ਇਕਲੌਤੇ ਪੁੱਤਰ ਦੀ ਸ਼ਹਾਦਤ ਨਾਲ ਗਹਿਰੇ ਸਦਮੇ 'ਚ ਡੁੱਬਿਆ ਹੱਸਦਾ-ਵੱਸਦਾ ਪਰਿਵਾਰ <br/>
ਅਜੀਤ ਡੈਸਕ
24-01-2026
ਡਿਊਟੀ ਲਈ ਸਮਰਪਿਤ ਅਤੇ ਸਿਰੇ ਦਾ ਸ਼ੂਟਰ ਸੀ ਜਵਾਨ- ਤਬਾਦਲਾ ਹੋਣ ਦੇ ਬਾਵਜੂਦ ਰਿਲੀਵ ਨਾ ਕੀਤਾ ਗਿਆ, ਗੁਆਂਢੀ ਇੰਦਰਜੀਤ ਸਿੰਘ ਬਾਲਾ ਦੱਸਦੇ ਹਨ ਕਿ ਸ਼ਹੀਦ ਜੋਬਨਜੀਤ ਸਿੰਘ ਆਪਣੀ ਯੂਨਿਟ ਦਾ ਸਿਰੇ ਦਾ 'ਸ਼ੂਟਰ' ਸੀ ਨਿਡਰ, ਤੰਦਰੁਸਤ ਅਤੇ ਬਹੁਤ ਚੁਸਤ ਜਵਾਨ | ਇਸੇ ਲਈ, ਭਾਵੇਂ ਉਸਦੀ ਤਬਾਦਲੇ ਦੀ ਤਾਰੀਖ਼ ਅਗਸਤ ਵਿਚ ਆ ਗਈ ਸੀ, ਪਰ ਉੱਚ ਅਫ਼ਸਰਾਂ ਨੇ ਉਸਨੂੰ ਯੂਨਿਟ ਤੋਂ ਰਿਲੀਵ ਹੀ ਨਹੀਂ ਕੀਤਾ | ਉਸਦੀ ਬਹਾਦਰੀ ਯੂਨਿਟ ਲਈ ਬੇਹੱਦ ਅਹਿਮ ਸੀ |
ਸਾਬਕਾ ਸਿੱਖਿਆ ਮੰਤਰੀ ਡਾ. ਦਲਜੀਤ ਸਿੰਘ ਚੀਮਾ ਤੇ ਹੋਰ ਆਗੂਆਂ ਵਲੋਂ ਸ਼ਹੀਦ ਜੋਬਨਜੀਤ ਸਿੰਘ ਦੇ ਪਰਿਵਾਰ ਨਾਲ ਦੁੱਖ ਦਾ ਪ੍ਰਗਟਾਵਾ- ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਮੀਤ ਪ੍ਰਧਾਨ ਅਤੇ ਸਾਬਕਾ ਸਿੱਖਿਆ ਮੰਤਰੀ ਡਾ. ਦਲਜੀਤ ਸਿੰਘ ਚੀਮਾ ਨੇ ਗੋਬਿੰਦ ਵੈਲੀ, ਰੂਪਨਗਰ ਸਥਿਤ ਸਾਬਕਾ ਫ਼ੌਜੀ ਅਫ਼ਸਰ ਬਲਬੀਰ ਸਿੰਘ ਦੇ ਘਰ ਉਨ੍ਹਾਂ ਦੇ ਫ਼ੌਜੀ ਪੁੱਤਰ ਸ਼ਹੀਦ ਜੋਬਨਜੀਤ ਸਿੰਘ ਦੀ ਸ਼ਹਾਦਤ 'ਤੇ ਡੂੰਘਾ ਸ਼ੋਕ ਪ੍ਰਗਟ ਕੀਤਾ | ਡਾ. ਚੀਮਾ ਨੇ ਕਿਹਾ ਕਿ ਇਲਾਕੇ ਵਿਚ ਇਸ ਪਰਿਵਾਰ ਨੂੰ 'ਫ਼ੌਜੀਆਂ ਦਾ ਪਰਿਵਾਰ' ਕਿਹਾ ਜਾਣਾ ਕੋਈ ਹੈਰਾਨੀ ਦੀ ਗੱਲ ਨਹੀਂ, ਕਿਉਂਕਿ ਉਨ੍ਹਾਂ ਨੇ ਦੇਸ਼ ਲਈ ਹਮੇਸ਼ਾ ਬੇਮਿਸਾਲ ਯੋਗਦਾਨ ਦਿੱਤਾ ਹੈ | ਜੋਬਨਜੀਤ ਸਿੰਘ ਦੀ ਸ਼ਹਾਦਤ ਨੂੰ ਉਨ੍ਹਾਂ ਬੇਹੱਦ ਵੱਡੀ ਕੁਰਬਾਨੀ ਕਰਾਰ ਦਿੰਦਿਆਂ ਕਿਹਾ ਕਿ ਦੇਸ਼ ਹਮੇਸ਼ਾ ਇਸ ਵੀਰ ਜਵਾਨ ਦਾ ਰਿਣੀ ਰਹੇਗਾ | ਇਸ ਅਣਹੋਣੀ ਨੇ ਸਾਰੇ ਇਲਾਕੇ ਨੂੰ ਗਹਿਰੇ ਸਦਮੇ ਵਿਚ ਝੰਜੋੜ ਦਿੱਤਾ ਹੈ | ਇਸ ਮੌਕੇ ਡਾ. ਚੀਮਾ ਦੇ ਨਾਲ ਨਗਰ ਕੌਂਸਲ ਦੇ ਸਾਬਕਾ ਪ੍ਰਧਾਨ ਪਰਮਜੀਤ ਸਿੰਘ ਮੱਕੜ,ਲੀਗਲ ਵਿੰਗ ਦੇ ਪ੍ਰਧਾਨ ਐਡਵੋਕੇਟ ਰਾਜੀਵ ਸ਼ਰਮਾ, ਨਗਰ ਕੌਂਸਲ ਦੇ ਸਾਬਕਾ ਸੀਨੀਅਰ ਮੀਤ ਪ੍ਰਧਾਨ ਚੌਧਰੀ ਵੇਦ ਪ੍ਰਕਾਸ਼ ਅਤੇ ਅਕਾਲੀ ਆਗੂ ਮਨਜੀਤ ਸਿੰਘ ਤੰਬੜ ਵੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ |
