ਰਾਜਪੁਰਾ, 13 ਮਈ (ਜੀ.ਪੀ. ਸਿੰਘ)-ਸ਼ੰਭੂ ਰੇਲ ਧਮਾਕੇ ਤੋਂ ਬਾਅਦ ਰੇਲਵੇ ਪੁਲਿਸ ਵਲੋਂ ਖੇਤਰ ਵਿਚ ਜਾਰੀ ਅਲਰਟ ਦੇ ਚੱਲਦਿਆਂ ਅੱਜ ਸਵੇਰੇ ਰੇਲਵੇ ਪੁਲਿਸ ਪਾਰਟੀ ਨੂੰ ਗਸ਼ਤ ਦੌਰਾਨ ਰਾਜਪੁਰਾ ਰੇਲਵੇ ਸਟੇਸ਼ਨ ਨੇੜਲੇ ਯਾਰਡ ਵਿਚੋਂ 4 ਦੇਸੀ ਪਿਸਤੌਲਾਂ ਅਤੇ 6 ਖ਼ਾਲੀ ਮੈਗਜ਼ੀਨਾਂ ਵਾਲਾ ਇਕ ਬੈਗ ਮਿਲਿਆ | ਇਸ ਸੰਬੰਧੀ ਜਾਣਕਾਰੀ ਦਿੰਦੇ ਹੋਏ ਰਾਜਪੁਰਾ ਰੇਲਵੇ ਪੁਲਿਸ ਚੌਂਕੀ ਦੇ ਇੰਚਾਰਜ ਥਾਣੇਦਾਰ ਜਸਵਿੰਦਰ ਸਿੰਘ ਨੇ ਦੱਸਿਆ ਸ਼ੰਭੂ ਰੇਲ ਧਮਾਕੇ ਤੋਂ ਬਾਅਦ ਖੇਤਰ ਵਿਚ ਜਾਰੀ ਅਲਰਟ ਦੇ ਚੱਲਦਿਆਂ ਅੱਜ ਸਵੇਰੇ ਉਹ ਪੁਲਿਸ ਪਾਰਟੀ ਨਾਲ ਰਾਜਪੁਰਾ-ਸਰਾਏਾਬੰਜਾਰਾ ਮੁੱਖ ਰੇਲ ਮਾਰਗ 'ਤੇ ਰੇਲਵੇ ਟਰੈਕ ਦੀ ਜਾਂਚ ਕਰ ਰਹੇ ਸਨ ਤਾਂ ਅਚਾਨਕ ਸਟੇਸ਼ਨ ਨੇੜਲੇ ਰੇਲ ਯਾਰਡ 'ਚ ਇਕ ਲਾਵਾਰਸ ਭਾਰੀ ਬੈਗ ਮਿਲਿਆ | ਜਿਸ 'ਤੇ ਉਨ੍ਹਾਂ ਨੇ ਕਾਫ਼ੀ ਦੇਰ ਨਿਗਰਾਨੀ ਰੱਖੀ ਕਿ ਕੋਈ ਵਿਅਕਤੀ ਬੈਗ ਨੂੰ ਚੁੱਕਣ ਆਵੇਗਾ ਪਰ ਕੋਈ ਵਿਅਕਤੀ ਨਾਂਹ ਆਉਣ 'ਤੇ ਉਨ੍ਹਾਂ ਨੇ ਬੈਗ ਦੀ ਤਲਾਸ਼ੀ ਕੀਤੀ ਤਾਂ ਉਸ ਵਿਚੋਂ 4 ਦੇਸੀ ਪਿਸਤੌਲਾਂ ਸਣੇ 4 ਮੈਗਜ਼ੀਨ ਅਤੇ 2 ਵੱਖਰੇ ਹੋਰ ਮੈਗਜ਼ੀਨ ਮਿਲੇ | ਉਨ੍ਹਾਂ ਦੱਸਿਆ ਕਿ ਸਮਾਜ ਵਿਰੋਧੀ ਅਨਸਰ ਰਾਜਪੁਰਾ ਰੇਲ ਖੇਤਰ ਵਿਚ ਅਜੇ ਵੀ ਸਰਗਰਮ ਲੱਗਦੇ ਹਨ ਤੇ ਇਨ੍ਹਾਂ ਪਿਸਤੌਲਾਂ ਦਾ ਮਿਲਣਾ ਇਹ ਸਾਬਤ ਕਰਦਾ ਹੈ | ਉਨ੍ਹਾਂ ਦੱਸਿਆ ਕਿ ਸੀ.ਸੀ.ਟੀ.ਵੀ. ਕੈਮਰਿਆਂ ਨੂੰ ਖੰਗਾਲਿਆ ਜਾ ਰਿਹਾ ਹੈ ਤੇ ਇਸ ਮਾਮਲੇ ਦੀ ਬਹੁਤ ਬਾਰੀਕੀ ਨਾਲ ਵਿਭਾਗ ਜਾਂਚ ਕਰ ਰਿਹਾ ਹੈ | ਇਸ ਮੌਕੇ ਸਹਾਇਕ ਥਾਣੇਦਾਰ ਨਿਰਮਲ ਸਿੰਘ, ਹੌਲਦਾਰ ਮੇਹਰ ਸਿੰਘ, ਹੌਲਦਾਰ ਸੁੱਚਾ ਰਾਮ, ਹੌਲਦਾਰ ਮਨਿੰਦਰ ਕੌਰ ਮੌਜੂਦ ਸਨ |
