ਚਵਿੰਡਾ ਦੇਵੀ ਤੋਂ ਢੱਡੇ ਨੂੰ ਜਾਂਦੀ ਸੜਕ ਦੀ ਮਾੜੀ ਹਾਲਤ ਤੋਂ ਦੁਕਾਨਦਾਰ ਅਤੇ ਰਾਹਗੀਰ ਪ੍ਰੇਸ਼ਾਨ <br/>
ਅਜੀਤ ਡੈਸਕ
01-02-2026
ਅਕਸਰ ਹੀ ਟੁੱਟਦੇ ਰਹਿੰਦੇ ਨੇ ਦੁਕਾਨਾਂ ਅੱਗੇ ਲੱਗੇ ਸ਼ੀਸ਼ੇ , ਹੁੰਦੇ ਨੇ ਐਕਸੀਡੈਂਟ : ਇਸ ਟੁੱਟੀ ਸੜਕ 'ਤੇ ਪੱਥਰ ਖਿੱਲਰਿਆ ਹੋਣ ਕਰਕੇ ਅਕਸਰ ਹੀ ਦੁਕਾਨਾਂ ਅੱਗੇ ਲੱਗੇ ਸ਼ੀਸ਼ੇ ਟੁੱਟਦੇ ਰਹਿੰਦੇ ਨੇ ਕਿਉਂਕਿ ਜਦੋਂ ਵੀ ਕੋਈ ਵੱਡੀ ਗੱਡੀ ਸੜਕ ਉਪਰ ਦੀ ਗੁਜ਼ਰਦੀ ਹੈ ਤਾਂ ਉਸ ਦੇ ਟਾਈਰਾਂ ਦੇ ਹੇਠਾਂ ਆਉਣ ਨਾਲ ਇਹ ਪੱਥਰ ਦੁਕਾਨਾਂ ਅੱਗੇ ਲੱਗੇ ਸ਼ੀਸ਼ਿਆਂ ਨਾਲ ਟਕਰਾਉਂਦੇ ਨੇ ਜਿਸ ਨਾਲ ਅਕਸਰ ਹੀ ਸ਼ੀਸ਼ੇ ਟੁੱਟਦੇ ਰਹਿੰਦੇ ਨੇ ਜਿਸ ਨਾਲ ਦੁਕਾਨਦਾਰਾਂ ਦਾ ਭਾਰੀ ਨੁਕਸਾਨ ਹੁੰਦਾ ਰਹਿੰਦਾ ਹੈ ਅਤੇ ਪੱਥਰਾਂ ਕਰਕੇ ਆਏ ਦਿਨ ਐਕਸੀਡੈਂਟ ਹੋ ਰਹੇ ਹਨ | ਜਿਸ ਕਰਕੇ ਲੋਕਾਂ ਦਾ ਭਾਰੀ ਨੁਕਸਾਨ ਵੀ ਹੋ ਰਿਹਾ ਹੈ |
ਕੀ ਕਹਿੰਦੇ ਨੇ ਦੁਕਾਨਦਾਰ : ਟੁੱਟੀ ਸੜਕ ਸੰਬੰਧੀ ਜਦੋਂ ਦੁਕਾਨਦਾਰ ਨਰਿੰਦਰ ਸਿੰਘ ਸੋਖੀ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਅਸੀਂ ਸਮੂਹ ਦੁਕਾਨਦਾਰਾਂ ਵਲੋਂ ਇਸ ਸੜਕ ਨੂੰ ਬਣਾਉਣ ਸੰਬੰਧੀ ਮੰਗ ਪੱਤਰ ਐੱਸ.ਡੀ.ਐੱਮ. ਮਜੀਠਾ ਨੂੰ ਦਿੱਤਾ ਸੀ ਪਰ ਸਾਡੇ ਮੰਗ ਪੱਤਰ 'ਤੇ ਅੱਜ ਤੱਕ ਕੋਈ ਕਾਰਵਾਈ ਨਹੀਂ ਹੋਈ | ਉਨ੍ਹਾਂ ਦੱਸਿਆ ਕਿ ਜਦੋਂ ਸੜਕ ਉਪਰੋਂ ਦੀ ਕੋਈ ਵੱਡੀ ਗੱਡੀ ਲੰਘਦੀ ਹੈ ਤਾਂ ਉਨ੍ਹਾਂ ਦੇ ਟਾਇਰਾਂ ਨਾਲ ਸਾਡੀਆਂ ਦੁਕਾਨਾਂ ਵੱਲ ਬੜੀ ਤੇਜੀ ਨਾਲ ਪੱਥਰ ਵੱਜਦੇ ਹਨ ਜਿਸ ਨਾਲ ਕਦੇ ਵੀ ਕੋਈ ਜਾਨੀ ਨੁਕਸਾਨ ਹੋ ਸਕਦਾ ਹੈ | ਉਨ੍ਹਾਂ ਕਿਹਾ ਕਿ ਘੱਟਾ ਤਾਂ ਬਹੁਤ ਜਿਆਦਾ ਦੁਕਾਨਾਂ ਦੇ ਅੰਦਰ ਆਉਂਦਾ ਹੈ | ਜਿਸ ਨਾਲ ਸਾਰੇ ਹੀ ਦੁਕਾਨਦਾਰ ਸਾਹ ਦੀ ਬਿਮਾਰੀ ਤੋਂ ਪੀੜਤ ਹੋ ਰਹੇ ਹਨ | ਉਨ੍ਹਾਂ ਪੰਜਾਬ ਸਰਕਾਰ ਅਤੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਇਸ ਸੜਕ ਨੂੰ ਤੁਰੰਤ ਰਿਪੇਅਰ ਕੀਤਾ ਜਾਵੇ ਤਾਂ ਜੋ ਦੁਕਾਨਦਾਰਾ ਦੀ ਜਾਨ ਤੇ ਮਾਲ ਦੀ ਰਾਖੀ ਹੋ ਸਕੇ |
ਕੀ ਕਹਿੰਦੇ ਹਨ ਆਮ ਆਦਮੀ ਪਾਰਟੀ ਦੇ ਹਲਕਾ ਮਜੀਠਾ ਦੇ ਇੰਚਾਰਜ : ਇਸ ਸੰਬੰਧੀ ਜਦੋਂ ਆਮ ਆਦਮੀ ਪਾਰਟੀ ਹਲਕਾ ਮਜੀਠਾ ਦੇ ਇੰਚਾਰਜ ਤਲਬੀਰ ਸਿੰਘ ਗਿੱਲ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਇਸ ਸਮੱਸਿਆ ਤੋਂ ਜਲਦ ਹੀ ਦੁਕਾਨਦਾਰਾਂ ਅਤੇ ਰਾਹਗੀਰਾਂ ਨੂੰ ਨਿਜਾਤ ਮਿਲ ਜਾਵੇਗੀ ਕਿਉਂਕਿ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਯੋਗ ਅਗਵਾਈ ਵਾਲੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਵਲੋਂ ਇਸ ਸੜਕ ਦਾ ਟੈਂਡਰ ਪਾਸ ਕਰ ਦਿੱਤਾ ਗਿਆ ਹੈ ਅਤੇ ਠੇਕੇਦਾਰ ਨੂੰ ਇਸ ਕੰਮ ਦੀ ਅਲਾਟਮੈਂਟ ਵੀ ਹੋ ਚੁੱਕੀ ਹੈ | ਉਨ੍ਹਾਂ ਕਿਹਾ ਕਿ ਅਗਲੇ ਮਹੀਨੇ ਤੋਂ ਇਸ ਸੜਕ ਦਾ ਕੰਮ ਸ਼ੁਰੂ ਹੋ ਜਾਵੇਗਾ ਅਤੇ ਅਪ੍ਰੈਲ ਦੇ ਅਖੀਰ ਤੱਕ ਇਹ ਸੜਕ ਚਵਿੰਡਾ ਦੇਵੀ ਤੋਂ ਲੈ ਕੇ ਹਦਾਇਤਪੁਰ, ਟੈਲਾਂ ਤੱਕ ਮੁਕੰਮਲ ਹੋ ਜਾਵੇਗੀ |
