ਮੋਗਾ, 6 ਅਪ੍ਰੈਲ (ਗੁਰਤੇਜ ਸਿੰਘ ਬੱਬੀ)-ਮੋਗਾ 'ਚ ਸਿਹਤ ਸੇਵਾਵਾਂ ਨੂੰ ਨਵੀਆਂ ਉਚਾਈਆਂ 'ਤੇ ਪਹੁੰਚਾਉਣ ਲਈ ਐਚ.ਡੀ.ਐਫ.ਸੀ. ਬੈਂਕ ਪਰਿਵਰਤਨ ਤੇ ਸਮਾਈਲ ਫ਼ਾਉਂਡੇਸ਼ਨ ਵਲੋਂ ਮੋਬਾਈਲ ਮੈਡੀਕਲ ਯੂਨਿਟ ਦੀ ਸ਼ੁਰੂਆਤ ਮੋਗਾ ਦੇ ਅਧੀਨ ਖੇਤਰ ਦੇ 12 ਪਿੰਡਾਂ ਵਿਚ 1 ਮੋਬਾਈਲ ਮੈਡੀਕਲ ਯੂਨਿਟ ਦੀ ਸ਼ੁਰੂਆਤ ਕੀਤੀ ਗਈ ਹੈ | ਇਹ ਮਹੱਤਵਪੂਰਨ ਪਹਿਲ ਦੂਰ-ਦਰਾਜ਼ ਇਲਾਕਿਆਂ 'ਚ ਵੱਸਦੇ ਪਿੰਡਾਂ ਦੇ ਲੋਕਾਂ ਨੂੰ ਮੁੱਢਲੀਆਂ ਸਿਹਤ ਸੇਵਾਵਾਂ ਮੁਹੱਈਆ ਕਰਵਾਉਣ ਵਿਚ ਮਦਦਗਾਰ ਸਾਬਤ ਹੋਵੇਗੀ | ਇਸ ਸਬੰਧੀ ਸਿਵਲ ਸਰਜਨ ਮੋਗਾ ਡਾ. ਰਮਨਦੀਪ ਸਿੰਗਲਾ ਨੇ ਦੱਸਿਆ ਕਿ ਇਸ ਮੋਬਾਈਲ ਮੈਡੀਕਲ ਯੂਨਿਟ ਰਾਹੀਂ ਪਿੰਡਾਂ 'ਚ ਰਹਿੰਦੇ ਲੋਕਾਂ ਨੂੰ ਉਨ੍ਹਾਂ ਦੇ ਨੇੜੇ ਹੀ ਇਲਾਜ ਤੇ ਸਿਹਤ ਸਬੰਧੀ ਸਲਾਹ ਮਿਲੇਗੀ, ਜਿਸ ਨਾਲ ਸਿਹਤ ਸਹੂਲਤਾਂ ਦੀ ਪਹੁੰਚ ਹੋਰ ਵੀ ਆਸਾਨ ਬਣੇਗੀ | ਇਸ ਮੌਕੇ ਡਾ. ਜਯੋਤੀ ਏ.ਸੀ.ਐਸ. ਨੇ ਕਿਹਾ ਕਿ ਮੈਡੀਕਲ ਮੋਬਾਈਲ ਵੈਨ 'ਚ ਸਾਰੀਆਂ ਲੋੜੀਂਦੀਆਂ ਸਹੂਲਤਾਂ ਉਪਲਬਧ ਹਨ ਤੇ ਪੂਰਾ ਸਟਾਫ਼ ਹੈ | ਉਨ੍ਹਾਂ ਇਸ ਮੌਕੇ ਮੋਬਾਈਲ ਮੈਡੀਕਲ ਵੈਨ ਲਈ ਐਚ. ਡੀ.ਐਫ.ਸੀ. ਬੈਂਕ ਦੇ ਅਧਿਕਾਰੀਆਂ ਦਾ ਧੰਨਵਾਦ ਕੀਤਾ | ਇਸ ਮੌਕੇ 'ਤੇ ਸਮਾਈਲ ਫ਼ਾਉਂਡੇਸ਼ਨ ਦੇ ਸੀ.ਐਚ.ਓ. ਆਂਚਲ ਠਾਕੁਰ ਤੇ ਹਰਜੀਤ ਕੌਰ, ਹਰਪ੍ਰੀਤ ਕੌਰ ਤੇ ਗੁਰਮੀਤ ਸਿੰਘ ਆਦਿ ਹਾਜ਼ਰ ਸਨ |
