ਸ੍ਰੀ ਮੁਕਤਸਰ ਸਾਹਿਬ, 2 ਜੁਲਾਈ (ਹਰਮਹਿੰਦਰ ਪਾਲ)-ਮੁਕਤਸਰ-ਕੋਟਕਪੂਰਾ ਰੋਡ ਮੁੱਖ ਮਾਰਗ ਉਪਰੋਂ ਲੰਘਦੀ ਰਾਜਸਥਾਨ ਕੈਨਾਲ ਦਾ ਉਪਰਲਾ ਕਿਨਾਰਾ ਸੜਕ ਦੇ ਪੱਧਰ ਨਾਲੋਂ ਨੀਵਾਂ ਹੋਣ ਕਰਕੇ ਕਰੀਬ 30 ਸਾਲ ਪਹਿਲਾਂ ਇਕ ਬੱਸ ਨਹਿਰ ਦੀ ਪਟੜੀ ਤੋਂ ਸਿੱਧੀ ਨਹਿਰ ਵਿਚ ਉਤਰ ਗਈ ਸੀ ਅਤੇ ਵੱਡੀ ਗਿਣਤੀ ’ਚ ਸਵਾਰੀਆਂ ਮਰ ਗਈਆਂ ਸਨ। ਉਸ ਤੋਂ ਬਾਅਦ ਨਹਿਰ ਦੀ ਇਸ ਪਟੜੀ ਉਪਰ ਲੋਹੇ ਦੀ ਇਕ ਮਜ਼ਬੂਤ ਰੈਲਿੰਗ ਲਾ ਦਿੱਤੀ ਗਈ ਸੀ। ਪਰ ਪਿਛਲੇ ਕਈ ਸਾਲਾਂ ਤੋਂ ਇਹ ਰੈਲਿੰਗ ਗਾਇਬ ਹੋ ਗਈ ਹੈ। ਹੁਣ ਨਹਿਰ ਦੀ ਇਹ ਪਟੜੀ ਨੰਗੀ ਹੈ ਅਤੇ ਕਿਸੇ ਸਮੇਂ ਵੀ ਕੋਈ ਹਾਦਸਾ ਵਾਪਰ ਸਕਦਾ ਹੈ। ਘਟਨਾ ਵਾਲੀ ਬੱਸ ਕੋਟਕਪੂਰਾ ਦੀ ਤਰਫੋਂ ਮੁਕਤਸਰ ਵੱਲ ਆ ਰਹੀ ਸੀ। ਕੋਟਕਪੂਰਾ ਵਾਲੀ ਸੜਕ ਅਤੇ ਨਹਿਰ ਦਾ ਕਿਨਾਰਾ ਬਿਲਕੁਲ ਬਰਾਬਰ ਹਨ। ਇਸ ਕਰਕੇ ਹਾਦਸੇ ਦਾ ਖਤਰਾ ਬਣਿਆ ਰਹਿੰਦਾ ਹੈ। ਇਸੇ ਤਰ੍ਹਾਂ ਰਾਜਸਥਾਨ ਕੈਨਾਲ ਦੇ ਬਰਾਬਰ ਚੱਲਦੀ ਸਰਹੰਦ ਫੀਡਰ ਦੇ ਪਟੜੀ ਦੇ ਕਿਨਾਰੇ ਵੀ ਰੈਲਿੰਗ ਤੋਂ ਬਿਨ੍ਹਾਂ ਹੀ ਹਨ। ਲੋਕਾਂ ਅਤੇ ਰਾਹਗੀਰਾਂ ਦੀ ਮੰਗ ਹੈ ਕਿ ਦੋਹਾਂ ਨਹਿਰਾਂ ਦੀਆਂ ਪਟੜੀਆਂ ਦੇ ਨਾਲ-ਨਾਲ ਮਜ਼ਬੂਤ ਰੈਲਿੰਗ ਜਾਂ ਕੰਕਰੀਟ ਦੀ ਦੀਵਾਰ ਬਣਾਈ ਜਾਵੇ ਤਾਂ ਕਿ ਹਾਦਸੇ ਸਮੇਂ ਬਚਾਅ ਹੋ ਸਕੇ।
