ਮੂਨਕ (ਸੰਗਰੂਰ), 26 ਫ਼ਰਵਰੀ (ਕੇਵਲ ਸਿੰਗਲਾ)-ਕੇਂਦਰ ਸਰਕਾਰ ਨੇ ਘਰੇਲੂ ਬਾਜ਼ਾਰ ਵਿਚ ਕੀਮਤਾਂ ਨੂੰ ਕਾਬੂ 'ਚ ਰੱਖਣ ਅਤੇ ਸਪਲਾਈ ਨੂੰ ਸੰਤੁਲਿਤ ਬਣਾਈ ਰੱਖਣ ਦੇ ਉਦੇਸ਼ ਨਾਲ 25 ਲੱਖ ਮੀਟਿ੍ਕ ਟਨ ਕਣਕ ਦੇ ਨਿਰਯਾਤ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ | ਇਸ ਸੰਬੰਧੀ ਅਧਿਕਾਰਕ ਨੋਟੀਫ਼ਿਕੇਸ਼ਨ ਬੀਤੇ ਦਿਨੀਂ ਡਾਇਰੈਕਟੋਰੇਟ ਜਨਰਲ ਆਫ਼ ਵਿਦੇਸ਼ ਟਰੇਡ ਵਲੋਂ ਜਾਰੀ ਕੀਤਾ ਗਿਆ | ਸਰਕਾਰ ਵਲੋਂ ਇਸ ਦੇ ਨਾਲ ਹੀ 5 ਲੱਖ ਮੀਟਿ੍ਕ ਟਨ ਕਣਕ ਦੇ ਆਟੇ ਅਤੇ ਸੰਬੰਧਿਤ ਉਤਪਾਦਾਂ ਦੇ ਨਿਰਯਾਤ ਦੀ ਵੀ ਇਜਾਜ਼ਤ ਦਿੱਤੀ ਗਈ ਹੈ | ਹਾਲਾਂਕਿ ਇਹ ਫੈਸਲਾ ਇਸ ਮਹੀਨੇ ਦੀ ਸ਼ੁਰੂਆਤ ਵਿਚ ਹੀ ਲਿਆ ਗਿਆ ਸੀ, ਪਰ ਇਸ ਬਾਰੇ ਸੂਚਨਾ ਮੰਗਲਵਾਰ ਨੂੰ ਜਾਰੀ ਕੀਤੀ ਗਈ | ਸਰਕਾਰੀ ਅੰਦਾਜ਼ਿਆਂ ਅਨੁਸਾਰ, ਐਫ਼ ਸੀ ਆਈ ਦੇ ਕੇਂਦਰੀ ਭੰਡਾਰ ਵਿਚ 1 ਅਪ੍ਰੈਲ 2026 ਤੱਕ ਕਣਕ ਦਾ ਸਟਾਕ ਲਗਭਗ 182 ਲੱਖ ਮੀਟਿ੍ਕ ਟਨ ਹੋਣ ਦੀ ਸੰਭਾਵਨਾ ਹੈ | ਸਰਕਾਰ ਨੂੰ ਉਮੀਦ ਹੈ ਕਿ ਇਸ ਕਦਮ ਨਾਲ ਬਾਜ਼ਾਰ ਵਿਚ ਕੀਮਤਾਂ ਸਥਿਰ ਰਹਿਣਗੀਆਂ | ਦੱਸਣਯੋਗ ਹੈ ਕਿ ਹੁਣ ਐਫ਼ ਸੀ ਆਈ ਦੇ ਗੁਦਾਮਾਂ 'ਚ ਨਵੀਂ ਕਣਕ ਅਤੇ ਚੌਲਾਂ ਨੂੰ ਭੰਡਾਰ ਕਰਨ ਦੀ ਸਮਰੱਥਾ ਨਾ ਹੋਣ ਕਾਰਨ ਚੌਲਾਂ ਮਿੱਲ ਮਾਲਕਾਂ ਨੂੰ ਚੌਲ ਡਲੀਵਰ ਕਰਨ 'ਚ ਭਾਰੀ ਦਿੱਕਤ ਆ ਰਹੀ ਹੈ ਸੋ ਕੇਂਦਰ ਸਰਕਾਰ ਦਾ ਇਹ ਫੈਸਲਾ ਚੌਲ ਮਿੱਲ ਮਾਲਕਾਂ ਅਤੇ ਕਿਸਾਨਾਂ ਲਈ ਲਾਹੇਵੰਦ ਸਾਬਤ ਹੋਵੇਗਾ | ਸਰਕਾਰ ਦਾ ਵੀ ਇਹ ਮੰਨਣਾ ਹੈ ਕਿ ਇਸ ਫ਼ੈਸਲੇ ਨਾਲ ਕਿਸਾਨਾਂ ਨੂੰ ਨੁਕਸਾਨ ਵਾਲੀ ਵਿਕਰੀ ਤੋਂ ਬਚਾਇਆ ਜਾ ਸਕੇਗਾ ਅਤੇ ਦੇਸ਼ ਦੀ ਖਾਧ ਸੁਰੱਖਿਆ ਨੂੰ ਮਜ਼ਬੂਤੀ ਮਿਲ ਸਕਦੀ ਹੈ |