ਸ੍ਰੀ ਅਨੰਦਪੁਰ ਸਾਹਿਬ, 20 ਜੂਨ (ਕਰਨੈਲ ਸਿੰਘ)-ਇੱਥੋਂ ਨੇੜਲੇ ਪਿੰਡ ਗਰਾ (ਅਗੰਮਪੁਰ) ਵਿਖੇ ਪੀਰ ਦਰਬਾਰ ਦੇ ਗੱਦੀ ਨਸ਼ੀਨ ਬਾਬਾ ਅਵਿਨਾਸ਼ ਦੀ ਰਹਿਨੁਮਾਈ ਹੇਠ ਬਾਬਾ ਲਖਸ਼ਰੀ ਦੀਨ ਅਹਿਮਦ ਸ਼ਾਹ ਦਾ 10ਵਾਂ ਸਾਲਾਨਾ ਉਰਸ ਧੂਮ ਧਾਮ ਨਾਲ ਮਨਾਇਆ ਗਿਆ । ਇਲਾਕਾ ਨਿਵਾਸੀਆਂ ਦੇ ਸਹਿਯੋਗ ਨਾਲ ਕਰਵਾਏ ਉਰਸ਼ ਸਮਾਗਮ ’ਚ ਬਾਬਾ ਜੀ ਦਾ ਝੰਡਾ ਢੋਲ ਨਗਾਰਿਆਂ ਦੀ ਥਾਪ ਨਾਲ ਚੜ੍ਹਾਇਆ ਗਿਆ । ਪ੍ਰਧਾਨ ਸੁੱਚਾ ਸਿੰਘ ਨੇ ਦੱਸਿਆ ਕਿ ਇਸ ਸਥਾਨ ’ਤੇ ਹਰ ਸਾਲ ਬਾਬਾ ਲਖਸ਼ਰੀ ਦੀਨ ਅਹਿਮਦ ਸ਼ਾਹ ਦੀ ਯਾਦ ’ਚ ਸਮਾਗਮ ਕਰਵਾਇਆ ਜਾਂਦਾ ਹੈ । ਉਨ੍ਹਾਂ ਦੱਸਿਆ ਕਿ ਇਸ ਵਾਰ 10ਵਾਂ ਉਰਸ ਮੇਲਾ ਕਰਵਾਇਆ ਗਿਆ ਹੈ ਜਿਸ ਵਿੱਚ ਸਮੂਹ ਇਲਾਕਾ ਨਿਵਾਸੀਆਂ ਨੇ ਵੱਧ ਚੜ੍ਹ ਕੇ ਸੇਵਾ ’ਚ ਹਿੱਸਾ ਪਾਇਆ। ਸੰਗਤਾਂ ਦੀ ਸਹਲੂਤ ਲਈ ਪ੍ਰਬੰਧ ਵੱਲੋਂ ਲੰਗਰ ਦੀ ਸੇਵਾ ਅਤੁੱਟ ਚੱਲੀ ਤੇ ਰਾਤ ਨੂੰ ਚਾਹ ਪਕੌੜਿਆਂ ਦਾ ਲੰਗਰ ਵੀ ਚਲਾਇਆ ਗਿਆ । ਪੀਰ ਜੀ ਦੀ ਮਹਿਮਾ ਦਾ ਗੁਣਗਾਨ ਕਰਨ ਲਈ ਪੰਜਾਬ ਦੇ ਪ੍ਰਸਿੱਧ ਕਲਾਕਾਰ ਜਸਪਾਲ ਰਾਣਾ, ਗੁਰਮੁਖ ਮਟੌਰ ਵਾਲਾ, ਸੋਨੀ ਸੁਲਤਾਨ ਤੇ ਜਸਦੀਪ ਆਲਮ ਨੇ ਖੂਬ ਰੌਣਕਾਂ ਲਾਈਆ । ਬਾਬਾ ਅਵਿਨਾਸ਼ ਨੇ ਇਸ ਮੌਕੇ ’ਤੇ ਸੰਗਤਾਂ ਨੂੰ ਆਪਣੇ ਪ੍ਰਵਚਨਾਂ ਤੇ ਭਜਨਾਂ ਨਾਲ ਨਿਹਾਲ ਕੀਤਾ । ਅੰਤ ਇਹ ਮੇਲਾ ਯਾਦਗਰੀ ਹੋ ਨਿੱਬੜਿਆ ।
