ਅੰਮਿ੍ਤਸਰ, 30 ਜਨਵਰੀ (ਸੁਰਿੰਦਰ ਕੋਛੜ)-ਬੰਗਲਾਦੇਸ਼ ਦੀ ਰਾਜਧਾਨੀ ਢਾਕਾ ਤੋਂ ਪਹਿਲੀ ਸਿੱਧੀ ਉਡਾਣ 14 ਸਾਲਾਂ ਬਾਅਦ ਪਾਕਿਸਤਾਨ ਦੇ ਕਰਾਚੀ ਦੇ ਜਿਨਾਹ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਪਹੁੰਚੀ, ਜਿਸ ਨਾਲ ਦੋਵਾਂ ਦੇਸ਼ਾਂ ਵਿਚਕਾਰ ਹਵਾਈ ਸੰਪਰਕ ਮੁੜ ਸ਼ੁਰੂ ਹੋਇਆ | ਪਾਕਿਸਤਾਨ ਹਵਾਈ ਅੱਡਾ ਅਥਾਰਿਟੀ ਅਨੁਸਾਰ ਬਿਮਾਨ ਬੰਗਲਾਦੇਸ਼ ਏਅਰਲਾਈਨਜ਼ ਦੀ ਉਡਾਣ ਬੀ. ਜੀ.-341 ਵੀਰਵਾਰ ਸ਼ਾਮ ਨੂੰ ਢਾਕਾ ਤੋਂ ਕਰਾਚੀ ਪਹੁੰਚੀ | ਉਡਾਣ ਦਾ ਹਵਾਈ ਅੱਡੇ 'ਤੇ ਰਵਾਇਤੀ ਜਲ ਤੋਪਾਂ ਦੀ ਸਲਾਮੀ ਨਾਲ ਸਵਾਗਤ ਕੀਤਾ ਗਿਆ | ਏਅਰਲਾਈਨ ਵਲੋਂ ਜਾਰੀ ਬਿਆਨ ਅਨੁਸਾਰ ਇਹ ਉਡਾਣ ਹੁਣ ਹਫ਼ਤੇ 'ਚ ਦੋ ਵਾਰ ਵੀਰਵਾਰ ਅਤੇ ਸਨਿਚਰਵਾਰ ਨੂੰ ਚੱਲੇਗੀ | ਇਹ ਉਡਾਣ ਢਾਕਾ ਤੋਂ ਰਾਤ 8 ਵਜੇ ਰਵਾਨਾ ਹੋਵੇਗੀ ਅਤੇ ਰਾਤ 11 ਵਜੇ ਕਰਾਚੀ ਪਹੁੰਚੇਗੀ | ਵਾਪਸੀ ਉਡਾਣ ਕਰਾਚੀ ਤੋਂ ਅੱਧੀ ਰਾਤ 12 ਵਜੇ ਰਵਾਨਾ ਹੋਵੇਗੀ ਅਤੇ ਸਵੇਰੇ 4:20 ਵਜੇ ਢਾਕਾ ਪਹੁੰਚੇਗੀ | ਢਾਕਾ ਅਤੇ ਕਰਾਚੀ ਵਿਚਕਾਰ ਸਿੱਧੀਆਂ ਉਡਾਣਾਂ ਦਾ ਉਦੇਸ਼ ਦੋਵਾਂ ਦੇਸ਼ਾਂ ਵਿਚਕਾਰ ਵਪਾਰ ਅਤੇ ਹੋਰ ਸੰਬੰਧਾਂ ਨੂੰ ਮਜ਼ਬੂਤ ਕਰਨਾ ਹੈ |
