ਗਿੱਦੜਬਾਹਾ, 20 ਫ਼ਰਵਰੀ (ਸ਼ਿਵਰਾਜ ਸਿੰਘ ਬਰਾੜ)-ਨਗਰ ਕੌਸਲ ਗਿੱਦੜਬਾਹਾ ਦੇ ਈ. ਓ. 'ਤੇ ਕੌਂਸਲ ਦੇ ਕਰਮਚਾਰੀ ਦੀ ਹੀ ਪਤਨੀ ਵਲੋਂ ਗ਼ਲਤ ਹਰਕਤਾਂ ਕਰਨ ਦੇ ਗੰਭੀਰ ਦੋਸ਼ ਲਗਾਏ ਗਏ ਹਨ | ਪੀੜਤ ਔਰਤ ਵਲੋਂ ਥਾਣਾ ਗਿੱਦੜਬਾਹਾ ਵਿਖੇ ਕਥਿਤ ਦੋਸ਼ੀ 'ਤੇ ਸਖ਼ਤ ਕਾਨੂੰਨੀ ਕਾਰਵਾਈ ਕਰਨ ਦੀ ਲਿਖ਼ਤੀ ਸ਼ਿਕਾਇਤ ਦਿੱਤੀ ਗਈ ਹੈ | ਪੀੜਤ ਔਰਤ ਖ਼ੁਸ਼ੀ ਰਾਣੀ ਨੇ ਪੁਲਿਸ ਨੂੰ ਦਿੱਤੀ ਗਈ ਸ਼ਿਕਾਇਤ 'ਚ ਕਿਹਾ ਹੈ ਕਿ ਉਸ ਦਾ ਪਤੀ ਕਪਿਲ ਕੁਮਾਰ ਨਗਰ ਕਾੌਸਲ ਗਿੱਦੜਬਾਹਾ ਵਿਖੇ ਸੇਵਾਦਾਰ ਨੌਕਰੀ ਕਰਦਾ ਹੈ | ਕੁਝ ਦਿਨ ਪਹਿਲਾਂ ਉਸ ਦਾ ਆਪਣੇ ਪਤੀ ਕਪਿਲ ਕੁਮਾਰ ਨਾਲ ਆਪਸ 'ਚ ਮਨ-ਮੁਟਾਵ ਹੋ ਗਿਆ, ਤਾਂ ਘਰ 'ਚ ਕੋਈ ਜ਼ਿੰਮੇਵਾਰ ਵਿਅਕਤੀ ਨਾ ਹੋਣ ਕਰਕੇ ਉਹ ਕੌਂਸਲ ਵਿਚ ਈ. ਓ. ਪਾਸ ਇਸ ਕਰਕੇ ਗਈ ਕਿ ਉਹ ਉਸ ਦੇ ਪਤੀ ਨੂੰ ਸਮਝਾ ਦੇਣਗੇ | ਪੀੜਤ ਨੇ ਕਿਹਾ ਕਿ ਈ. ਓ. ਨੇ ਉਸ ਦੀ ਮਜ਼ਬੂਰੀ ਦਾ ਨਾਜਾਇਜ਼ ਫ਼ਾਇਦਾ ਉਠਾਉਂਦਿਆਂ ਉਸ ਪਾਸੋਂ ਇਕ ਦਰਖ਼ਾਸਤ ਉਸ ਦੇ ਪਤੀ ਕਪਿਲ ਖ਼ਿਲਾਫ਼ ਲਿਖਵਾ ਕੇ ਰੱਖ ਲਈ | ਇਸ ਦੌਰਾਨ ਉਹ ਉਸ ਨਾਲ ਗ਼ਲਤ ਨੀਅਤ ਨਾਲ ਗੱਲਬਾਤ ਕਰਨ ਲੱਗਾ | ਜਦੋਂ ਉਸ ਨੇ ਇਸ ਦਾ ਵਿਰੋਧ ਕੀਤਾ, ਤਾਂ ਈ. ਓ. ਨੇ ਉਸ ਦੇ ਪਤੀ ਨੂੰ ਪੁਲਿਸ ਤੋਂ ਕੁਟਵਾਉਣ ਤੇ ਨੌਕਰੀ ਤੋਂ ਕਢਵਾ ਦੇਣ ਦੀਆਂ ਧਮਕੀਆਂ ਦਿੱਤੀਆਂ | ਪੀੜਤ ਨੇ ਕਿਹਾ ਕਿ ਦੇਰ ਸ਼ਾਮ ਗਿੱਦੜਬਾਹਾ ਪੁਲਿਸ ਉਸ ਦੇ ਪਤੀ ਨੂੰ ਥਾਣੇ ਲੈ ਗਈ, ਜਿਥੇ ਪੁਲਿਸ ਨੇ ਉਸ ਦੇ ਪਤੀ ਨਾਲ ਆਪਸੀ ਸਮਝੌਤਾ ਕਰਵਾ ਦਿੱਤਾ ਗਿਆ | ਉਨ੍ਹਾਂ ਕਿਹਾ ਕਿ ਅਗਲੀ ਦਿਨ ਉਸ ਦਾ ਪਤੀ ਨਗਰ ਕੌਂਸਲ ਦੇ ਦਫ਼ਤਰ ਗਿਆ, ਤਾਂ ਈ. ਓ. ਵਲੋਂ ਉਸ ਦੇ ਪਤੀ ਨੂੰ ਜਵਾਬ-ਤਲਬੀ ਕਰਨ ਤੇ ਨੌਕਰੀ ਤੋਂ ਕੱਢਣ ਦੀਆਂ ਧਮਕੀਆਂ ਦਿੱਤੀਆਂ ਗਈਆਂ | ਪੀੜਤ ਨੇ ਪੁਲਿਸ ਪਾਸ ਦਿੱਤੀ ਸ਼ਿਕਾਇਤ ਵਿਚ ਉਸ ਨੂੰ ਇਨਸਾਫ਼ ਦੇਣ ਦੀ ਗ਼ੁਹਾਰ ਲਗਾਈ ਹੈ | ਇਸ ਸੰਬੰਧੀ ਈ. ਓ. ਸੁਨੀਲ ਦੱਤ ਨੇ ਫ਼ੋਨ 'ਤੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਉਸ 'ਤੇ ਲਗਾਏ ਗਏ ਇਲਜ਼ਾਮ ਬੇਬੁਨਿਆਦ ਤੇ ਝੂਠੇ ਹਨ | ਉਨ੍ਹਾਂ ਕਿਹਾ ਕਿ ਉਸ ਵਲੋਂ ਹਮਦਰਦੀ ਨਾਲ ਪਤੀ-ਪਤਨੀ ਦਾ ਆਪਸੀ ਸਮਝੌਤਾ ਕਰਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਔਰਤ ਦੇ ਪਤੀ ਕਪਿਲ ਨੇ ਨਗਰ ਕੌਂਸਲ ਦੇ ਇਕ ਕਰਮਚਾਰੀ ਕੋਲ ਆ ਕੇ ਕਿਹਾ ਕਿ ਜੇੇਕਰ ਕੌਂਸਲ ਦਾ ਕੋਈ ਕਰਮਚਾਰੀ ਜਾਂ ਅਧਿਕਾਰੀ ਉਨ੍ਹਾਂ ਦੇ ਘਰੇਲੂ ਝਗੜੇ 'ਚ ਪਵੇਗਾ ਤਾਂ ਉਹ ਆਤਮ-ਹੱਤਿਆ ਕਰ ਲਵੇਗਾ, ਜਿਸ ਦੀ ਸ਼ਿਕਾਇਤ ਉਨ੍ਹਾਂ ਵਲੋਂ ਥਾਣੇ ਦਿੱਤੀ ਗਈ ਸੀ | ਥਾਣਾ ਮੁਖੀ ਹਰਗੋਬਿੰਦ ਸਿੰਘ ਮਾਨ ਨੇ ਕਿਹਾ ਕਿ ਇਕ ਦਰਖ਼ਾਸਤ ਖ਼ੁਸ਼ੀ ਰਾਣੀ ਵਲੋਂ ਆਈ ਹੈ ਤੇ ਇਸ ਦੀ ਪੜਤਾਲ ਕਰਨ 'ਤੇ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ |
