ਡੱਬਵਾਲੀ/ਲੰਬੀ, 22 ਅਪੈ੍ਰਲ (ਇਕਬਾਲ ਸਿੰਘ ਸ਼ਾਂਤ, ਮੇਵਾ ਸਿੰਘ)-ਲੰਬੀ ਹਲਕੇ ਦੇ ਪਿੰਡ ਫ਼ਤਿਹਪੁਰ ਮਣੀਆਂ ਵਿਖੇ ਅੱਜ ਖੌਫ਼ਨਾਕ ਘਟਨਾ ਵਿਚ ਕਥਿਤ ਪ੍ਰੇਮ ਸੰਬੰਧਾਂ ਤਹਿਤ ਇਕ ਆਂਗਣਵਾੜੀ ਹੈਲਪਰ ਰਮਨਦੀਪ ਕੌਰ ਨੂੰ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ | ਘਟਨਾ ਸਵੇਰੇ ਅੱਠ ਵਜੇ ਇੱਥੋਂ ਦੇ ਆਂਗਣਵਾੜੀ ਸੈਂਟਰ ਵਿਚ ਵਾਪਰੀ | ਜ਼ਿਲ੍ਹਾ ਅੰਮਿ੍ਤਸਰ ਦੀ ਤਹਿਸੀਲ ਅਜਨਾਲਾ ਦੇ ਪਿੰਡ ਮਹਿਲਾਵਾਲਾ ਦਾ ਨੌਜਵਾਨ ਕਰਨਦੀਪ ਸਿੰਘ ਅੱਜ ਸੈਂਟਰ ਪੁੱਜਿਆ ਅਤੇ ਉਥੇ ਪਈ ਲੋਹੇ ਦੀ ਰਾਡ ਨਾਲ ਹਮਲਾ ਕਰਕੇ ਰਮਨਦੀਪ ਕੌਰ ਦੇ ਸਿਰ 'ਤੇ ਵਾਰ ਕੀਤੇ ਤੇ ਤੇਜ਼ਧਾਰ ਹਥਿਆਰ ਨਾਲ ਉਸਦੇ ਗਰਦਨ, ਚਿਹਰੇ 'ਤੇ ਵਾਰ ਕੀਤੇ ਤੇ ਕੰਨ ਨੂੰ ਵੱਢ ਦਿੱਤਾ | ਘਟਨਾ ਮਗਰੋਂ ਮੁਲਜ਼ਮ ਸੈਂਟਰ ਦੀ ਕੰਧ ਟੱਪ ਕੇ ਖੂਨ ਨਾਲ ਲਿੱਬੜੇ ਹੱਥਾਂ ਸਣੇ ਇਕ ਕਾਰ 'ਤੇ ਲਿਫਟ ਲੈ ਕੇ ਫਰਾਰ ਹੋ ਗਿਆ | ਲੰਬੀ ਪੁਲਿਸ ਨੇ ਮਿ੍ਤਕਾ ਦੇ ਫੋਨ ਦੇ ਆਧਾਰ 'ਤੇ ਮਹਿਜ ਢਾਈ ਘੰਟਿਆਂ ਵਿਚ ਮੁਲਜ਼ਮ ਨੂੰ ਕਾਬੂ ਕਰ ਲਿਆ | ਜ਼ਿਕਰਯੋਗ ਹੈ ਕਿ ਲਿਫਟ ਦੇਣ ਵਾਲੇ ਕਾਰ ਸਵਾਰ ਨੌਜਵਾਨ ਨੇ ਸਿਆਣਪ ਤਹਿਤ ਮੁਲਜ਼ਮ ਦੀ ਮੋਬਾਈਲ ਵੀਡੀਓ ਬਣਾ ਲਈ, ਜੋ ਕਿ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਗਈ | ਮਿ੍ਤਕਾ ਰਮਨਦੀਪ ਕੌਰ ਦਾ ਫਤਿਹਪੁਰ ਮਣੀਆਂ ਦੇ ਗੁਰਬੁੱਟਣ ਸਿੰਘ ਨਾਲ ਵਿਆਹ 2017 'ਚ ਹੋਇਆ ਸੀ ਤੇ ਉਨਾਂ ਦੇ ਇਕ 7 ਸਾਲਾ ਪੁੱਤਰ ਅਤੇ ਇਕ ਪੰਜ ਸਾਲਾ ਲੜਕੀ ਹੈ | ਲੰਬੀ ਸਬ ਡਵੀਜਨ ਦੇ ਡੀ.ਐਸ.ਪੀ. ਹਰਬੰਸ ਸਿੰਘ ਲੰਬੀ ਥਾਣਾ ਦੇ ਮੁਖੀ ਜਸਵੀਰ ਸਿੰਘ ਨੇ ਪ੍ਰੈੱਸ ਕਾਨਫਰੰਸ ਮੌਕੇ ਦੱਸਿਆ ਕਿ ਮਿ੍ਤਕਾ ਰਮਨਦੀਪ ਕੌਰ ਤੇ ਮੁਲਜ਼ਮ ਕਰਨਦੀਪ ਦੀ ਕਰੀਬ ਛੇ ਮਹੀਨੇ ਪਹਿਲਾਂ ਫੇਸਬੁਕ 'ਤੇ ਜਾਣ-ਪਛਾਣ ਹੋਈ ਸੀ | ਡੀ.ਐਸ.ਪੀ. ਮੁਤਾਬਕ ਮੁਲਜ਼ਮ ਨੇ ਦੱਸਿਆ ਕਿ ਕੁਝ ਸਮੇਂ ਤੋਂ ਰਮਨਦੀਪ ਕੌਰ ਉਸਨੂੰ ਮੋਬਾਈਲ ਗੱਲਬਾਤ ਲਈ ਘੱਟ ਸਮਾਂ ਦੇ ਰਹੀ ਸੀ | ਜਿਸ ਕਾਰਨ ਉਹ ਅੱਜ ਸਵੇਰੇ ਹੀ ਫ਼ਤਿਹਪੁਰ ਮਣੀਆਂ ਪੁੱਜਿਆ ਤੇ ਵਾਰਦਾਤ ਨੂੰ ਅੰਜਾਮ ਦੇ ਦਿੱਤਾ | ਜਿਸ 'ਤੇ ਹੱਤਿਆ ਦਾ ਮੁਕੱਦਮਾ ਦਰਜ ਕੀਤਾ ਗਿਆ ਹੈ |
