ਚੰਡੀਗੜ੍ਹ, 4 ਜੁਲਾਈ (ਅਜੀਤ ਬਿਊਰੋ)-ਭਾਰਤੀ ਜਨਤਾ ਪਾਰਟੀ ਪੰਜਾਬ ਦੇ ਪ੍ਰਧਾਨ ਕੇਵਲ ਸਿੰਘ ਢਿੱਲੋਂ ਨੇ ਬਰਨਾਲਾ ਦੇ ਧਨੌਲਾ ਵਿਖੇ ਨਵੇਂ ਕਾਲਜ ਦੇ ਐਲਾਨ ਨੂੰ ਡੁੱਬਦੀ ਸਰਕਾਰ ਦਾ ਝੂਠਾ ਸਹਾਰਾ ਕਰਾਰ ਦਿੰਦਿਆਂ ਕਿਹਾ ਕਿ ਭਗਵੰਤ ਮਾਨ ਸਰਕਾਰ ਸਿਰਫ਼ ਮੈਡੀਕਲ ਕਾਲਜਾਂ ਦੇ ਵਾਅਦੇ ’ਤੇ ਹੀ ਨਹੀਂ, ਸਗੋਂ ਪੰਜਾਬ ਦੇ ਹਰ ਵਰਗ ਨੌਜਵਾਨਾਂ, ਕਿਸਾਨਾਂ, ਔਰਤਾਂ ਦੀਆਂ ਸਕੀਮਾਂ ਅਤੇ ਮੁਲਾਜ਼ਮਾਂ ਦੇ ਹੱਕਾਂ ’ਤੇ ਪੰਜਾਬ ਨਾਲ ਧੋਖਾ ਕਰ ਚੁੱਕੀ ਹੈ। ਢਿੱਲੋਂ ਨੇ ਕਿਹਾ ਕਿ 2022-23 ਦੇ ਬਜਟ ਵਿਚ 16 ਨਵੇਂ ਮੈਡੀਕਲ ਕਾਲਜਾਂ ਦਾ ਐਲਾਨ ਹੋਇਆ, ਚਾਰ ਸਾਲ ਬੀਤ ਗਏ, ਇਕ ਵੀ ਕਾਲਜ ਧਰਾਤਲ ’ਤੇ ਨਹੀਂ ਉੱਤਰਿਆ। ਮਸਤੂਆਣਾ ਦੇ ਨੀਂਹ ਪੱਥਰ ਦੁਆਲੇ ਝੋਨਾ ਲਹਿਲਹਾ ਰਿਹਾ ਹੈ, ਗੁਰਦੁਆਰਾ ਸਾਹਿਬ ਨੇ ਜ਼ਮੀਨ ਵਾਪਸ ਲੈ ਲਈ। ਉਨ੍ਹਾਂ ਕਿਹਾ ਕਿ ਇਸ ਤੋਂ ਪਹਿਲਾਂ ਉਨ੍ਹਾਂ ਵਲੋਂ ਲਿਆਂਦਾ ਹੰਡਿਆਇਆ ਦਾ ਸੁਪਰ ਮਲਟੀਸਪੈਸ਼ਲਿਸਟੀ ਹਸਪਤਾਲ ਪ੍ਰੋਜੈਕਟ ਰੱਦ ਕਰ ਦਿੱਤਾ, ਠੀਕਰੀਵਾਲ ਦਾ ਨਰਸਿੰਗ ਕਾਲਜ ਹਵਾ ’ਚ ਲਟਕਿਆ ਹੈ ਅਤੇ ਹੁਣ ਧਨੌਲਾ ਨੂੰ ਬੇਵਕੂਫ਼ ਬਣਾਇਆ ਜਾ ਰਿਹਾ ਹੈ।
