ਬਟਾਲਾ 'ਚ ਚੋਣ ਦੌਰਾਨ ਗਰਮ ਰਹੇ ਮਾਹੌਲ ਕਾਰਨ ਵੋਟਰ ਰਹੇ ਸਹਿਮੇ <br/>

ਬਟਾਲਾ, 26 ਮਈ (ਸਤਿੰਦਰ ਸਿੰਘ)-ਬਟਾਲਾ ਦੇ ਵਾਰਡ ਨੰ: 34 ਵਿਚ ਵੋਟਾਂ ਦੀ ਸਮਾਪਤੀ ਮੌਕੇ ਮਾਹੌਲ ਉਸ ਸਮੇਂ ਗਰਮ ਹੋ ਗਿਆ, ਜਦੋਂ ਫਾਰਮ ਨੰਬਰ 33ਸੀ ਨਾ ਭਰਨ 'ਤੇ ਕਾਂਗਰਸੀਆਂ ਵਲੋਂ ਨਾਰਾਜ਼ਗੀ ਪ੍ਰਗਟ ਕੀਤੀ ਗਈ | ਉਨ੍ਹਾਂ ਵਲੋਂ ਕਰਮਚਾਰੀਆਂ ਨੂੰ ਏਜੰਟਾਂ ਸਾਹਮਣੇ ਹੀ 33ਸੀ ਫਾਰਮ ਭਰਨ ਲਈ ਕਿਹਾ ਗਿਆ ਤੇ ਕਿਹਾ ਇਹ ਫਾਰਮ ਸਾਡੇ ਸਾਹਮਣੇ ਭਰਿਆ ਜਾਵੇ ਤਾਂ ਕਿ ਸਾਨੂੰ ਪਤਾ ਲੱਗ ਸਕੇ ਕਿ ਕੁੱਲ ਕਿੰਨੀਆਂ ਵੋਟਾਂ ਪਈਆਂ ਹਨ, ਪ੍ਰੰਤੂ ਕਰਮਚਾਰੀਆਂ ਵਲੋਂ ਇਸ ਗੱਲ ਨੂੰ ਅੱਖੋਂ-ਪਰੋਖੇ ਕਰਨ 'ਤੇ ਸੈਂਕੜੇ ਕਾਂਗਰਸੀ ਉਥੇ ਇਕੱਠੇ ਹੋ ਗਏ ਤੇ ਉਨ੍ਹਾਂ ਵਲੋਂ ਨਾਅਰੇ ਲਗਾਉਣੇ ਸ਼ੁਰੂ ਕਰ ਦਿੱਤੇ | ਜਿਸ 'ਤੇ ਸਥਿਤੀ ਵਿਗੜਦਿਆਂ ਬਟਾਲਾ ਦੇ ਐਸ.ਐਸ.ਪੀ. ਭਾਰੀ ਫੋਰਸ ਸਮੇਤ ਪਹੁੰਚ ਗਏ ਤੇ ਪੁਲਿਸ ਨੇ ਵਧ ਰਹੇ ਤਣਾਅ ਦੀ ਸਥਿਤੀ ਨੂੰ ਕਾਬੂ ਹੇਠ ਕਰ ਲਿਆ | ਪੁਲਿਸ ਪ੍ਰਸ਼ਾਸਨ ਨੇ ਮੌਕਾ ਸਾਂਭਦਿਆਂ ਚੋਣ ਏਜੰਟ ਨੂੰ ਬਾਹਰ ਕੱਢਿਆ ਤੇ ਸਥਿਤੀ ਨੂੰ ਸਥਿਰ ਕਰ ਲਿਆ | ਵਾਰਡ ਨੰ: 30 ਵਿਚ ਆਮ ਆਦਮੀ ਪਾਰਟੀ ਤੇ ਭਾਜਪਾ ਦੇ ਆਗੂ ਆਪਸ ਵਿਚ ਭਿੜ ਗਏ | ਇਸ ਤੋਂ ਇਲਾਵਾ ਸ਼ਹਿਰ ਦੇ ਦਰਜਨ ਤੋਂ ਵੱਧ ਵਾਰਡਾਂ 'ਚ ਧੱਕਾਮੁੱਕੀ, ਹੱਥੋਪਾਈ, ਗਾਲੀ-ਗਲੋਚ ਤੇ ਰੱਜ ਕੇ ਤੂੰ-ਤੂੰ, ਮੈਂ-ਮੈਂ ਹੋਈ |