ਦੋ ਮਹੀਨਿਆਂ ਤੱਕ ਚਾਲੂ ਹੋ ਜਾਵੇਗਾ ਦਿਆਲਪੁਰਾ ਦਾ ਆਯੂਸ਼ ਹਸਪਤਾਲ
ਜ਼ੀਰਕਪੁਰ, 13 ਅਗਸਤ (ਮਨਿੰਦਰ ਸਿੰਘ)-ਦਿਆਲਪੁਰਾ ਪਿੰਡ ’ਚ ਲੰਬੇ ਸਮੇਂ ਤੋਂ ਨਿਰਮਾਣ ਅਧੀਨ ਆਯੂਸ਼ ਹਸਪਤਾਲ ਆਪਣੇ ਅੰਤਿਮ ਪੜਾਅ ’ਤੇ ਪਹੁੰਚ ਗਿਆ ਹੈ। ਵਿਭਾਗ ਦੇ ਅਨੁਸਾਰ ਹਸਪਤਾਲ ਲਗਭਗ ਦੋ ਮਹੀਨਿਆਂ ’ਚ ਚਾਲੂ ਹੋ ਜਾਵੇਗਾ।
ਜ਼ੀਰਕਪੁਰ, 13 ਅਗਸਤ (ਮਨਿੰਦਰ ਸਿੰਘ)-ਦਿਆਲਪੁਰਾ ਪਿੰਡ ’ਚ ਲੰਬੇ ਸਮੇਂ ਤੋਂ ਨਿਰਮਾਣ ਅਧੀਨ ਆਯੂਸ਼ ਹਸਪਤਾਲ ਆਪਣੇ ਅੰਤਿਮ ਪੜਾਅ ’ਤੇ ਪਹੁੰਚ ਗਿਆ ਹੈ। ਵਿਭਾਗ ਦੇ ਅਨੁਸਾਰ ਹਸਪਤਾਲ ਲਗਭਗ ਦੋ ਮਹੀਨਿਆਂ ’ਚ ਚਾਲੂ ਹੋ ਜਾਵੇਗਾ। ਇਹ ਪੰਜਾਬ ਦਾ ਦੂਜਾ ਆਯੂਸ਼ ਹਸਪਤਾਲ ਹੋਵੇਗਾ, ਜੋ ਪੰਚਕਰਮਾ ਨਾਲ ਸੰਬੰਧਿਤ ਇਲਾਜ ਪ੍ਰਦਾਨ ਕਰੇਗਾ। ਆਯੂਰਵੇਦ ਵਿਭਾਗ ਦੇ ਅਨੁਸਾਰ ਇਸ ਹਸਪਤਾਲ ਲਈ 25 ਮੈਂਬਰੀ ਸਟਾਫ਼ ਤਾਇਨਾਤ ਕੀਤਾ ਜਾਵੇਗਾ, ਜਿਸ ਲਈ ਸਟਾਫ਼ ਦੀ ਪ੍ਰਵਾਨਗੀ ਲੈਣ ਲਈ ਸਰਕਾਰ ਨੂੰ ਇਕ ਪ੍ਰਸਤਾਵ ਭੇਜਿਆ ਗਿਆ ਹੈ। ਇਸ ਹਸਪਤਾਲ ’ਚ ਆਯੂਰਵੇਦ ਮਾਹਿਰ ਡਾਕਟਰ ਤੋਂ ਇਲਾਵਾ ਇਕ ਹੋਮਿਓਪੈਥੀ ਮਾਹਿਰ ਡਾਕਟਰ ਵੀ ਤਾਇਨਾਤ ਕੀਤਾ ਜਾਵੇਗਾ, ਜੋ ਇਹ ਯਕੀਨੀ ਬਣਾਏਗਾ ਕਿ ਲੋਕਾਂ ਨੂੰ ਦੋਵਾਂ ਪ੍ਰਣਾਲੀਆਂ ਰਾਹੀਂ ਇਲਾਜ ਮਿਲੇ। ਵਿਭਾਗ ਦੇ ਅਨੁਸਾਰ ਇਸ ਆਯੂਸ਼ ਹਸਪਤਾਲ ’ਚ ਕੁੱਲ 50 ਬੈਡ ਹੋਣਗੇ। ਹਾਲਾਂਕਿ ਹਸਪਤਾਲ 10 ਬਿਸਤਰਿਆਂ ਨਾਲ ਸ਼ੁਰੂ ਹੋਵੇਗਾ, ਪਰ ਵਿਭਾਗ ਦਾ ਕਹਿਣਾ ਹੈ ਕਿ ਮਰੀਜ਼ਾਂ ਦੀ ਗਿਣਤੀ ਅਤੇ ਜ਼ਰੂਰਤਾਂ ਦੇ ਆਧਾਰ ’ਤੇ ਬੈਡਾਂ ਦੀ ਗਿਣਤੀ ਹੌਲੀ - ਹੌਲੀ ਵਧਾ ਕੇ 50 ਕੀਤੀ ਜਾਵੇਗੀ। ਜ਼ਿਕਰਯੋਗ ਹੈ ਕਿ ਪੰਜਾਬ ਸਮੇਤ ਗੁਆਂਢੀ ਰਾਜਾਂ ਦੇ ਲੋਕਾਂ ਨੂੰ ਅਕਸਰ ਪੰਚਕਰਮਾ ਇਲਾਜ ਲਈ ਕੇਰਲਾ ਵਰਗੇ ਰਾਜਾਂ ’ਚ ਜਾਣਾ ਪੈਂਦਾ ਸੀ। ਦਿਆਲਪੁਰਾ ’ਚ ਇਸ ਸਹੂਲਤ ਨਾਲ ਲੋਕਾਂ ਨੂੰ ਹੁਣ ਇਲਾਜ ਲਈ ਬਾਹਰ ਜਾਣ ਦੀ ਲੋੜ ਨਹੀਂ ਪਵੇਗੀ। ਇਸ ਨਾਲ ਮਰੀਜ਼ਾਂ ਦਾ ਸਮਾਂ ਅਤੇ ਵਾਧੂ ਇਲਾਜ ਖਰਚ ਦੋਵੇਂ ਬਚਣਗੇ। ਇਸ ਸੰਬੰਧੀ ਆਯੁਰਵੇਦ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਡਾ. ਰਮਨ ਨੇ ਕਿਹਾ ਕਿ ਹਸਪਤਾਲ ਦਾ ਕੰਮ ਲਗਭਗ ਪੂਰਾ ਹੋ ਗਿਆ ਹੈ ਤੇ ਇਹ ਦੋ ਮਹੀਨਿਆਂ ਤੱਕ ਚਾਲੂ ਹੋ ਜਾਵੇਗਾ।
