਾਲਜਾਂ ਤੇ ਵਿਭਾਗਾਂ ਨਾਲ ਸੰਪਰਕ ਕਰਨ | ਜਦੋਂ ਕਿ ਪ੍ਰਾਈਵੇਟ ਤੇ ਸੀ.ਡੀ.ਓ.ਈ. ਉਮੀਦਵਾਰ ਯੂਨੀਵਰਸਿਟੀ ਪ੍ਰੀਖਿਆ ਪੋਰਟਲ ਰਾਹੀਂ ਪ੍ਰੀਖਿਆ-ਸਬੰਧਤ ਸੇਵਾਵਾਂ ਤੱਕ ਪਹੁੰਚ ਕਰ ਸਕਦੇ ਹਨ | ਯੂਨੀਵਰਸਿਟੀ ਨਿਯਮਾਂ ਦੇ ਅਧੀਨ ਆਉਣ ਵਾਲੇ ਵਿਦਿਆਰਥੀਆਂ ਲਈ ਵਾਤਾਵਰਣ ਸਿੱਖਿਆ ਤੇ ਸੰਬੰਧਿਤ ਯੋਗਤਾ ਪੱਤਰ ਲਾਜ਼ਮੀ ਹੈ ਤੇ ਯੂਨੀਵਰਸਿਟੀ ਦੁਆਰਾ ਸੂਚਿਤ ਕੀਤੇ ਅਨੁਸਾਰ, ਸਬੰਧਤ ਕੋਰਸ ਦੀਆਂ ਡਿਗਰੀ ਜ਼ਰੂਰਤਾਂ ਨੂੰ ਪੂਰਾ ਕਰਨ ਲਈ ਪ੍ਰੀਖਿਆ 'ਚ ਯੋਗਤਾ ਪ੍ਰਾਪਤ ਕਰਨਾ ਜ਼ਰੂਰੀ ਹੈ |
