ਮੰਡੀਆਂ 'ਚ ਕਿਸਾਨਾਂ ਦੀ ਰੱਤ ਨਿਚੋੜ ਰਿਹਾ 'ਵਿਆਜ ਦਾ ਮੀਟਰ', ਕੱਚੀਆਂ ਪਰਚੀਆਂ ਦੇ ਜਾਲ 'ਚ ਫਸਿਆ ਅੰਨਦਾਤਾ
ਅਜੀਤ ਡੈਸਕ
24-04-2026
ਪਹਿਲਾਂ ਸਰਕਾਰ ਵਲੋਂ ਅਦਾਇਗੀ ਆੜ੍ਹਤੀਆਂ ਦੇ ਖਾਤਿਆਂ ਰਾਹੀਂ ਹੁੰਦੀ ਸੀ, ਪਰ ਹੁਣ ਅਦਾਇਗੀ ਸਿੱਧੀ ਕਿਸਾਨਾਂ ਦੇ ਖਾਤਿਆਂ ਵਿੱਚ ਆਉਣ ਲੱਗੀ ਹੈ | ਇਸ ਬਦਲਾਅ ਨੇ ਆੜ੍ਹਤੀਆਂ ਨੂੰ ਹੋਰ ਵੀ ਚੌਕਸ ਕਰ ਦਿੱਤਾ ਹੈ | ਆੜ੍ਹਤੀਆ ਇਹ ਤਰਕ ਦਿੰਦਾ ਹੈ ਕਿ ਜਦੋਂ ਤੱਕ ਉਸ ਕੋਲ ਪੈਸਾ ਵਾਪਸ ਨਹੀਂ ਆਉਂਦਾ, ਉਹ ਵਿਆਜ ਦਾ ਮੀਟਰ ਨਹੀਂ ਰੋਕੇਗਾ | ਸੂਤਰਾਂ ਅਨੁਸਾਰ, ਆੜ੍ਹਤੀਆਂ ਵਲੋਂ ਕਿਸਾਨਾਂ ਤੋਂ 2 ਪ੍ਰਤੀਸ਼ਤ ਅਤੇ ਕਈ ਮਾਮਲਿਆਂ ਵਿਚ ਗ਼ਰੀਬ ਤੇ ਮਜਬੂਰ ਕਿਸਾਨਾਂ ਤੋਂ 2.5 ਪ੍ਰਤੀਸ਼ਤ (ਢਾਈ ਫੀਸਦੀ) ਤੱਕ ਮੋਟਾ ਵਿਆਜ ਵਸੂਲਿਆ ਜਾ ਰਿਹਾ ਹੈ | ਇਹ ਭਿ੍ਸ਼ਟਾਚਾਰ ਦੀਆਂ ਤਾਰਾਂ ਅਫ਼ਸਰਸ਼ਾਹੀ ਨਾਲ ਵੀ ਡੂੰਘੀਆਂ ਜੁੜੀਆਂ ਹੋਈਆਂ ਹਨ | ਭਰੋਸੇਯੋਗ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ, ਇਹ ਸਾਰਾ ਵਰਤਾਰਾ ਇਕੱਲੇ ਆੜਤੀਆਂ ਦੇ ਵੱਸ ਦੀ ਗੱਲ ਨਹੀਂ ਹੈ | ਮੰਡੀਆਂ ਵਿਚ ਹੋਣ ਵਾਲੀ ਇਸ 'ਉੱਪਰਲੀ ਕਮਾਈ' ਦਾ ਇੱਕ ਵੱਡਾ ਹਿੱਸਾ ਸਰਕਾਰੀ ਅਫ਼ਸਰਾਂ ਅਤੇ ਖਰੀਦ ਏਜੰਸੀਆਂ ਦੇ ਕਰਮਚਾਰੀਆਂ ਤੱਕ ਪਹੁੰਚਦਾ ਹੈ |
ਆੜ੍ਹਤੀ ਆਪਣੀ ਮਰਜ਼ੀ ਅਨੁਸਾਰ ਸਰਕਾਰ ਜਾਂ ਏਜੰਸੀਆਂ ਤੋਂ ਪੱਕੀ ਪਰਚੀ ਜਾਰੀ ਕਰਵਾਉਂਦਾ ਹੈ | ਜਦੋਂ ਤੱਕ ਆੜਤੀ ਚਾਹੇ, ਉਹ ਜਿਣਸ ਆਪਣੇ ਕਬਜ਼ੇ ਵਿਚ ਰੱਖ ਕੇ ਵੀ ਪਰਚੀ ਇਸ਼ੂ ਨਹੀਂ ਹੋਣ ਦਿੰਦਾ, ਤਾਂ ਜੋ ਵਿਆਜ ਦੀ ਰਕਮ ਵੱਧ ਤੋਂ ਵੱਧ ਬਣ ਸਕੇ | ਇਸ ਪੈਸੇ ਨਾਲ ਹੀ ਉਹ ਭਿ੍ਸ਼ਟ ਅਫਸਰਸ਼ਾਹੀ ਦਾ ਘਰ ਪੂਰਦਾ ਹੈ, ਕੁੱਲ ਮਿਲਾ ਕੇ ਬਲੀ ਦਾ ਬੱਕਰਾ ਵਿਚਾਰਾ ਕਿਸਾਨ ਹੀ ਬਣਦਾ ਹੈ | ਕਿਸਾਨਾਂ ਨਾਲ ਕੀਤੇ ਜਾ ਰਹੇ ਇਸ ਸ਼ਰੇਆਮ ਧੱਕੇਸ਼ਾਹੀ ਦੇ ਵਰਤਾਰੇ ਨਾਲ ਸਰਕਾਰ ਦੀ 'ਚੁੱਪੀ' 'ਤੇ ਵੀ ਉੱਠੇ ਸਵਾਲ ਖੜ੍ਹੇ ਹੁੰਦੇ ਹਨ | ਇੱਕ ਪਾਸੇ ਸੂਬਾ ਅਤੇ ਕੇਂਦਰ ਸਰਕਾਰਾਂ ਕਿਸਾਨਾਂ ਦੀ ਆਮਦਨ ਦੁੱਗਣੀ ਕਰਨ ਅਤੇ ਉਨ੍ਹਾਂ ਨੂੰ ਵਿਚੋਲਿਆਂ ਤੋਂ ਮੁਕਤ ਕਰਨ ਦੇ ਦਾਅਵੇ ਕਰਦੀਆਂ ਨਹੀਂ ਥੱਕਦੀਆਂ, ਪਰ ਦੂਜੇ ਪਾਸੇ ਮੰਡੀਆਂ ਵਿਚ ਹੋ ਰਹੀ ਇਸ ਲੁੱਟ ਨੂੰ ਅਣਦੇਖਿਆ ਕਰਕੇ ਅਸਿੱਧੇ ਢੰਗ ਨਾਲ ਉਤਸ਼ਾਹਿਤ ਕੀਤਾ ਜਾ ਰਿਹਾ ਹੈ | ਕਿਸਾਨਾਂ ਦਾ ਕਹਿਣਾ ਹੈ ਕਿ ਸਰਕਾਰ ਦੀ ਮਿਲੀਭੁਗਤ ਤੋਂ ਬਿਨਾਂ ਇਨ੍ਹਾਂ ਵੱਡਾ ਸਕੈਮ ਚੱਲਣਾ ਅਸੰਭਵ ਹੈ | ਕਿਸਾਨਾਂ ਦਾ ਦਰਦ ਇਹ ਹੈ ਕਿ, 'ਸਾਡੀ ਫ਼ਸਲ ਮੰਡੀ ਵਿਚ ਪਈ ਹੈ, ਆੜ੍ਹਤੀ ਦੇ ਕਬਜ਼ੇ ਵਿਚ ਹੈ, ਪਰ ਸਾਡੇ ਸਿਰੋਂ ਵਿਆਜ ਨਹੀਂ ਉਤਰ ਰਿਹਾ | ਅਸੀਂ ਦੋਹਰੀ ਮਾਰ ਝੱਲ ਰਹੇ ਹਾਂ-ਇਕ ਪਾਸੇ ਕੁਦਰਤੀ ਆਫ਼ਤਾਂ ਅਤੇ ਦੂਜੇ ਪਾਸੇ ਮੰਡੀ ਦਾ ਇਹ ਭਿ੍ਸ਼ਟ ਤੰਤਰ | ਇਹ ਸਾਬਤ ਤੇ ਸਪਸ਼ਟ ਹੈ ਕਿ ਜੇਕਰ ਸਰਕਾਰ ਨੇ ਤੁਰੰਤ ਇਸ ਮਾਮਲੇ ਵਿਚ ਦਖਲ ਨਾ ਦਿੱਤਾ ਅਤੇ ਪੱਕੀ ਪਰਚੀ ਦੀ ਪ੍ਰਕਿਰਿਆ ਨੂੰ ਪਾਰਦਰਸ਼ੀ ਨਾ ਬਣਾਇਆ ਤਾਂ ਪੰਜਾਬ ਦਾ ਕਿਸਾਨ ਕਰਜ਼ੇ ਦੇ ਉਸ ਮੱਕੜਜਾਲ ਵਿਚ ਹੋਰ ਬੁਰੀ ਤਰ੍ਹਾਂ ਫਸ ਜਾਵੇਗਾ, ਜਿਸ ਵਿਚੋਂ ਨਿਕਲਣਾ ਉਸ ਲਈ ਅਸੰਭਵ ਹੋਵੇਗਾ | ਹੁਣ ਦੇਖਣਾ ਇਹ ਹੋਵੇਗਾ ਕਿ ਕੀ ਪ੍ਰਸ਼ਾਸਨ ਇਸ 'ਵਿਆਜ ਦੇ ਮੀਟਰ' ਨੂੰ ਰੋਕਣ ਲਈ ਕੋਈ ਠੋਸ ਕਦਮ ਚੁੱਕਦਾ ਹੈ ਜਾਂ ਫਿਰ ਕਿਸਾਨ ਇਸੇ ਤਰ੍ਹਾਂ ਲੁੱਟ ਦਾ ਸ਼ਿਕਾਰ ਹੁੰਦਾ ਰਹੇਗਾ |
