ਉਡੀਕ ਸੂਚੀ ਵਾਲੇ ਯਾਤਰੀਆਂ ਲਈ ਵਰਦਾਨ ਸਾਬਤ ਹੋ ਰਹੀ ਹੈ ਭਾਰਤੀ ਰੇਲਵੇ ਦੀ ‘ਵਿਕਲਪ’ ਸਹੂਲਤ

ਫ਼ਿਰੋਜ਼ਪੁਰ, 20 ਜੁਲਾਈ (ਰਾਕੇਸ਼ ਚਾਵਲਾ)-ਭਾਰਤੀ ਰੇਲਵੇ ਦੁਆਰਾ ਆਨਲਾਈਨ ਰਿਜ਼ਰਵ ਟਿਕਟ ’ਤੇ ਯਾਤਰਾ ਕਰਨ ਵਾਲੇ ਉਡੀਕ ਸੂਚੀ ਦੇ ਯਾਤਰੀਆਂ ਦੀ ਸੁਵਿਧਾ ਲਈ ਸ਼ੁਰੂ ਕੀਤੀ ਗਈ ‘‘ਵਿਕਲਪ’’ ਯੋਜਨਾ ਯਾਤਰੀਆਂ ਨੂੰ ਵਧੇਰੇ ਸੁਵਿਧਾਜਨਕ ਅਤੇ ਯਕੀਨੀ ਯਾਤਰਾ ਦਾ ਮੌਕਾ ਪ੍ਰਦਾਨ ਕਰ ਰਹੀ ਹੈ। ਇਸ ਯੋਜਨਾ ਦੇ ਅਧੀਨ ਜੇਕਰ ਅਸਲ ਰੇਲਗੱਡੀ ਵਿਚ ਰਿਜ਼ਰਵ ਸੀਟ ਉਪਲਬਧ ਨਹੀਂ ਹੋ ਪਾਉਂਦੀ, ਤਾਂ ਯਾਤਰੀਆਂ ਨੂੰ ਉਨ੍ਹਾਂ ਦੀ ਸਹਿਮਤੀ ਦੇ ਆਧਾਰ ’ਤੇ ਉਸੇ ਰੂਟ ਦੀ ਕਿਸੇ ਹੋਰ ਢੁਕਵੀਂ ਰੇਲਗੱਡੀ ਜਾਂ ਉਸੇ ਰੇਲਗੱਡੀ ਦੀ ਕਿਸੇ ਹੋਰ ਮਿਤੀ ਵਿਚ ਉਪਲਬਧ ਸੀਟ ’ਤੇ ਬਿਨਾਂ ਕਿਸੇ ਵਾਧੂ ਫ਼ੀਸ ਦੇ ਸਮਾਯੋਜਨ ਕੀਤਾ ਜਾਂਦਾ ਹੈ। ਇਹ ਸੁਵਿਧਾ ਕੇਵਲ ਆਈ.ਆਰ.ਸੀ.ਟੀ.ਸੀ. ਦੇ ਮਾਧਿਅਮ ਨਾਲ ਆਨਲਾਈਨ ਬੁੱਕ ਕੀਤੀਆਂ ਗਈਆਂ ਰਿਜ਼ਰਵ ਟਿਕਟਾਂ ’ਤੇ ਹੀ ਉਪਲਬਧ ਹੈ। ਇਸ ਯੋਜਨਾ ਦਾ ਮੁੱਖ ਉਦੇਸ਼ ਰੇਲਗੱਡੀਆਂ ਵਿਚ ਉਪਲਬਧ ਖ਼ਾਲੀ ਸੀਟਾਂ ਦੀ ਵੱਧ ਤੋਂ ਵੱਧ ਵਰਤੋਂ ਯਕੀਨੀ ਬਣਾਉਣਾ, ਉਡੀਕ ਸੂਚੀ ਵਾਲੇ ਯਾਤਰੀਆਂ ਨੂੰ ਯਾਤਰਾ ਦਾ ਮੌਕਾ ਦੇਣਾ ਅਤੇ ਸੀਟਾਂ ਦੀ ਬੇਲੋੜੀ ਖਾਲੀਪਨ ਨੂੰ ਘਟਾਉਣਾ ਹੈ।