ਬਲੋਚਿਸਤਾਨ ਦੇ ਖ਼ੁਜ਼ਦਾਰ ਨੇੜੇ 5.7 ਤੀਬਰਤਾ ਦਾ ਭੁਚਾਲ
ਅੰਮ੍ਰਿਤਸਰ, 17 ਅਕਤੂਬਰ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ ’ਚ ਅੱਜ ਸਵੇਰੇ ਜ਼ੋਰਦਾਰ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਰਿਕਟਰ ਪੈਮਾਨੇ ’ਤੇ ਇਸ ਭੁਚਾਲ ਦੀ ਤੀਬਰਤਾ 5.
ਅੰਮ੍ਰਿਤਸਰ, 17 ਅਕਤੂਬਰ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ ’ਚ ਅੱਜ ਸਵੇਰੇ ਜ਼ੋਰਦਾਰ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਰਿਕਟਰ ਪੈਮਾਨੇ ’ਤੇ ਇਸ ਭੁਚਾਲ ਦੀ ਤੀਬਰਤਾ 5.7 ਦਰਜ ਕੀਤੀ ਗਈ, ਜਦਕਿ ਕੁਝ ਏਜੰਸੀਆਂ ਨੇ ਇਸ ਨੂੰ 5.6 ਤੋਂ 5.9 ਦੇ ਦਰਮਿਆਨ ਦੱਸਿਆ ਹੈ। ਭੁਚਾਲ ਦਾ ਕੇਂਦਰ ਖ਼ੁਜ਼ਦਾਰ ਸ਼ਹਿਰ ਤੋਂ ਲਗਭਗ 48 ਕਿੱਲੋਮੀਟਰ ਉੱਤਰ-ਪੱਛਮ ਦਿਸ਼ਾ ’ਚ ਜ਼ਮੀਨ ਤੋਂ ਸਿਰਫ਼ 10 ਕਿੱਲੋਮੀਟਰ ਦੀ ਡੂੰਘਾਈ ’ਤੇ ਸਥਿਤ ਸੀ। ਪਾਕਿਸਤਾਨ ਮੌਸਮ ਵਿਭਾਗ ਅਨੁਸਾਰ ਇਸ ਦਾ ਕੇਂਦਰ 28.02 ਉੱਤਰੀ ਵਿਥਕਾਰ ਅਤੇ 66.20 ਪੂਰਬੀ ਲੰਬਕਾਰ ’ਤੇ ਦਰਜ ਕੀਤਾ ਗਿਆ। ਮਾਹਿਰਾਂ ਮੁਤਾਬਿਕ ਭੁਚਾਲ ਦੀ ਡੂੰਘਾਈ ਕਾਫ਼ੀ ਘੱਟ ਹੋਣ ਕਾਰਨ ਇਸ ਦੀ ਊਰਜਾ ਜ਼ਮੀਨ ਦੀ ਸਤ੍ਹਾ ਦੇ ਬਹੁਤ ਨੇੜਿਓਂ ਨਿਕਲੀ, ਜਿਸ ਕਰਕੇ ਖ਼ੁਜ਼ਦਾਰ ਅਤੇ ਆਸ-ਪਾਸ ਦੇ ਇਲਾਕਿਆਂ ‘ਚ ਤੇਜ਼ ਝਟਕੇ ਮਹਿਸੂਸ ਕੀਤੇ ਗਏ। ਅੰਦਾਜ਼ੇ ਮੁਤਾਬਿਕ ਭੁਚਾਲ ਦੇ ਝਟਕੇ ਕੇਂਦਰ ਤੋਂ ਮਹਿਜ਼ 14 ਸਕਿੰਟਾਂ ਅੰਦਰ ਖ਼ੁਜ਼ਦਾਰ ਸ਼ਹਿਰ ਤੱਕ ਪਹੁੰਚ ਗਏ। ਇਸ ਤੋਂ ਇਲਾਵਾ ਖ਼ਾਰਾਨ ਅਤੇ ਕਲਾਤ ਵਰਗੇ ਸ਼ਹਿਰਾਂ ‘ਚ ਵੀ ਕੁਝ ਹੀ ਸਕਿੰਟਾਂ ਲਈ ਝਟਕੇ ਮਹਿਸੂਸ ਕੀਤੇ ਗਏ। ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਭੁਚਾਲ ਦੇ ਝਟਕਿਆਂ ਕਾਰਨ ਖ਼ੁਜ਼ਦਾਰ ਦੇ ਪਹਾੜੀ ਖੇਤਰ ਬੇਸਾਰ ’ਚ ਖਾਣ ਵਿਚ ਕੰਮ ਕਰ ਰਹੇ ਇਕ ਮਜ਼ਦੂਰ ਅਬਦੁਲ ਰਹੀਮ ਪੁੱਤਰ ਕਮਰੂਦੀਨ ’ਤੇ ਭਾਰੀ ਪੱਥਰ ਡਿਗ ਜਾਣ ਕਾਰਨ ਉਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ।
