ਪੰਜਾਬ ਦੇ ਲੋਕਾਂ ਨੂੰ ਗੁੰਮਰਾਹ ਕਰਨ ਦੀ ਸਾਜਿਸ਼ ਤਹਿਤ ਹੋ ਰਹੇ ਨੇ ਸੀ.ਬੀ.ਆਈ., ਈ. ਡੀ. ਦੇ ਛਾਪੇ-ਬਾਜਵਾ <br/>

ਕਾਹਨੂੰਵਾਨ, 12 ਮਈ (ਨਿਸ਼ਾਨ ਸਿੰਘ ਚਾਹਲ)-ਵਿਜੀਲੈਂਸ ਹੈੱਡਕਵਾਟਰ ਚੰਡੀਗੜ੍ਹ ਵਿਚ ਸੋਮਵਾਰ ਰਾਤ ਨੂੰ ਸੀ.ਬੀ.ਆਈ. ਦੇ ਮਾਰੇ ਛਾਪੇ ਬਾਰੇ ਆਪਣਾ ਪ੍ਰਤੀਕਰਮ ਦਿੰਦਿਆਂ ਵਿਰੋਧੀ ਧਿਰ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਨੇ ਕਿਹਾ ਕਿ ਪੰਜਾਬ ਵਿਚ ਈ.ਡੀ. ਤੇ ਸੀ.ਬੀ.ਆਈ. ਦੇ ਰੇਡ ਕਰਨ ਦੇ ਜੋ ਡਰਾਮੇ ਹੋ ਰਹੇ ਹਨ, ਉਹ ਕੇਵਲ ਪੰਜਾਬ ਦੇ ਲੋਕਾਂ ਨੂੰ ਗੁੰਮਰਾਹ ਕਰਨ ਲਈ ਕੀਤੇ ਜਾ ਰਹੇ ਹਨ, ਕਿਉਂਕਿ ਸੱਤਾ ਸੰਭਾਲਦੇ ਹੀ ਭਗਵੰਤ ਮਾਨ ਸਰਕਾਰ ਦਿੱਲੀ ਦੇ ਇਸ਼ਾਰਿਆਂ 'ਤੇ ਕੰਮ ਕਰ ਰਹੀ ਹੈ | ਉਨ੍ਹਾਂ ਜਾਂਚ ਏਜੰਸੀਆਂ 'ਤੇ ਸਵਾਲ ਖੜੇ ਕੀਤੇ ਕਿ ਸੀ.ਬੀ.ਆਈ. ਤੇ ਈ.ਡੀ. 4 ਸਾਲ ਕਿੱਥੇ ਸੁੱਤੀਆਂ ਰਹੀਆਂ | ਕਾਹਨੂੰਵਾਨ ਵਿਚ ਪੱਤਰਕਾਰਾਂ ਨਾਲ ਨਾਲ ਗੱਲ ਕਰਦੇ ਹੋਏ ਸ: ਬਾਜਵਾ ਨੇ ਕਿਹਾ ਕਿ ਭਿ੍ਸ਼ਟਾਚਾਰ ਦੇ ਖ਼ਾਤਮੇ ਲਈ ਬਣਾਏ ਗਏ ਵਿਜੀਲੈਂਸ ਵਿਭਾਗ ਉੱਪਰ ਹੀ ਜੇਕਰ ਰਿਸ਼ਵਤ ਦੇ ਦੋਸ਼ ਲੱਗਣ ਤਾਂ ਉਸ ਦੇਸ਼ ਦਾ ਰੱਬ ਹੀ ਰਾਖਾ ਹੈ |