ਨੂਰਪੁਰ ਬੇਦੀ, 6 ਮਾਰਚ (ਹਰਦੀਪ ਸਿੰਘ ਢੀਂਡਸਾ)-ਨੂਰਪੁਰ ਬੇਦੀ ਬਲਾਕ ਦੇ ਪਿੰਡ ਕਾਂਗੜ ਦੇ ਚੌਧਰੀ ਭਜਨ ਲਾਲ ਨੇ ਮਰਨ ਉਪਰੰਤ ਆਪਣੇ ਅੰਗਦਾਨ ਕਰਨ ਲਈ ਪੀ.ਜੀ.ਆਈ. ਚੰਡੀਗੜ੍ਹ ਨਾਲ ਇਕਰਾਰ ਕੀਤਾ ਹੈ | ਉਸ ਨੇ ਆਪਣੇ ਹੀ ਪਿੰਡ ਦੇ ਨੌਜਵਾਨ ਸਵ. ਅਰਸ਼ਦੀਪ ਸਿੰਘ ਤੋਂ ਪ੍ਰੇਰਿਤ ਹੋ ਕੇ ਇਹ ਕਦਮ ਉਠਾਇਆ ਹੈ | ਬੀਤੀ ਦਿਨੀ ਪਿੰਡ ਕਾਂਗੜ ਵਿਖੇ ਲੱਗੇ ਖ਼ੂਨਦਾਨ ਕੈਂਪ ਦੌਰਾਨ ਭਜਨ ਲਾਲ ਵਲੋੋ ਆਪਣੇ ਫਾਰਮ ਭਰ ਕੇ ਅਧਿਕਾਰੀਆਂ ਨੂੰ ਦਿੱਤੇ ਗਏ | ਭਾਰਤ ਸਰਕਾਰ ਦੇ ਸਿਹਤ ਤੇ ਪਰਿਵਾਰ ਭਲਾਈ ਮੰਤਰਾਲਾ ਦੇ ਰਜਿਸ਼ਟ੍ਰੇਸ਼ਨ ਨੰਬਰ 91-7461-8361-8584 ਤਹਿਤ ਇਹ ਅੰਗ ਦਾਨ ਕੀਤੇ ਗਏ ਹਨ, ਜਿਸ ਵਿਚ ਜਿਗਰ, ਕਿਡਨੀ, ਦਿਲ, ਫੇਫੜੇ, ਆਂਦਰਾ ਤੇ ਪੈਨਕਰੀਆਜ਼ ਤੋਂ ਇਲਾਵਾ ਹੱਡੀਆਂ, ਦਿਲ ਦੇ ਵਾਲਵ, ਬਲੱਡ ਵੈਸਲ ਆਦਿ ਦੇ ਟਿਸ਼ੂ ਸ਼ਾਮਿਲ ਹਨ | ਚੌ. ਭਜਨ ਲਾਲ ਨੇ ਕਿਹਾ ਕਿ ਮਰਨ ਉਪਰੰਤ ਸਰੀਰ ਦੇ ਅੰਗ ਦਾਨ ਕਰਕੇ ਕਿਸੀ ਹੋਰ ਵਿਅਕਤੀ ਨੂੰ ਨਵੀਂ ਜ਼ਿੰਦਗੀ ਦਿੱਤੀ ਜਾ ਸਕਦੀ ਹੈ | ਉਹਨਾਂ ਕਿਹਾ ਕਿ ਇਨਸਾਨ ਦੇ ਮਰਨ ਉਪਰੰਤ ਸਸਕਾਰ ਮੌਕੇ ਉਸ ਦੇ ਸਾਰੇ ਅੰਗ ਸੜ ਜਾਂਦੇ ਹਨ, ਜਦਕਿ ਸਾਡੇ ਵਲੋਂ ਦਾਨ ਕੀਤੇ ਅੰਗ ਕਿਸੀ ਹੋਰ ਦੀ ਜ਼ਿੰਦਗੀ ਦਾ ਸਹਾਰਾ ਬਣ ਸਕਦੇ ਹਨ | ਇਸ ਲਈ ਉਸ ਨੇ ਵੀ ਆਪਣੇ ਅੰਗ ਦਾਨ ਕੀਤੇ ਹਨ | ਇਸ ਮੌਕੇ ਵੱਖ-ਵੱਖ ਡਾਕਟਰਾਂ ਅਤੇ ਇਲਾਕੇ ਦੇ ਲੋਕਾਂ ਨੇ ਚੌਧਰੀ ਭਜਨ ਲਾਲ ਦੇ ਇਸ ਉਦਮ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਹਰੇਕ ਵਿਅਕਤੀ ਨੂੰ ਆਪਣੇ ਅੰਗ ਦਾਨ ਕਰਨੇ ਚਾਹੀਦੇ ਹਨ |
